លោកនាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍ប្រាប់ VOD នៅថ្ងៃពុធនេះថា អាជ្ញាធរគ្រឿងញៀននឹងធ្វើការសិក្សាបន្ថែមទៀតថានរណាជាអ្នកនៅពីក្រោយខ្នងការជួញដូរដ៏ធំមួយនេះ ដោយលោកគិតថាជនសង្ស័យទាំងនោះ មិនមានសមត្ថភាពគ្រប់គ្រាន់ក្នុងការទិញគ្រឿងញៀនទៅជួញដូរបន្ដបាននោះឡើយ។
នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន
អាជ្ញាធរខេត្តស្ទឹងត្រែងបានឃាត់ខ្លួនជនសង្ស័យជនជាតិខ្មែរបីនាក់ ដែលធ្វើដំណើរតាមរថយន្ដក្រុងភំ្នពេញសូរិយាដឹកជញ្ជូនអ្នកដំណើរមួយគ្រឿងពីព្រំដែនខ្មែរ-ឡាវមកភ្នំពេញកាលពីថ្ងៃទី២៦ខែមិថុនាឆ្នាំ២០១៨ម្សិលមិញនេះ។ សមត្ថកិច្ចរកឃើញថា ជនសង្ស័យទាំងនោះបានដឹកជញ្ជូនថ្នាំញៀន មេតំហ្វេតាមីនក្រាមម្ស៉ៅចំនួន១២០គីឡូក្រាមក្នុងរថយន្តក្រុងនោះ។
អាជ្ញាធរបានអោយដឹងថាបុរសទាំងបីនាក់នោះសុទ្ធសឹងតែជាកសិករ ដោយពីរនាក់ជាអ្នកខេត្តស្ទឹងត្រែង និងមា្នក់ទៀតជាអ្នកខេត្តព្រះវិហារ។
លោកនាយឧត្តមសេនីយ៍ មាស វិរិទ្ធ ប្រាប់វីអូឌីថានេះជាលើកទី១ហើយដែលអាជ្ញាធរចាប់បានគ្រឿងញៀនក្នុងចំនួនដ៏ច្រើនបែបនេះ។
នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន
ការចាប់រឹបអូសគ្រឿងញៀន១២០គីឡូក្រាមនេះ ក៏ស្ថិតនៅក្នុងថ្ងៃតែមួយដែលអាជ្ញាធរជាតិបានធ្វើពិធីអបអរសាទរទិវាប្រយុទ្ធប្រឆាំងគ្រឿងញៀនលើកទី១៩ និងបានដុតបំផ្លាញគ្រឿងញៀនចំនួន ៦៤គីឡូក្រាមនៅមជ្ឈមណ្ឌលសន្និបាតនិងពិព័រណ៍កោះពេជ្រដែរ។
បើយោងតាមទិន្នន័យអាជ្ញាធរជាតិប្រយុទ្ធប្រឆាំងគ្រឿងញៀនគិតពីថ្ងៃទី១ ខែមករា ដល់ថ្ងៃទី២៦ ខែមិថុនា ឆ្នាំ២០១៨ បានបង្ហាញថា ករណីដែលចាប់មានចំនួនសរុប ៣,៧៥៥ករណី ក្នុងនោះចាប់បានសារធាតុញៀនគ្រប់ប្រភេទទំងន់ ១១៨គីឡូក្រាម ក្នុងនោះមានកញ្ឆាក្រៀម ២៣គីឡូក្រាម។ ចំណែកសម្ភារៈចាប់យកបានមានរថយន្ដ ៣៥គ្រឿង ម៉ូតូ ៨៥៣ គ្រឿង ទូរស័ព្ទ២៣០៦គ្រឿង ជញ្ជីង ១៨០គ្រឿង អាវុធខ្លី ៩ដើម អាវុធ ៩ដើម។ ចំនួនខាងលើនេះមិនទាន់រាប់បញ្ចូលករណីថ្នាំញៀនចំនួន ១២០គីឡូក្រាមដែលអាជ្ញាធរចាប់បានកាលពីថ្ងៃអង្គារ ទី២៦ ខែមិថុនា នេះទេ៕
រាយការណ៍ដោយ សត្យា និងថុន ផល្លាវត្តី