បេឡាជាតិរបបសន្តិសុខ ហៅកាត់ថា ប.ស.ស. ព្រមានចាត់វិធានការច្បាប់លើជនអនាមិកដែលបំភ្លៃខុសពីការពិត ដោយថា កម្មករប្រើប្រាស់ប័ណ្ណ ប.ស.ស. សម្រាប់ព្យាបាលជំងឺបានត្រឹមឆ្នាំ២០១៩ និងគ្រូពេទ្យឲ្យថ្នាំមិនល្អដូចអ្នកបង់លុយ។
ក្នុងលិខិតបំភ្លឺរបស់ខ្លួនកាលពីថ្ងៃម្សិលមិញនេះ ប.ស.ស. បានច្រានចោលការឃោសនាពីជនអគតិមួយចំនួន ដែលបានបំភ្លៃខុសពីការពិត ដោយថា កម្មករដែលប្រើប្រាស់បណ្ណ ប.ស.ស សម្រាប់ព្យាបាលជំងឺប្រើបានតែឆ្នាំ២០១៨ ក្នុងរយៈពេលបោះឆ្នោតដល់ឆ្នាំ២០១៩ ឈប់ទទួលស្គាល់ និងគ្រូពេទ្យឲ្យថ្នាំមិនល្អដូចអ្នកបង់លុយជាដើម។
ក្នុងលិខិតបំភ្លឺដដែលបានឲ្យដឹងទៀតថា កម្មករកម្មការិនីដែលប្រើប័ណ្ណ ប.ស.ស ទៅទទួលសេវាដោយមិនបង់លុយ ហើយទទួលបានថ្នាំ និងគុណភាពព្យាបាលដូចអតិថិជនបង់លុយគ្រប់ពេទ្យដៃគូរបស់ ប.ស.ស ដោយមិនមានការរើសអើងនោះទេ។ ករណីមានជនណាបំភ្លៃខុសពីការពិត កម្មករ និងកម្មការិនីទាំងអស់ត្រូវផ្តល់ព័ត៌មានដល់សមត្ថកិច្ចពាក់ព័ន្ធ ដើម្បីចាត់វិធានការច្បាប់លើបុគ្គលនោះ។
VOD មិនអាចសុំការបំភ្លឺបន្ថែមពីអ្នកនាំពាក្យ ប.ស.ស លោក ជាវ ប៊ុនរិទ្ធិ បានទេ ដោយលោកថា ជាប់រវល់ប្រជុំ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា កម្មករភាគច្រើនធ្លាប់រិះគន់លើគ្រូពេទ្យដែលធ្វើការនៅស្ថាប័នដៃគូរបស់ ប.ស.ស ថា ផ្តល់សេវាសុខភាពដល់ពួកគេមានការរើសអើង និងយឺតយ៉ាវ។
ប៉ុន្តែ ករណីគ្រូពេទ្យឲ្យថ្នាំមិនល្អដូចអតិថិជនបង់លុយ និងថា កម្មករប្រើបណ្ណ ប.ស.ស បានត្រឹមឆ្នាំ២០១៩នោះ លោកមិនបានដឹងនោះទេ។
ទោះជាយ៉ាងណា លោក អាត់ ធន់ ផ្តល់ជាអនុសាសន៍ថា ដើម្បីកុំឲ្យមានការរិះគន់លើការផ្តល់សេវារបស់ ប.ស.សនេះ ស្ថាប័នពាក់ព័ន្ធត្រូវយកចិត្តទុកដាក់ផ្តល់សេវាឲ្យកម្មករទទួលបានល្អ និងស្របតាមច្បាប់បានកំណត់។
ប្រធានសហភាពការងារកម្ពុជា លោក អាត់ ធន់
បេឡាជាតិរបបសន្តិសុខសង្គម (ប.ស.ស) បានបញ្ជាក់ឲ្យដឹងថា គិតរហូតដល់ត្រឹមចុងឆ្នាំ២០១៦ ស្ថាប័ននេះ បានចុះបញ្ជីរោងចក្រសហគ្រាសជាង ៨ពាន់ ដែលមានកម្មករនិយោជិតជាង ១លាននាក់ ដើម្បីជួយទំនុកបម្រុងពេលកម្មករមានគ្រោះថ្នាក់ការងារ។
ប.ស.ស ឲ្យដឹងទៀតថា បុគ្គលិក និយោជិត កម្មករ-កម្មការិនី ទទួលរងគ្រោះថ្នាក់ការងារចំនួន ១៣៥ ៩១៤ នាក់ ប.ស.ស បានផ្តល់ថវិកា ថ្លៃព្យាបាល និងឧបត្ថម្ភដល់ជនរងគ្រោះ និងគ្រួសារជនរងគ្រោះ ចំនួន ៥៥ ៣៩៩ លានរៀល ប្រហែល ១៤លានដុល្លារ។
កម្មករ-កម្មការិនី គ្រោះថ្នាក់ពេលធ្វើដំណើរ ៣៦ ៧២២នាក់ គ្រោះថ្នាក់នៅកន្លែងធ្វើការ ៩៩ ១៥៣នាក់ និងជំងឺវិជ្ជាជីវៈ ៣៩នាក់ ដែលបានទទួលអត្ថប្រយោជន៍ពី ប.ស.ស៕
