ពលរដ្ឋបានលើកឡើងថា ពួកគាត់មិនអាចទទួលយកបាន ពីដំណើរការដោះស្រាយរបស់ក្រុមការងារ ស្រុក និងខេត្ត ដែលមិនអនុវត្តទៅតាមគោលការណ៍របស់ពួកគាត់ ដែលបានឯកភាពគ្នាជាមួយ និងក្រសួងដែនដីរួចហើយនោះ។ តែពេលនេះបែរជាក្រុមការងារបង្វែរពួកគាត់ទៅកាន់គោលដៅថ្មីផ្សេងទៀត ហេតុនេះហើយទើបពួកគាត់កើតទុក្ខមិនសុខចិត្តនោះទេ ដូច្នេះហើយទើបពួកគាត់សម្រេចចិត្តឡើងមកតវ៉ានៅក្រសួងបន្តទៀត។
ពលរដ្ឋតវ៉ាម្នាក់អ្នកស្រី មាន ម៉ារីណា បានឲ្យដឹងថា មូលហេតុដែលពួកគេចង់ឡើងមកតវ៉ានៅភ្នំពេញសាជាថ្មីនេះគឺចង់ឲ្យរដ្ឋមន្ត្រីក្រសួងរៀបចំដែនដីលោក ជា សុផារ៉ា បកស្រាយឲ្យច្បាស់ជាមួយពួកគេលើដីដែលបានសម្រេចកាលពីលើកមុន តែមិនត្រូវបានអាជ្ញាធរស្រុកដោះស្រាយជូន។
ពលរដ្ឋតវ៉ាម្នាក់អ្នកស្រី មាន ម៉ារីណា
អភិបាលរងខេត្តកោះកុងលោក អន ភារៈ បានបដិសេធថា រដ្ឋបាលខេត្តមិនបានសម្រេចឲ្យពលរដ្ឋផ្លាស់ប្តូរទីតាំងនោះទេ ដោយថានៅដំណាក់កាលនេះគឺថ្នាក់ខេត្តជាមួយក្រុមការងារអន្តរក្រសួងកំពុងពិនិត្យរៀបចំដោះស្រាយតាមការព្រមព្រៀងជាមួយពលរដ្ឋ។
លោកថា៖ « មិនមែនទៅទីតាំងថ្នីនោះទេ គ្រាន់តែថាយើងមកពិភាក្សាជួបជុំគ្នា ដើម្បីឲ្យក្រុមការងារគេពិនិត្យមើលដីធ្លីឲ្យត្រឹមត្រូវ ព្រោះកាលពីមុនគ្រាន់តែជាការសិក្សា ព្រោះយើងមើលដីធ្លីអីត្រឹមត្រូវទៅ មិនទាន់ដល់ថ្ងៃឯណា! ថ្ងៃ៣០ឯណោះបានផុតថ្ងៃ ហើយឥឡូវថ្ងៃនេះទើបតែម្ភៃប៉ុន្មាននេះ យើងចេះតែនឹកឃើញទៅតាមចិត្តចង់អញ្ចឹង។ […] ខ្ញុំមិនដឹងយល់ថាមិច បើគាត់ជឿតែតាមការឃោសនារបស់មនុស្សមួយចំនួនតូចអញ្ចឹង ហើយគាត់ឃោសនាថាទៅភ្នំពេញបានលុយ ហើយខ្ញុំប្រាប់ហើយថាគេមកដោះស្រាយនៅថ្នាក់ខេត្តនេះ! »
បើតាមលោកអន ភារៈ នៅពេលខេត្តក្រុមការងារមិនទាន់អាចរៀបចំបែងចែកដីធ្លីជូនពលរដ្ឋបាននៅឡើយទេ ដោយថាកំពុងសិក្សា។
អ្នកសម្របសម្រួលអង្គការលីការដូប្រចាំខេត្តកោះកុងលោក ហ៊ួរ អ៊ីន មានប្រសាសន៍ថា ករណីរបស់ពលរដ្ឋ៣១៧គ្រួសារនេះត្រូវបានក្រសួងរៀបចំដែនដីដោះស្រាយចប់រួចរាល់ហើយតាំងពីថ្ងៃទី៦ មិថុនា ដោយទុកពេលឲ្យអាជ្ញាធរខេត្ត និងក្រុមការងារអន្តរក្រសួងចុះដោះស្រាយនៅត្រឹមថ្ងៃទី៣០មិថុនានេះ។ លោកបន្ថែមថា ករណីរបស់ពួកគេមានការប៉ះពាល់ច្រើនដល់ដីអភិរក្ស ដែលត្រូវឲ្យមានការដោះស្រាយបន្តទៀត ដោយលោកស្នើឲ្យពលរដ្ឋ និងអាជ្ញាធរដោះស្រាយដោយសន្តិវិធី និងគួរលើកបញ្ហាដាក់ទល់មុខគ្នាដើម្បីរកដំណោះស្រាយ។
អ្នកសម្របសម្រួលអង្គការលីការដូប្រចាំខេត្តកោះកុងលោក ហ៊ួរ អ៊ីន
កាលពីថ្ងៃទី១៨ ខែឧសភា ឆ្នាំ២០១៨ សាលាខេត្តកោះកុងបានសម្រេចបង្កើតក្រុមការងារខេត្តដើម្បីចុះពិនិត្យនិងសិក្សាករណីទំនាស់ដីធ្លីរបស់ប្រជាពលរដ្ឋនៅក្នុងឃុំជីខលើ ស្រុកស្រែអំបិល និងឃុំកណ្តាល ស្រុកបូទុមសាគរ។ នៅក្នុងសេចក្តីសម្រេចក្រុមការងារនេះត្រូវរាយការណ៍ជូនអភិបាលខេត្ត ប៉ុន្តែមិនបានបញ្ជាក់អំពីកាលកំណត់ពេលណានោះទេ។
