អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានស្នើឲ្យសហគមន៍អន្តរជាតិស៊ើបអង្កេតនិងដាក់ទណ្ឌកម្មលើឧត្តមសេនីយ៍ជាន់ខ្ពស់១២នាក់ នៃកងកម្លាំងប្រដាប់អាវុធជាតិ ដែលអង្គការនេះរកឃើញថាជាខ្នងបង្អែកដ៏រឹងមាំនៃការរក្សាអំណាចរបស់លោក ហ៊ុន សែន និងការរំលោភសិទ្ធិមនុស្សធ្ងន់ធ្ងរចាប់តាំងពីឆ្នាំ១៩៧៥។
ក្នុងរបាយការណ៍ចេញផ្សាយថ្ងៃទី២៧មិថុនាដែល VOD ទើបទទួលបាននៅថ្ងៃនេះ អង្គការឃ្លាំមើលសិទ្ធិមនុស្ស ដែលមានទីតាំងនៅសហរដ្ឋអាមេរិក បានបង្ហាញឈ្មោះឧត្តមសេនីយ៍កម្ពុជាចំនួន១២នាក់ ដែលថា ជាឆ្អឹងខ្នងបង្អែកនៃរបបនយោបាយផ្តាច់ការរំលោភសិទ្ធិមនុស្សដែលធ្វើឲ្យការគ្រប់គ្រងអំណាចរបស់លោក ហ៊ុន សែន កាន់តែផ្តាច់ការ។
ឧត្តមសេនីយ៍ទាំង១២រូបនោះរួមមាន អគ្គមេបញ្ជាការនៃកងយោធពលខេមរភូមិន្ទ លោក ប៉ុល សារឿន, អគ្គមេបញ្ជាការរងកងទ័ព លោក គន់ គីម, មេបញ្ជាការកងរាជអាវុធហត្ថលើផ្ទៃប្រទេសលោក សៅ សុខា, មេបញ្ជាការរងកងរាជអាវុធហត្ថលើផ្ទៃប្រទេស លោក រ័ត្ន ស្រ៊ាង, មេបញ្ជាការភូមិភាគ៤ លោក ជា ម៉ន, មេបញ្ជាការភូមិភាគ៥ លោក ប៊ុន សេង, មេបញ្ជាការភូមិភាគទី២ លោក ជឿន សុវន្ថា, នាយរងសេនាធិការចម្រុះនិងជាមេបញ្ជាការកងពលតូចពិសេសឆត្រយោង៩១១ លោក ចាប ភក្តី, អគ្គស្នងការនគរបាលជាតិលោក នេត សាវឿន, អគ្គស្នងការរងនគរបាលជាតិលោក សុខ ផល លោក ម៉ក់ ជីតូ និងលោក ជួន សុវណ្ណ។
របាយការណ៍ដដែលនោះ ក៏បានបង្ហាញថា អ្នកទាំង១២នាក់នោះ សុទ្ធតែជំពាក់គុណបុណ្យលោកនាយករដ្ឋមន្ត្រី ហ៊ុន សែន ហើយមានទំនាក់ទំនងជាមួយលោក ហ៊ុន សែន រាប់ទស្សវត្សន៍មកហើយ។
អង្គការសិទ្ធិមនុស្សនេះ បានសរសេរបន្តថា ប្រវត្តិរបស់អ្នកទាំង១២រូបនេះ បានពាក់ព័ន្ធជាច្រើនក្នុងអំពើហិង្សា នយោបាយរបស់រដ្ឋកម្ពុជា ដែលរាប់ទាំងឃាតកម្មនយោបាយសំដៅគណបក្សហ៊្វុនស៊ិនប៉ិច និងអ្នកនយោបាយប្រឆាំងអហិង្សាផ្សេងទៀត ហើយកំណត់ទិសដៅធានាឲ្យគណបក្សប្រជាជនកម្ពុជា ឈ្នះក្នុងការបោះឆ្នោតដែលរៀបចំដោយអ៊ុនតាក់នៅឆ្នាំ១៩៩៣។
អង្គការឃ្លាំមើលសិទ្ធិមនុស្សអន្តរជាតិ (Human Rights Watch)
អង្គការអន្តរជាតិមួយនេះ បានស្នើដល់សហគមន៍អន្តរជាតិ ជាពិសេសអង្គការសហប្រជាជាតិគាំទ្រនិងដាក់សម្ពោធទៅកាន់រដ្ឋាភិបាលកម្ពុជាក្នុងការស៊ើបអង្កេតលើបុគ្គល ដែលមានឈ្មោះក្នុងរបាយការណ៍នេះ និងដាក់ទណ្ឌកម្មតាមដែលអាចធ្វើទៅបានផងដែរ។
នៅថ្ងៃនេះផងដែរ ក្រសួងការពារជាតិ បានចេញសេចក្តីថ្លែងការណ៍ច្រានចោលនិងថ្កោលទោសរបាយការណ៍របស់អង្គការឃ្លាំមើលសិទ្ធិមនុស្សអន្តរជាតិមួយនេះ។ ក្រសួងការពារជាតិចោទថា វាជារបាយការណ៍ប្រឌិត ញុះញង់ចោទប្រកាន់ដោយគ្មានមូលដ្ឋាន និង មិនសមហេតុផលមកលើមន្ត្រីជាន់ខ្ពស់ទាំង១២រូបរបស់កម្ពុជា។
សេចក្តីថ្លែងការណ៍ច្រានចោលនិងថ្កោលទោស របស់ក្រសួងការពារជាតិ
ប្រាប់វីអូឌីនៅថ្ងៃនេះ អគ្គមេបញ្ជាការកងយុទ្ធពលខេមរភូមិន្ទ លោក ប៉ុល សារឿន បដិសេធឆ្លើយតបចំពោះការចោទប្រកាន់របស់របាយការណ៍នេះ ដោយថា អង្គការនេះធ្វើរបាយការណ៍អ្វីស្រេចតែចិត្តរបស់ខ្លួន។
លោកថា៖ «អត់មានឆ្លើយតបអីទេ! វាថាអីថាតែវាទៅ » ។
ចំណែក អគ្គស្នងការរងនគរបាលជាតិ និង ជាអគ្គលេខាធិការអាជ្ញាជាតិប្រយុទ្ធប្រឆាំងគ្រឿងញៀន លោក ម៉ក់ ជីតូ បានច្រានចោលការចោទប្រកាន់របស់អង្គការនេះ និងថា ជាការប្រឌិតតាមចិត្តរបស់ខ្លួនដើម្បីបង្ខូចក្តេរិ៍ឈ្មោះរបស់លោកនិងឧត្តមសេនីយផ្សេងទៀត។
លោកថា៖ «គាត់ថា ទៅស្រេចតែចិត្តគាត់ទៅគាត់មានសិទ្ធិថា ដល់យើងមិនដឹងថាម៉ិចឲ្យគាត់វិញ បើនៅស្រុកណានោះ។ បើនៅស្រុកខ្មែរ ប្តឹងទៅតុលាការឲ្យរកខុសត្រូវហើយ។ […] ខ្ញុំជឿថាអន្តរជាតិគេ មិនចេះតែជឿគាត់ទេ ព្រោះរបាយការណ៍គាត់ស្រេចតែគាត់ថាអញ្ចឹង នឹកឃើញស្អប់អ្នកណាថាឲ្យអ្នកហ្នឹងទៅ »។
ប្រធានក្រុមអ្នកវិភាគវ័យក្មេង លោក ហង្ស វិទូ យល់ថារបាយការណ៍របស់អង្គការសិទ្ធិមនុស្សនេះ មិនមែនជាការស៊ើបអង្កេត ដែលលេងសើចនោះទេ ខណៈលោកបារម្ភថា នឹងមានឥទ្ធិពលបន្ថែមដល់ការសម្រេចចិត្តរបស់អន្តរជាតិចំពោះកម្ពុជា។
កាលពីថ្ងៃទី១២ខែមិថុនា រដ្ឋាភិបាលអាមេរិកបានបង្កកទ្រព្យសម្បត្តិ លោក ហ៊ីង ប៊ុនហៀង ដោយថា មេកងអង្គរក្សរូបនេះ បានជាប់ពាក់ព័ន្ធនឹងការរំលោភបំពានសិទ្ធិមនុស្សយ៉ាងធ្ងន់ធ្ងរ និងប្រព្រឹត្តអំពើពុករលួយ។
ការដាក់ទណ្ឌកម្មនេះ ដោយផ្អែកលើច្បាប់សិទ្ធិមនុស្សហ្គូប៊ល ម៉ាញីតស្គី (Global Magnitsky) ដែលបង្កើតឡើងកាលពីឆ្នាំ២០១៦ ដែលអនុញ្ញាតឲ្យអាមេរិកដាក់ទណ្ឌកម្មលើជនណាដែលប្រព្រឹត្តអំពោះពុករលួយនិងរំលោភសិទ្ធិមនុស្ស៕
