យ៉ាងហោចណាស់មនុស្ស ៣៥នាក់ ត្រូវបានសម្លាប់ ហើយមនុស្ស ១២៧នាក់ទៀត បានរងរបួសនៅក្នុងគ្រោះថ្នាក់ចរាចរណ៍ត្រឹមតែមួយសប្ដាហ៍ដើមខែកក្កដានេះ ក្នុងនោះមនុស្ស ៣នាក់ បានស្លាប់នៅថ្ងៃដំបូងនៃយុទ្ធនាការឃោសនាបោះឆ្នោតកាលពីថ្ងៃម្សិលមិញនេះ។
របាយការណ៍នគរបាលចរាចរណ៍ បានឲ្យដឹងថា គ្រោះថ្នាក់ចរាចរណ៍ដល់ទៅ ៥៥លើក បានកើតឡើងនៅទូទាំងប្រទេសចាប់ពីថ្ងៃទី១ ដល់ថ្ងៃទី៧ ខែកក្កដានេះ ដោយបានសម្លាប់មនុស្សយ៉ាងតិច ៣៥នាក់ ហើយមនុស្ស ១២៧នាក់បានរងរបួស ក្នុងនោះរងរបួសធ្ងន់ ៦៥នាក់។
របាយការណ៍ដដែលនេះ ក៏បានបង្ហាញផងដែរថា មនុស្ស ៣នាក់បានស្លាប់ និង ១១នាក់ទៀត បានរងរបួស នៅក្នុងគ្រោះថ្នាក់ចរាចរណ៍កាលពីថ្ងៃម្សិលមិញនេះ ដែលជាថ្ងៃដំបូងនៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី ៦។
បើតាមរបាយការណ៍នគរបាលចរាចរណ៍ អត្រាគ្រោះថ្នាក់ចរាចរណ៍ បានកើនឡើង ៦ភាគរយ ពោលគឺបានកើនឡើងពីចំនួន ៥២លើកកាលពីសប្ដាហ៍ទី១ខែមិថុនា មកដល់ចំនួន ៥៥លើកនៅក្នុងសប្ដាហ៍ទី១ខែកក្កដានេះ។
រីឯតួលេខអ្នកស្លាប់វិញ បានកើនឡើងដល់ទៅ ៣០ភាគរយ ខណៈដែលចំនួនអ្នករងរបួសបានកើនឡើងខ្ពស់រហូតដល់ ១១២ភាគរយឯណោះ បើធៀបទៅនឹងតួលេខគ្រោះថ្នាក់ចរាចរណ៍នៅសប្ដាហ៍ទី១ដើមខែមិថុនាកន្លងមកនេះ។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ លោក រុន រ័ត្នវាសនា បានប្រាប់កាលពីថ្ងៃទី០៤កក្កដាថា គ្រោះថ្នាក់ចរាចរណ៍ បានកើតឡើងចំនួន ១៩៦៣លើកនៅទូទាំង ដោយបានសម្លាប់មនុស្សដល់ទៅ ៩៣០នាក់ និងបណ្ដាលឲ្យមនុស្ស ២៣៩៩នាក់រងរបួស នៅក្នុងឆមាសទី១ដើមឆ្នាំ២០១៨នេះ។
ប៉ុន្តែ មន្ត្រីនគរបាលចរាចរណ៍រូបនេះ បានឲ្យដឹងថា តួលេខគ្រោះថ្នាក់ចរាចរណ៍នៅក្នុងរយៈពេល ៦ខែដើមឆ្នាំនេះ បានថយចុះ ១៤ភាគរយ បើធៀបទៅនឹងតួលេខក្នុងរយៈពេលដូចគ្នាកាលពីឆ្នាំមុន ដោយបានថយចុះពីចំនួន ១៩០៧លើកកាលពីឆមាសទី១ឆ្នាំ២០១៧ មកនៅត្រឹមតែ ១៦៣៣លើកនៅក្នុងឆមាសទី១ឆ្នាំ២០១៨នេះ។
ទោះជាយ៉ាងណា លោកបានឲ្យដឹងបន្ថែមថា ចំនួនអ្នកស្លាប់បានថយចុះតែម្នាក់គត់ ខណៈដែលចំនួនមនុស្សរងរបួស បានថយចុះយ៉ាងច្រើនរហូតដល់ ៦០៧នាក់ ឬបានថយចុះរហូតដល់ទៅជាង ២០ភាគរយ៕
