រដ្ឋាភិបាលថៃកាលពីថ្ងែច័ន្ទសប្ដាហ៍មុន បានដាក់ទោសប្រហារជីវិតបុរសម្នាក់ដោយចាក់ថ្នាំពុលសម្លាប់។ បុរសរូបនោះឈ្មោះថា Theerasak Longji ត្រូវបានកាត់ទោសប្រហារជីវិតដោយសារតែគាត់ត្រូវបានតុលាការរកឃើញថាជាឃាតករ សម្លាប់យុវជនម្នាក់ នៅឆ្នាំ២០១២ ដោយចាក់ជនរងគ្រោះ២៤កាំបិត ដើម្បីប្លន់យកទូរស័ទ្ទដៃ។
ការកាត់ទោសប្រហារជីវិតបុរសរូបនេះ ត្រូវបានអ្នកឃ្លាំមើលសិទ្ធិមនុស្សមួយចំនួនរិះគន់ធ្ងន់ៗទៅលើការអនុវត្តបែបនេះរបស់ប្រទេសថៃ។ លោក ប្រេដ អាដាម នាយកអង្គការអង្គការសិទ្ធិមនុស្ស Human Rights Watch ប្រចាំអាស៊ី បានហៅការកាត់ទោសប្រហារជីវិតទៅលើបុរសរូបនោះថា កំពុងតែដើរថយក្រោយយ៉ាងខ្លាំងលើបញ្ហាសិទ្ធិមុនុស្ស។ ក្រៅពីអង្គការលើកលែងទោសអន្តរជាតិ (Amnesty International) ក៏បានចេញសេចក្តីថ្លែងការណ៍មួយថ្កោលទោសប្រទេសថៃដែរ ដោយលើកឡើងថាការកាត់ទោសប្រហារជីវិតលើបុរសរូបនេះ ជារំលោភដ៏ធ្ងន់ធ្ងរលើសិទ្ធិរស់រានមានជីវិតរបស់មនុស្ស។
នេះមិនមែនជារឿងថ្មីទេដែលក្រុមសិទ្ធិមនុស្សបានធ្វើការថ្កោលទោសទៅលើប្រទេសថៃក្នុងការអនុវត្តច្បាប់ប្រហារជីវិតទៅលើឧក្រិដ្ឋជន ហើយក្រុមសិទ្ធិមនុស្សទាំងនោះក៏តែងតែជម្រុញឲ្យប្រទេសថៃលុបបំបាត់ចោលនូវការដាក់ទោសទណ្ឌបែបនេះដែរ។
បើទោះបីជាមានការរិះគន់ និងធ្លាប់បានសន្យាជាច្រើនលើកច្រើនសារហើយថា ខ្លួននឹងលុបច្បាប់នេះចោល ប៉ុន្តែទោះជាយ៉ាងណាក៏ដោយក៏ថៃនៅតែមិនអាចបោះចោលច្បាប់នេះបាននៅឡើយទេរហូតដល់ពេលនេះ។
តើមូលហេតុអ្វីបានជាថៃនៅរក្សាការអនុវត្តទោសដ៏ចម្រូងចម្រាស់នេះ?
ក្រុមមន្រ្តីអង្គការលើកលែងទោសអន្តរជាតិបានធ្វើសន្និសីទសារព័ត៌មានមួយនៅក្បែរកន្លែងគុកដែល Theerasak Longji ត្រូវបានគេចាក់ថ្នាំពុលនៅថ្ងៃអង្គារសប្ដាហ៍មុន ដើម្បីធ្វើការថ្កោលទោសលើការកាត់ទោសនេះ។ សន្និសីទកាសែតក៏ធ្វើការផ្សាយផ្ទាល់តាមរយៈទំព័រហ្វេសប៊ុករបស់អង្គការនេះ ប្រចាំប្រទេសថៃផងដែរ។ យោងតាមការចុះផ្សាយរបស់ការសែត The Nation របស់ថៃ ប្រជាជនថៃជាច្រើនបានចូលមើលការផ្សាយផ្ទាល់នេះ ហើយពួកគេក៏បានសម្តែងក៏ខឹងសម្បារនិងរិះគន់អង្គការលើកលែងទោសអន្តរជាតិថាកំពុងតែកាន់ជើងឃាតករដែលបានសម្លាប់មនុស្សយ៉ាងឃៅ។ ប្រជាជនថៃទាំងនោះភាគច្រើនក៏បានលើកឡើងថា Theerasak Longji គឺសាកសមនឹងទទួលទោសបាននេះហើយ។
តាមការចុះផ្សាយរបស់កាសែត The Nation ដដែល ការស្ទង់មតិមួយដែលធ្វើឡើងក្នុងពេលថ្មីៗនេះបង្ហាញថាក្នុងចំណោមប្រជាជន ៧៨០០០ នាក់ដែលចូលរួមការស្ទង់មតិ ប្រជាជនរហូតដល់៩៦ភាគនៅតែគាំទ្រឲ្យមានការកាត់ទោសប្រហាជីវិតដល់ឃាតករដែលសម្លាប់មនុស្ស។
ជារួមបើទោះជាសហគមន៍អន្តរជាតិរិះគន់យ៉ាងណាក៏ដោយ ក៏ថៃនៅតែមិនអាចបោះបង់ចោលច្បាប់នេះបានភ្លាម នោះដោយសារតែមហាជនរបស់ប្រទេសនេះភាគច្រើននៅតែគាំទ្រច្បាប់នេះ។
ទោះជាយ៉ាងណាក៏ដោយ ក៏ប្រទេសថៃតែងតែបង្ហាញជំហរនិងបេ្ដជ្ញាចំពោះសហគមន៏អន្តរជាតិ ពីចេតនាក្នុងការលុបចោលនូវការអនុវត្តទោសប្រហារជីវិតទៅលើឧក្រិដ្ឋជន។ ដកស្រង់សម្តីដោយសារព័ត៌មានស្រេ្តតថាមរបស់សឹង្ហបុរីកាលពីចុងឆ្នាំ២០១៧កន្លងទៅ ប្រធាននាយកដ្ឋានការពារសិទ្ធិនិងសេរីភាពនៃក្រសួងយុត្តិធម៌ថៃលោកស្រី Pitikan Sithidej មានប្រសាសន៍ថាប្រទេសថៃកំពុងតែធ្វើការពិចារណាបោះបង់ចោលការអនុវត្តទោសប្រហារជិីវិតចំពោះបទឧក្រិដ្ឋណាដែលមិនធ្វើអោយប៉ះពាល់អាយុជីវិតអ្នកដទៃ។
ការអនុវត្តទោសប្រហារជីវិតនៅប្រទេសថៃនេះ មាននៅក្នុងច្បាប់សម័យទំនើបរបស់ថៃតាំងពីឆ្នាំ១៩៣៥មកម្ល៉េះ។ ចាប់តាំងពីច្បាប់នេះចូលជាធរមានរហូតដល់ពេលនេះមានអ្នកទោសចំនួន៣២៦នាក់ ដែលត្រូវបានកាត់ទោសប្រហារជីវិតដែលក្នុងនោះ៣១៩នាក់ត្រូវបានបាញ់សម្លាប់ដោយគ្រាប់កាំភ្លើង ហើយ៧នាក់ត្រូវបានកាត់ទោសដោយការចាក់ថ្នាំពុល។
