មកទល់ពេលនេះ អ្នកនាង យុគ ចិន្តា បានបញ្ចេញមុខកូនស្រីកាន់តែច្រើននៅក្នុងពិភពសិល្បៈ ដោយអ្នកនាងបានប្រកាសសរសើរមិនដាច់ពីមាត់ថា កូនស្រី យុគ ដាពេជ្រ ហៅអម គឺជាកូនស្រីតែម្នាក់របស់ខ្លួន បើទោះជាអ្នកនាងមិនដែលបង្ហើបអោយដឹងពីអត្តសញ្ញាណអតីតស្វាមី ដែលជាឪពុកក្មេងសូម្បីតែម្ដង។ ពីមុនអ្នកនាងប្រកាសត្រឹមថា កូនស្រីមានទេពកោសល្យផ្នែកចម្រៀង និងតន្ត្រី ប៉ុណ្ណោះ ប៉ុន្តែក្នុងថ្ងៃខួបកំណើតកូនស្រីមុននេះ អ្នកនាងបែរជាប្រកាសថា អ្នកនាងនឹងបណ្ដុះកូនស្រីអោយស្នងតំណែងពិធីការិនីជំនួសខ្លួន បន្ថែមទៀត។
អ្នកនាង យុគ ចិន្តា បានថ្លែងក្នុងពិធីខួបកំណើតកូនស្រីគម្រប់វ័យ១៥ឆ្នាំ កាលពីថ្ងៃទី១៦ មិថុនា ថា អ្នកនាងនឹងអោយកូនស្រីក្លាយខ្លួនជាពិធីការិនីជំនួសខ្លួន ក្នុងពេលដ៏ខ្លី ដោយសារតែអ្នកនាងយល់ថាមានតែអាជីពជាពិធីការិនីមួយគត់ ដែលអាចធ្វើអោយកូនស្រីរបស់អ្នកនាងនៅល្បីបានយូរ និងឈរជើងបានយូរ សំខាន់អោយតែមានកម្មវិធីចេញមុខ និងមានទេពកោសល្យបានល្អ។ អ្នកនាងថាអាជីពចម្រៀងអោយតែវ័យចាស់បន្តិច នឹងបាត់ការគាំទ្រហើយ ប៉ុន្តែបើធ្វើពិធីការិនី គឺទោះជាចាស់ក៏នៅតែមានទីផ្សារនោះដែរ ដោយអ្នកនាងបញ្ជាក់ថាគឺកាន់កម្មវិធីជារបៀបមនុស្សវ័យកណ្ដាល ឬវ័យចាស់។
អ្នកនាងបានទាំងអួតសរសើរថាកូនស្រីរបស់ខ្លួនមានទេពកោសល្យគ្រប់គ្រាន់ក្នុងនាមជាតារាសិល្បៈមួយរូប ដែលអាចឈោងឆាប់អាជីពពិធិនីដូចខ្លួនបាន ដោយសារតែនាងមានដុងសិល្បៈ ដោយចេះតែទាំងច្រៀង តន្ត្រី ភាសា និងសំខាន់គឺបានវោហារ ដោយអ្នកនាងបញ្ជាក់ថាកូនស្រីថែមទាំងមានកំប្លុកកំប្លែងចង់ល្អជាងអ្នកនាងផង។ អ្នកនាងបញ្ជាក់ថាអត់បានបង្ខំកូនស្រីអោយហក់ចាប់សិល្បៈដូចខ្លួននោះទេ តែបណ្ដាលមកពីកូនមានដុងគ្រប់គ្រាន់ ហើយអ្នកនាងក៏ចង់ជំរុញអោយដល់គោលដៅ ទើបអ្នកនាងត្រូវតែបណ្ដុះបណ្ដាល។
អ្នកនាងកូនស្រីរបស់ខ្លួនអាចលេងព្យាណូបានស្ទាត់ ចេះរាំរបាំប៉ាឡេ និងចេះច្រៀងអុបប៉េរ៉ា បានស្ទាត់ ដោយក្រៅពីសិក្សាភាសាខ្មែរ កូនអ្នកនាងក៏រៀនចិន និងអង់គ្លេសស្របគ្នាផងដែរ ទើបអ្នកនាងយល់ថាកូនស្រីរបស់ខ្លួនបានត្រូវបានបណ្ដុះអោយក្លាយជាពិធីការិនី គឺពិតជាធ្វើបានល្អ ដោយសារតែអ្នកនាងថាកូនស្រីចេះច្រើនទម្រង់សិល្បៈ និង ចេះភាសា។
អ្នកនាង យុគ ចិន្តា បញ្ជាក់ថាក្នុងពេលដ៏ខ្លី អ្នកនាងនឹងអោយកូនស្រីបង្ហាញមុខក្នុងនាមជាពិធីការិនី ប៉ុន្តែមិនទាន់ច្បាស់ពីពេលវេលានោះទេ ដោយសារតែអ្នកនាងចង់ពង្រឹងសមត្ថភាពកូនស្រីអោយមានសមត្ថភាពអោយរឹងមាំសិន។ ក្នុងនោះអ្នកនាងក៏ត្រូវការអោយកូនពេញរូបពេញរាងជាងនេះដែរ ដើម្បីកុំអោយនៅស្ទើរពេកក្នុងពេលអោយកូនស្រីកាន់តំណែងក្នុងកម្មវិធីណាមួយ នៅCTN ឬ My TV ដែលអ្នកនាងបម្រើការនៅទីនោះ។
យុគ ដាពេជ្រ ហៅ អម បានថ្លែងបញ្ជាក់ថាតាំងពីដើមដល់ធំ ម្ដាយរបស់ខ្លួនមិនដែលបង្ខំអោយនាងរៀនភ្លេង ហាត់ច្រៀង និងសិក្សាទម្រង់សិល្បៈនោះទេ គឺនាងជាអ្នកស្នើសុំទាំងអស់។ ដោយឡែកសម្រាប់អាជីពពិធីការិនី ដ្បិតថានៅពេលនេះ នាងមិនទាន់មានទំនុកចិត្តថាអាចធ្វើបាន ប៉ុន្តែផ្អែកតាមការសន្សំសមត្ថភាព និងការជ្រោមជ្រែងរបស់ម្ដាយ នាងបញ្ជាក់ថាខ្លួនពិតជាអាចធ្វើបាន៕
