គ្រោះធម្មជាតិទឹកជំនន់និងបាក់ដីនៅប្រទេសជប៉ុនដែលកើតឡើងកាលពីថ្ងៃ៥ កក្កដា និងចប់ទៅវិញកាលពីថ្ងៃទី៩ខែកក្កដា ឆ្នាំ២០១៨នេះ ជាគ្រោះមហន្តរាយអាក្រក់ជាងគេក្នុងកំឡុងពេល៣៥ឆ្នាំមកនេះសំរាប់ប្រទេសជប៉ុន។
យោងតាមសារពត៌មាន Reuters របស់អង់គ្លេស ចុះផ្សាយពីថ្ងៃទី១១បានអោយដឹងថា លោក Shinzo Abe នាយករដ្ឋមន្ត្រីជប៉ុននិយាយទៅការអ្នកយកពត៌មានថា រដ្ឋាភិបាលជប៉ុននឹងធ្វើគ្រប់យ៉ាងដែលអាយជួយទៅដល់អ្នកដែលនៅរស់រានមានជីវិត។
លោក Shinzo Abe នាយករដ្ឋមន្ត្រីជប៉ុន
សារព័ត៌មានដដែលបានបន្តអោយដឹងថា រដ្ឋាភិបាលលោក Shinzo Abe បានត្រៀមនូវថវិកាចំនួន ៤រយពាន់លានយ៉េន ប្រមាណជាជាង ៣,៦ពាន់លានដុល្លារសំរាប់ការស្តារឡើងវិញពីការបំផ្លិចបំផ្លាញរបស់គ្រោះទឹកជំនន់និងបាក់ដីនេះ។
តាមការចុះផ្សាយរបស់សារពត៌មាន the Japan Times ចេញផ្សាយកាលពីថ្ងៃទី២២ ខែកក្កដា គ្រោះទឹកជំនន់និងបាក់ដីនៅប្រទេសជប៉ុន បានសម្លាប់មនុស្ស ២២៤ ហើយគេប៉ាន់ស្មានថាការបំផ្លាញរបស់មហន្តរាយមួយនេះ បើគិតជាថវិការអស់ប្រមាណជាជាង ១ពាន់លានដុល្លារអាមេរិច។
ប្រភពដដែលបានបន្តថា រដ្ឋាភិបាលជប៉ុនបានផ្តល់ជាជំនួយសាធារណៈដល់តំបន់ដែលទទួលរងគ្រោះទាំងនោះ។ ចំពោះការងារសាងសង់ឡើងវិញនូវហេដ្ឋារចនាសម្ព័ន្ធទាំងឡាយ រដ្ឋាភិបាលប្រទេសនេះនឹងបញ្ចេញប្រាក់ទំនុកបម្រុងពិសេសក្រោមច្បាប់ស្តីពីជំនួយសាធារណៈពិសេសសម្រាប់ដោះស្រាយបញ្ហាគ្រោះមហន្តរាយ។
តាមសារព័ត៌មាន Mainchi របស់ជប៉ុនដែលចុះផ្សាយកាលពីថ្ងៃទី១៦នេះ កញ្ចប់ថវិកាជំនួយឧបត្ថម្ភដំបូងរបស់រដ្ឋាភិបាលជប៉ុននឹងផ្តល់នូវជាការជួយសម្រួលជាថវិកាសំរាប់ជំនួញណាដែលបំផ្លាញដោយទឹកជំនន់ដោយផ្តល់នូវប្រាក់កម្ចីដោយគ្មានការប្រាក់ទៅដល់ ក្រុមហ៊ុនកសិកម្ម រុក្ខាប្រមាញ់ និងនេសាទជាដើម ចំណែកឯក្រុមហ៊ុនខ្នាតតូចអាចមានពេលវេលាបន្ថែមក្នុងការសងបំណុលរបស់ពូកគេ។
សារព័ត៌មាន ASIAN REVIEW កាលពីថ្ងៃទី២០បានចុះផ្សាយពីគំរោងជួសជុលឡើងវិញនូវហេដ្ឋារចនាសម្ព័ន្ធនិងការខូចផ្សេងៗទៀត។ សមត្ថកិច្ចប៉ានស្មានការចំណាយទៅលើការជួសជុល ស្ពាន ថ្នល់ និងផ្លូវរថភ្លើងជាដើមនោះ គិតជាទឹកប្រាក់ប្រមាណ ២,៣៩ ពាន់លានដុលា្លរ ។ ចំណែកឯ ៨៥លានដុល្លារផ្សេងទៀតត្រូវការសំរាប់ ស្តារដីចំការ ក៏ដូចជាផ្លូវថ្នល់ផ្សេងៗទៀត និង ២លានដុល្លារ សំរាប់ជួសជុលឃ្លាំងស្តុកនិងកន្លែងផ្សេងទៀតដែលជាកម្មសិទ្ធិរបស់សហករណ៍កសិកម្មនិងនេសាទ។
ខណៈដែលផលប៉ះពាល់នៃគ្រោះទឹកជំនន់នៅមិនទាន់អាចស្តារឡើងវិញបានផង ប្រទេសជប៉ុនពេលកំពុងតែជួបរលកកម្ដៅដែលបានកើនឡើងខ្លាំងរហូតដល់៤០អង្សារសេ ដែលបណ្ដាលឲ្យមានអ្នកស្លាប់ ៧៧នាក់ និងជាង ៣០០០០នាក់ ទៀតបញ្ជូនទៅមន្ទីរពេទ្យគិតចាប់ពីថ្ងៃទី៩ដល់ថ្ងៃទី២២កក្កដា។ នេះបើតាមការចុះផ្សាយរបស់ទីភ្នាក់ងារសារព័ត៌មានជប៉ុន Kyodo ដែលចេញផ្សាយនៅថ្ងៃនេះ។
