យោងទៅតាមវេបសាយ KYODO NEWS ដែលបានចេញផ្សាយកាលពីម្សិលមិញនេះបានអោយដឹងថា ក្រោយពីគ្រោះទឹកជំនន់ដែលបានកើតឡើងកាលពីប៉ុន្មានសប្តាហ៍មុន ប្រទេសជប៉ុនកំពុងទទួលរងកម្តៅក្តៅខ្លាំងដែលបង្ករឲ្យមានមនុស្សស្លាប់យ៉ាងតិចណាស់៧៧នាក់ និងជាង៣០០០០នាក់ទៀតត្រូវបានបញ្ជូនទៅមន្ទីរពេទ្យ។
ប្រទេសជប៉ុនបានប្រកាសថាវាជាគ្រោះធម្មជាតិ ព្រោះកម្តៅបានឡើងដល់៤០អង្សារនៅទីក្រុងតូក្យូ និង៤១អង្សារនៅខេត្តគូម៉ាកាយ៉ា(Kumagaya)ដែលជាកម្តៅខ្ពស់បំផុតក្នុងប្រវត្តិសាស្រ្តជប៉ុន។ ការឡើងកម្តៅនេះបានធ្វើអោយប្រទេសជប៉ុនលុបចោលនូវកម្មវិធីកីឡា និងកម្មវិធីខាងក្រៅផ្សេងទៀតដែលមានទាំងកម្មវិធីបុណ្យជាតិរបស់ខ្លួនផងដែរ។
យោងតាមវេបសាយBBC បានសរសេរដែរថាក្នុងចំណោមអ្នកដែលស្លាប់ដោយសារកម្តៅនេះភាគច្រើនជាមនុស្សចាស់ ហើយធ្វើឲ្យសាលារៀនជាច្រើននឹងត្រូវពន្យារពេលវិសមកាលរដូវក្តៅរបស់ខ្លួនដើម្បីការពារសុវត្ថិភាពរបស់ខ្លួន។
ដើម្បីការពារខ្លួនពីកម្តៅ ប្រជាជនមួយចំនួនធំបាននាំគ្នាស្លៀកពាក់ជិតៗ ដើរបាំងឆ័ត្រ ដាក់កូនកង្ហារតាមខ្លួននៅពេលចេញទៅក្រៅ ហើយមានប្រជាជននៅទីក្រុងខ្លះបាននាំគ្នាបាចទឹកតាមផ្លូវដើរសាធារណៈនិងទីកន្លែងផ្សេងៗទៀតដើម្បីកាត់បន្ថយកម្តៅរបស់វាផងដែរ។
