លោកនាយករដ្ឋមន្ត្រី ហ៊ុន សែន រំឭកមន្ត្រីជាថ្មីទៀត ឲ្យចូលរួមជំរុញ ប្រជាធិបតេយ្យពេញលេញមួយនៅកម្ពុជា ខណៈបក្សប្រឆាំងធំមួយត្រូវបានតុលាការប្រកាសរំលាយចោល និងគ្មានឈ្មោះប្រកួតការបោះឆ្នោតនៅអាណត្តិថ្មីនេះ។
គណបក្សសង្គ្រោះជាតិដែលមានអាសនៈក្នុងរដ្ឋសភា និងឃុំ សង្កាត់ប្រហាក់ប្រហែលគណបក្សកាន់អំណាចដែរនោះ ត្រូវបានតុលាការកំពូលប្រកាសរំលាយ កាលពីចុងឆ្នាំមុន តាមបណ្តឹងរបស់រដ្ឋាភិបាល។
ការរំលាយនេះ ធ្វើឲ្យគណបក្សប្រឆាំងធំមួយនេះ គ្មានឈ្មោះចូលរួមប្រកួតការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលគ្រោងធ្វើនៅថ្ងៃទី២៩ខែកក្កដាខាងមុខនេះបាន។ ប៉ុន្តែមានគណបក្ស២០ បានចុះឈ្មោះចូលរួមប្រកួតប្រជែង។
លោក ហ៊ុន សែន ក្នុងពិធីជួបកម្មករ នៅខេត្តតាកែវ នាថ្ងៃពុធនេះ បានរំឭកថា អាជ្ញាធរគ្រប់លំដាប់ថ្នាក់ ត្រូវផ្តល់ឱកាសស្មើៗគ្នា ដល់គណបក្សនយោបាយ ដែលពួកគេបានចុះឈ្មោះចូលរួមប្រកួតការបោះឆ្នោត ទាំងការលើកស្លាកគណបក្ស ទាំងការធ្វើសកម្មភាពនយោបាយ ដោយថាទីណាគណបក្សប្រជាជនលើកស្លាកបាន គណបក្សដទៃក៏អាចលើកបានដែរ មិនត្រូវរើសអើងឡើយ។
លោកនាយករដ្ឋមន្ត្រី ហ៊ុន សែន
អ្នកនាំពាក្យគណបក្សប្រជាធិបតេយ្យមូលដ្ឋាន ដែលជាគណបក្សមួយ ចូលរួមបោះឆ្នោតដែរនោះ លោក សាម អ៊ីន សារទរ ការក្រើនរំឭកនេះ។ ប៉ុន្តែលោកថា អាជ្ញាធរគួរតែធ្វើកិច្ចការនេះតាំងពីដើមរៀងមក មិនចាំបាច់នាយករដ្ឋមន្ត្រីក្រើនរំឭកនោះទេ ដោយថា អាជ្ញាធរ ជាស្ថាប័នអព្យាក្រិត្យមិនប្រកាន់និន្នាការនយោបាយ។
ប៉ុន្តែ លោក សាម អ៊ីន ជំរុញថា បើរដ្ឋាភិបាលចង់ស្តារលទ្ធិប្រជាធិបតេយ្យពិតប្រាកដមែននោះ រដ្ឋាភិបាលគួរតែឈប់ដាក់សម្ពាធ ក្រុមអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ។
លោកថា៖«ខ្ញុំ ចង់អំពាវនាវដល់លោកនាយករដ្ឋមន្ត្រីផងដែរ បើលោកចង់ស្តារ ឬជំរុញលទ្ធិប្រជាធិបតេយ្យឲ្យបានកាន់តែល្អ ទី១ សុំឲ្យលោកបើកសិទ្ធិសេរីភាពដល់អង្គការសង្គមស៊ីវិល ឲ្យធំជាងមុន និងសិទ្ធិសេរីភាព របស់អ្នកសារព័ត៌មាន ដូចជាវិទ្យុ VOD វិទ្យុអាស៊ីសេរី ជាដើមហ្នឹង គួរតែមានលទ្ធភាពផ្សាយបន្តទៅស្ថានីយវិទ្យុផ្សេងៗទៀត ដើម្បីជាផ្នែកមួយផ្តល់សិទ្ធិដល់ប្រជាពលរដ្ឋឲ្យទទួលបានព័ត៌មានពេញលេញ។ អាហ្នឹងហើយជាផ្នែកមួយជំរុញលទ្ធិប្រជាធិបតេយ្យ»។
ប៉ុន្តែអតីតតំណាងរាស្ត្របក្សប្រឆាំង លោក អ៊ូ ច័ន្ទរ័ត្ន យល់ឃើញផ្សេងពីសារ របស់នាយករដ្ឋមន្ត្រី។
អតីតតំណាងរាស្ត្របក្សប្រឆាំង លោក អ៊ូ ច័ន្ទរ័ត្ន
អ្នកវិភាគនយោបាយ លោក បណ្ឌិត មាស នី ប្រាប់VOD កាលពីសប្តាហ៍មុនថា របត់នយោបាយបច្ចុបប្បន្ន ហាក់បានដើរចេញពីគន្លងប្រជាធិបតេយ្យ តាមរយៈធ្វើច្បាប់រំលោភឆន្ទះពលរដ្ឋជាងបីលាននាក់ ដែលបានបោះឆ្នោតគាំទ្រគណបក្សប្រឆាំង និងបានព្រមានថា បើគ្មានអ្វីប្រែប្រួលទេ រដ្ឋាភិបាលថ្មី អាចប្រឈមនឹងជម្លោះផ្ទៃក្នុងផង ជម្លោះការទូតជាមួយសហគមន៍អន្តរជាតិផងដែរ ។
យ៉ាងណាក៏ដោយ លោក ហ៊ុន សែន អះអាងថា ការក្រើនរំឭកមន្ត្រីបែបនេះ ថាបានជួយជំរុញដំណើរការបោះឆ្នោឲ្យដំណើរការទៅ មានលក្ខណៈសេរី ត្រឹមត្រូវ និងយុត្តិធម៌ អាចទទួលយកបានទាំងអស់គ្នា។