ក្រសួងធនធានទឹក និងឧតុនិយម បានព្រមានទៅដល់ប្រជាពលរដ្ឋ ឲ្យផ្អាកធ្វើដំណើរតាមសមុទ្រជាបណ្តោះអាសន្ននៅសប្តាហ៍នេះសិន ដោយសារមានភ្លៀងធ្លាក់ច្រើន និងខ្យល់ខ្លាំង។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ ក្រសួងធនធានទឹក និងឧតុនិយម បានឲ្យដឹងថា បណ្ដាខេត្តជាប់មាត់សមុទ្រ នឹងមានភ្លៀងធ្លាក់ច្រើនជាបន្តបន្ទាប់ ដែលនឹងបណ្ដាលឲ្យមានខ្យល់បក់បោកខ្លាំង និងមានរលកខ្ពស់ទៀតផង។
ក្រសួងបានឲ្យដឹងបន្ថែមថា រាជធានីខេត្តដទៃទៀតក៏នឹងមានភ្លៀងធ្លាក់រាយប៉ាយក្នុងបរិមាណពីមធ្យមទៅបង្គួរផងដែរ។
ជាមួយអាកាសធាតុបែបនេះ ក្រសួងបានប្រាប់ទៅប្រជាពលរដ្ឋ ឲ្យប្រុងប្រយ័ត្នចំពោះការធ្វើដំណើរ និងការនេសាទតាមសមុទ្រ ដោយថា គួរផ្អាកសកម្មភាពជាបណ្តោះអាសន្ន ចាប់ពីថ្ងៃទី១៨ ដល់ថ្ងៃទី២៤ ខែមិថុនា ឆ្នាំ២០១៨នេះ៕
