ទំនប់វារីអគ្គិសនី មួយនៅឡាវបានបាក់កាលពីថ្ងៃទី២៣ខែកក្កដាកន្លងទៅដែលបណ្ដាលឲ្យប៉ះពាល់ដល់ពលរដ្ឋឡាវរាប់ពាន់នាក់ ហើយវាក៏កំពុងតែជះឥទ្ធិពលដល់ខេត្តស្ទឹងត្រែងរបស់ប្រទេសកម្ពុជាផងដែរ។ ទំនប់ទឹកដែលបាក់នេះមានឈ្មោះថា សេពានសេណាមណយស្ថិតនៅក្នុងតំបន់ខ្ពស់រាបនៃខេត្តអត្តពើ។
យោងតាមសារព័ត៌មានBBCដែលចុះផ្សាយនៅថ្ងៃនេះ ពលរដ្ឋឡាវចំនួន២០នាក់ត្រូវបានគេបញ្ជាក់ថាបានបាត់បង់ជីវិតនិងមនុស្សរាប់រយនាក់ទៀតបានបាត់ខ្លួនក្នុងសោធនាដកម្មបាក់ទំនប់នេះ។
តាមគេហរទំព័ររបស់ក្រុមហ៊ុនថាមពលសេពានសេណាមណយដែលកំពុងអនុវត្តន៍ការសាងសង់ទំនប់វាវីនេះ សេពានសេណាមណយនឹងអាចផលិតអគ្គិសនីបាន៤១០មេហ្គាវ៉ាត់ ហើយគ្រោងនឹងបើកឲ្យដំណើរការនៅឆ្នាំ២០១៩។ តាមប្រភពដដែល ក្រុមហ៊ុនថាមពលសេពានសេណាមណយដែលទទួលធ្វើគម្រោងវារីអគ្គិសនីនេះជាក្រុមហ៊ុនដែលសហការគ្នារវាងក្រុមហ៊ុនចំនួនបួនដែលក្នុងនោះមានពីរជារបស់កូរ៉េ មួយជារបស់ថៃ និងក្រុមហ៊ុនមួយទៀតរបស់រដ្ឋឡាវ។
ប្រភពដដែលបន្តឲ្យដឹងថាអគ្គិសនីដែលផលិតបានក្នុងគម្រោងសេពានសេណាមណយនេះនឹងត្រូវលក់ទៅអោយថៃចំនួន៩០ភាគរយ ហើយ១០ភាគរយទៀតឡាវទុកសម្រាប់ប្រើប្រាស់ក្នុងស្រុក។
មេដឹកនាំឡាវតែងតែអះអាងថាប្រទេសខ្លួនមានមហិច្ឆតាក្លាយជាអ្នកផលិតនិងចែកចាយអគ្តិសនីធំជាងគេនៅអាស៊ីអាគ្នេយ៍។ យោងតាមការចុះផ្សាយរបស់ក្រសួងថាមពលនឹងរ៉ែឡាវ ប្រទេសឡាវប្ដេជ្ញាថានៅឆ្នាំ២០២០ ខ្លួននឹងប្រែក្លាយជាប្រទេសចែកចាយអគ្គិសនីនៅអាស៊ាន។ តើការបាក់ទំនប់វារីអគ្គិសនីសេពានសេណាមណយ អាចបញ្ឈប់មហិច្ឆតារបស់ឡាវទេ?
ឡាវជាប្រទេសដែលមិនមានព្រំដែនជាប់សមុទ្រហើយក៏ពុំសូវសម្បូរធនធានធម្មជាតិនានាប៉ុន្មានដែ ប៉ុន្តែប្រទេសនេះមានលក្ខណៈអំណោយផលដល់ការផលិតថាមពលវារីអគ្គិសនីដោយសារតែប្រទេសនេះមានទន្លេមេគង្គហូរកាត់ដែលបង្កើតបានជាល្បាក់ទឹកជាច្រើនកន្លែង។ តាមការចុះផ្សាយរបស់ភ្នាក់ងារសារព័ត៌មានឡាវ នៅឆ្នាំ២០១៧ ឡាវ មានទំនប់វារីអគ្គិសនីចំនួន៤៦កំពុងដំណើរការ ហើយ៥៤ ទៀតកំពុងតែសាងសង់។ ប្រភពដដែលបន្តឲ្យដឹងថា៨៥ភាគរយនៃអគ្គិសនីដែលផលិតបាននឹងត្រូវលក់អោយប្រទេសជិតខាង។
សារព័ត៌មាន Bloomberg បានចុះផ្សាយពីការព្យាករណ៍សេដ្ឋកិច្ចរបស់ប្រទេសឡាវថា ប្រទេសនេះនឹងនៅតែរក្សាកំណើន៧ភាគរយក្នុងមួយឆ្នាំរហូតដល់ឆ្នាំ២០១៩។ តាមប្រភពដដែល មូលហេតុធំមួយដែលជម្រុញឲ្យមានកំណើននេះគឺបានមកពីវិស័យថាមពល។ សារព័ត៌មាន THE ASEAN POST បានផ្សាយកាលពីខែកុម្ភៈថា ក្នុងរយៈពេល៦ខែដើមឆ្នាំ២០១៧កន្លងទៅ ឡាវបានលក់ អគ្គិសនីទៅអោយប្រទេសជិតខាងរួមមានកម្ពុជា ថៃ និងវៀតណាមបានប្រមាណជាជិត៦០០លានដុល្លា។
មហិច្ឆិតាចង់ក្លាយខ្លួនជាអ្នកផ្គត់ផ្គង់អគ្គិសនីនាំមុខនៅអាស៊ីអាគ្នេយ៍របស់ឡាវត្រូវបាន សកម្មជន បរិស្ថានជាច្រើនរិះគន់ប្រទេសនេះ។ ពួកគេបានលើកឡើងពីផលប៉ះពាល់នានាដែលអាចកើតមានចំពោះបរិស្ថាន ក៏ដូចជាសហគមន៍ដែលរស់នៅតាមតំបន់ទាំងនោះជាពិសេសតាមតំបន់ទន្លេមេគង្គ និងទន្លេនានាដែលជាដៃទន្លេមេគង្គដែលយកមកធ្វើជាទំបន់វារីអគ្គិសនី។
ទំនប់វាវីអគ្គិសនីទាំងមិនត្រឹមតែប៉ះពាល់ត្រឹមតែសហគមន៍ឡាវប៉ុណ្ណោះទេ វាក៏ប៉ះពាល់ដល់កម្ពុជានិងវៀតណាមផងដែរព្រោះប្រទេសទាំងពីរនេះស្ថិតនៅភាគខាងក្រោមនៃទន្លេមេគង្គ។ ប៉ុន្តែទោះជាយ៉ាងណាក៏ដោយក៏រដ្ឋាភិបាលឡាវហាក់មិនចាប់អារម្មណ៍ទៅនឹងការព្រួយបារម្ភខាងលើនេះទេ។
ការបាក់ទំនប់វារីអគ្គិសនីសេពានសេណាមណយ ប្រហែលជាមិនអាចបញ្ឈប់មហិច្ឆិតារបស់ឡាវក្នុងការប្រែក្លាយខ្លួនជាមេអគ្គិសនីនៅអាស៊ាននោះទេ។ សោកនាដកម្មនៃការបាក់ទំនប់វារីអគ្គិសនីសេពានសេណាមណយ ជាមេរៀនមួយរដ្ឋាភិបាលឡាវត្រូវមានការប្រុងប្រយ័ត្នចំពោះគុណភាពទំនប់។
ដូចអ្វីដែលអ្នកស្រី ម៉ូរីន ហារីស អ្នកជំនាញទំនប់វារីអគ្គិសនីឡាវនៃអង្គការទន្លេអន្តរជាតិ ប្រាប់សារព័ត៌មានAFP កាលពីម្សិលមិញថា៖«សំនួរសំខាន់ដែលត្រូវសួរនៅពេលនេះគឺស្ដង់ដានិងសុវត្ថិភាពរបស់ទំនប់វារីអគ្គិសនីរបស់ឡាវ ក៍ដូចជាដំណោះស្រាយសមស្របនៅពេលមានការប្រែប្រួល និងហានិភ័យអាកាសធាតុ។
