មន្ត្រីយោធាដែលសកម្មក្នុងការប្រើប្រាស់បណ្តាញសង្គមហ្វេសប៊ុកលាតត្រដាងបញ្ហាផ្សេងៗនៅក្នុងសង្គមនោះ បានព្រមានចាត់វិធានការលើអ្នកលួចផេកហ្វេសប៊ុករបស់លោក ទាំងយន្តការផ្លូវច្បាប់និងក្រៅច្បាប់។
លោក ផែង វណ្ណៈថ្លែងកាលពីម្សិលមិញថា ហ្វេសប៊ុករបស់លោកត្រូវបានជនអនាមិកលួចយកទៅគ្រប់គ្រង ហើយប្រើប្រាស់សារវាយប្រហារលើលោក នេត សាវឿន ជាអគ្គស្នងការនគរបាលជាតិ។
លោក ផែង វណ្ណៈ បញ្ជាក់ថា លោកមិនដែលមានជម្លោះជាមួយលោកនេត សាវឿនទេ ហើយថា លោក នេត សាវឿន ជាថ្នាក់ដឹកនាំល្អធ្លាប់បានជួយបណ្តុះបណ្តាលលោកទៀតផង។ អតីតមន្ត្រីក្រមខណ្ឌនគរបាលហើយបច្ចុប្បន្នដូរទៅក្របខណ្ឌយោធារូបនេះ បញ្ជាក់ថា លោកនឹងចាត់ការទាំងផ្លូវច្បាប់និងក្រៅផ្លូវច្បាប់លើអ្នកដែលលួចផេករបស់លោក។
លោក ផែង វណ្ណៈ
លោកផែង វណ្ណៈថ្លែងថា លោកបានប្តឹងករណីនេះទៅកាន់សមត្ថកិច្ចពាក់ព័ន្ធហើយ ចំណែកការចាត់ការក្រៅច្បាប់នោះ លោកមិនបានបញ្ជាក់លម្អិតថា នឹងចាត់ការតាមរបៀបណានោះទេ។
អ្នកនាំពាក្យក្រសួងការពារជាតិលោក ឈុំ សុជាតិ បានប្រាប់វីអូឌីកាលពីថ្ងៃទី១១ខែមិថុនាថា លោក ផែង វណ្ណៈ គឺជាមន្ត្រីយោធាស័ក្តិ ៤កន្លះ បន្ទាប់ពីផ្ទេរពីក្រសួងមហាផ្ទៃ។
អ្នកស្រាវជ្រាវការអភិវឌ្ឍន៍សង្គមលោក ប៉ា ច័ន្ទរឿន យល់ឃើញថា អ្នកប្រើប្រាស់បណ្តាញសង្គមនៅកម្ពុជាបច្ចុប្បន្នខ្សោយទាំងសមត្ថភាពបច្ចេកទេសនិងសីលធម៌។
បញ្ហាសមត្ថភាពបច្ចេកទេសលោកថា៖«នៅក្នុងសង្គមយើងសព្វថ្ងៃការប្រើប្រាស់បណ្តាញសង្គមដូចជាហ្វេសប៊ុកហ្នឹង បញ្ហាOnline គឺជាបញ្ហាមួយដែលគួរឲ្យព្រួយបារម្ភ ទី១អាចអ្នកប្រើប្រាស់ខ្លួនឯងមិនយកចិត្តទុកដាក់លើសុវត្ថិភាពតាមបណ្តាញសង្គមហ្វេសប៊ុកហ្នឹង។»។
ចំណែកបញ្ហាសីលធម៌សង្គមវិញលោកថា អ្នកប្រើប្រាស់បណ្តាញសង្គមចូលចិត្តតែរឿងអវិជ្ជមានដែលមិនមានប្រយោជន៍ដល់ខ្លួនឯងនិងសង្គម។
អ្នកស្រាវជ្រាវការអភិវឌ្ឍន៍សង្គមលោក ប៉ា ច័ន្ទរឿន
នៅអំឡុងឆ្នាំ២០១៣ ពេលដែលស្ថានភាពនយោបាយមានភាពតានតឹងលោកផែង វណ្ណៈ ក៏ធ្លាប់បានបង្ហោះរូបកាំភ្លើងតាមហ្វេសប៊ុក ហើយសរសេរព្រមានបាញ់សម្លាប់អតីតមេដឹកនាំគណបក្សសង្គ្រោះជាតិលោកកឹម សុខា ប៉ុន្តែមិនមានចំណាត់ការផ្លូវច្បាប់ណាមួយលើរូបលោកនោះទេ។