ក្រសួងការបរទេសកម្ពុជា និងស្ថាប័នរដ្ឋមួយចំនួនទៀត បានចេញសេចក្ដីថ្លែងការណ៍ជាបន្ដបន្ទាប់ ថ្កោលទោសសហរដ្ឋអាមេរិក ដែលបានដាក់ទណ្ឌកម្មលើលោក ហ៊ីង ប៊ុនហៀង ប្រធានកងអង្គរក្សលោកនាយករដ្ឋមន្ដ្រី ហ៊ុន សែន និងថាជាការលំអៀងផ្នែកនយោបាយ។
នៅថ្ងៃទី១២ខែមិថុនាថ្មីៗនេះ ក្រសួងរតនាគារជាតិអាមេរិក បានជូនដំណឹងពីការបង្កកទ្រព្យសម្បត្តិរបស់លោក ហ៊ីង ប៊ុនហៀង ដោយចោទមន្ដ្រីជាន់ខ្ពស់កម្ពុជារូបនេះ ថា បានបញ្ជាឲ្យកងអង្គរក្សវាយប្រហារលើប្រជាពលរដ្ឋកម្ពុជាដែលគ្មានអាវុធ ក្នុងរយៈពេលជាច្រើនឆ្នាំកន្លងទៅ រួមទាំងការវាយបង្ក្រាបលើក្រុមបាតុករ កាលពីឆ្នាំ២០១៣ និងការព្រួតវាយលើអតីតតំណាងរាស្ដ្របក្សប្រឆាំង ២រូប នៅមុខវិមានរដ្ឋសភា កាលពីឆ្នាំ២០១៥។
ប៉ុន្ដែ បន្ទាប់ពីការប្រកាសដាក់ទណ្ឌកម្មបែបនេះ ស្ថាប័នរដ្ឋ និងស្ថាប័នកងទ័ពមួយចំនួនបានរួមគ្នាថ្កោលទោសយ៉ាងខ្លាំងចំពោះសហរដ្ឋអាមេរិក ដោយថា បានបំពានអធិបតេយ្យភាព និងជ្រៀតជ្រែកកិច្ចការផ្ទៃក្នុងកម្ពុជា និងលម្អៀងផ្នែកនយោបាយទៅរកអតីតបក្សប្រឆាំង។ ស្ថាប័នទាំងនោះ រួមមាន ក្រសួងការបរទេសកម្ពុជា ក្រសួងការពារជាតិ ទីស្ដីការគណៈរដ្ឋមន្ដ្រី ខុទ្ទកាល័យនាយករដ្ឋមន្ដ្រី រាជបណ្ឌិសភាកម្ពុជា និងអគ្គបញ្ជាការដា្ឋន។
ក្នុងសេចក្ដីថ្លែងការណ៍ កាលពីថ្ងៃម្សិលមិញ ក្រសួងការបរទេសកម្ពុជាបានថ្លែងការពារលោក ហ៊ីង ប៊ុនហៀង ថា ជាមនុស្សស្អាតស្អំ និងមិនបានប្រព្រឹត្តអំពើរំលោភសិទ្ធិមនុស្ស និងឧក្រិដ្ឋកម្មលើប្រជាពលរដ្ឋខ្លួនឯងនោះទេ។
សេចក្តីថ្លែងការណ៍ដដែលក៏បានរិះគន់សហរដ្ឋអាមេរិកថាកំពុងដើរតាមគន្លងចាស់ កាលពីអតីតកាល និងកំពុងជំរុញឲ្យមានការផ្លាស់ប្ដូររបបដឹកនាំមួយ តាមបែបមិនប្រជាធិបតេយ្យ។
សេចក្ដីថ្លែងការណ៍ក្រសួងការបរទេសកម្ពុជាកាលពីថ្ងៃម្សិលមិញ
ប្រធានកងអង្គរក្សនាយករដ្ឋមន្ដ្រី លោក ហ៊ីង ប៊ុនហៀង ចាត់ទុកការចោទប្រកាន់របស់អាមេរិក ថា មិនមានមូលដ្ឋាន និងថា លោកក៏គ្មានប្រាក់តម្កល់ទៅធនាគារអាមេរិកដែរ។ លោកក៏បដិសេធថា មិនមានជាប់ពាក់ព័ន្ធនឹងអំពើរំលោភសិទ្ធិមនុស្សទេ ប៉ុន្ដែ លោករំលឹកថា អ្វីដែលកងអង្គរក្សធ្វើនៅមុខរដ្ឋសភា កាលពីឆ្នាំ២០១៥ គឺជាអនុវត្តច្បាប់ ហើយក៏ជាកំហុសរបស់អតីតតំណាងរាស្ដ្របក្សប្រឆាំងខ្លួនឯង។
ប្រធានកងអង្គរក្សនាយករដ្ឋមន្ដ្រី លោក ហ៊ីង ប៊ុនហៀង
ក្នុងសេចក្ដីថ្លែងការណ៍មួយកាលពីម្សិលមិញ ប្រធានក្រុមសមាជិកសភាអាស៊ានដើម្បីសិទ្ធិមនុស្ស លោក Charles Santiago បានប្រកាសគាំទ្រចំណាត់ការរបស់អាមេរិកនេះ ថា ជាការត្រឹមត្រូវ និងដាស់តឿនដល់ថ្នាក់ដឹកនាំរដ្ឋាភិបាលកម្ពុជា ដែលមានជាប់ពាក់ព័ន្ធនឹងបញ្ហាសិទ្ធិមនុស្ស។
អ្នកតាមដានពីការអភិវឌ្ឍសង្គម លោកបណ្ឌិត មាស នី យល់ថា នេះជាគោលនយោបាយរបស់អាមេរិក ដែលជំរុញឲ្យមានការគោរពសិទ្ធិមនុស្សនៅលើពិភពលោក។ លោកវិភាគថា ទំនាក់ទំនងកម្ពុជា-អាមេរិក នឹងកាន់តែតានតឹងជាងនេះ ប្រសិនបើបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា គ្មានការផ្លាស់ប្ដូរទេនោះ។
លោកបន្ដថា៖ «មិនមែនជាការជ្រៀតជ្រែកកិច្ចការផ្ទៃក្នុងទេ វាជាការដែលប្រទេសមួយ គេការពារអ្វីដែលជាគុណតម្លៃរបស់ប្រទេសគេ ហើយការបង្កកទ្រព្យសម្បត្តិ ក៏មិនធ្វើក្នុងធនាគារបស់ស្រុកខ្មែរយើងទេ ប៉ុន្ដែគេបង្កកក្នុងធនាគារប្រទេសគេ។ បើសិនជាយើងនៅតែបន្ដធ្វើនូវដែលកំពុងធ្វើ ខ្ញុំគិតថា ស្ថានភាពទំនាក់ទំនងមិនប្រសើរឡើងទេក្នុងពេលអនាគត»។
ក្នុងបរិបទកម្ពុជា លោក ហ៊ីង ប៊ុនហៀង គឺជាមនុស្សដំបូងគេ ដែលរងទណ្ឌកម្មបង្កកទ្រព្យសម្បត្តិនៅក្រៅប្រទេស បន្ទាប់ពីព្រឹទ្ធសភាសហរដ្ឋអាមេរិក កាលពីពាក់កណ្ដាលខែវិច្ឆិកាឆ្នាំ២០១៧ បានអនុម័តសេចក្ដីសម្រេចមួយ ដែលនឹងដាក់បញ្ចូលមន្ដ្រីកម្ពុជាទៅក្នុងបញ្ជីខ្មៅ ដែលគេឈប់ទាក់ទង ឬធ្វើពាណិជ្ជកម្មជាមួយ៕
