មន្ត្រីនគរបាលជាន់ខ្ពស់កម្ពុជា បានឲ្យដឹងថា មនុស្សជិត ៨ពាន់នាក់ ត្រូវបានចាប់ខ្លួនពាក់ព័ន្ធនឹងបទល្មើសគ្រឿងញៀននៅទូទាំងប្រទេស ប៉ុន្តែ ថា បទល្មើសគ្រឿងញៀនបានថយចុះ នៅក្នុងឆមាសទី១ដើមឆ្នាំនេះ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ បានប្រាប់វីអូឌីនៅថ្ងៃនេះថា បទល្មើសគ្រឿងញៀន ៣៩៨៩ករណី ត្រូវបានសមត្ថកិច្ចបង្ក្រាបបាននៅទូទាំងប្រទេស ចាប់ពីថ្ងៃទី០១ ខែមករា រហូតដល់ចុងខែមិថុនាកន្លងមកនេះ ដោយឃាត់ខ្លួនមនុស្សដល់ទៅ ៧៩១៧នាក់ ដោយជាង ៥៨ភាគរយ ត្រូវបានចាប់ខ្លួនក្រោមការសង្ស័យថា បានជួញដូរគ្រឿងញៀន ខណៈដែលសមត្ថកិច្ចរឹបអូសបានគ្រឿងញៀនសរុបដល់ទៅ ២៤៤គីឡូក្រាម និងកញ្ឆាក្រៀម ២៥គីឡូក្រាម។
មន្ត្រីនគរបាលរូបនេះ បានអះអាងថា ទំហំបទល្មើសគ្រឿងញៀន បានថយចុះពី ៤៣៣១ករណីនៅឆមាសទី១ឆ្នាំមុន មកនៅត្រឹម ៣៩៨៩ករណីនៅឆមាសទី១ឆ្នាំ២០១៨នេះ ឬថយចុះប្រហែល ១៤ភាគរយ ខណៈដែលចំនួនជនល្មើសដែលត្រូវបានចាប់ខ្លួនជាប់ពាក់ព័ន្ធនឹងគ្រឿងញៀន ក៏បានថយប្រហែល ២៥ភាគរយ ឬថយចុះពីចំនួន ៩៦៩៤នាក់នៅឆមាសទី១ឆ្នាំមុន មកនៅត្រឹមចំនួន ៧៩១៧នាក់។
ទោះជាយ៉ាងណា បរិមាណគ្រឿងញៀនដែលត្រូវរឹបអូសបាននោះ បានកើនឡើង បន្ទាប់ពីសមត្ថកិច្ចចាប់បានគ្រឿងញៀនដល់ទៅ ១២០គីឡូក្រាម ដែលត្រូវបានរកឃើញនាំចូលពីប្រទេសឡាវតាមព្រំដែនច្រកត្រពាំងក្រៀល កាលពីថ្ងៃទី២៦ ខែមិថុនាកន្លងមកនេះ។
លោក មាស វិរិទ្ធ ក៏បានប្រាប់វីអូឌីបន្ថែមថា អ្នកជាប់ពន្ធនាគារពាក់ព័ន្ធបទល្មើសគ្រឿងញៀន បានកើនដល់ទៅដល់ជាង ៥៧% គិតមកដល់បច្ចុប្បន្ននេះ ខណៈដែលលោកថា អាជ្ញាធរបានក៏បានពង្រីកពន្ធនាគារបន្ថែម ដើម្បីទុកជម្លៀសអ្នកជាប់ពន្ធនាគារពីកន្លែងណាដែលចង្អៀតទៅកន្លែងទូលាយ ហើយចំពោះពួកប្រព្រឹត្តបទល្មើសគ្រឿងញៀន គឺនៅតែបន្តទោសនៅពន្ធនាគាររហូតដល់ចប់។
បទល្មើសគ្រឿងញៀន ត្រូវបានសមត្ថកិច្ចបង្ក្រាបបានរៀងរាល់ថ្ងៃកាលពីឆ្នាំមុន ដោយឃាត់ខ្លួនជនសង្ស័យដល់ទៅជាង ១ម៉ឺន ៧ពាន់នាក់ នៅក្នុងយុទ្ធនាការបង្ក្រាបគ្រឿងញៀននៅឆ្នាំដំបូងរបស់រដ្ឋាភិបាល។
បញ្ហាគ្រឿងញៀន ត្រូវបានរកឃើញនៅក្នុងរបាយការណ៍ស្ទង់មតិមួយកាលពីឆ្នាំ២០១៦ថា ជាចំណុចខ្សោយមួយរបស់រដ្ឋាភិបាលដឹកនាំដោយគណបក្សប្រជាជនកម្ពុជា និងលោកនាយករដ្ឋមន្ត្រី ហ៊ុន សែន៕
