ចិនតែងតែរិះរកគ្រប់វិធីដើម្បីឲ្យពិភពលោកទទួលស្គាល់គោលការណ៍ចិនតែមួយ។ ចិនអនុវត្តន៍ទាំងវិធីត្រជាក់ និងវិធីក្ដៅដើម្បីឲ្យប្រទេសនានាទទួលយកគោលនយោបាយនេះ។
ទោះយ៉ាងណាក៏ដោយ ក៏ប្រទេសមួយចំនួនមិនបានគោរពតាមអ្វីដែលចិនចង់បានទាំងស្រុងដែរ ជាក់ស្ដែងគឺប្រទេសវៀតណាម។ ថ្វីត្បិតតែគោលនបាយការបរទេសរបស់វៀតណាមទទួលស្គាល់ចិនតែមួយក៏ពិតមែន ប៉ុន្តែការអនុវត្តជាក់ស្ដែងហាក់មិនដូចអ្វីដែលប្រទេសនេះប្ដេជ្ញានោះទេ។
ជាក់ស្ដែងកាលពីពេលថ្មីៗនេះ វៀតណាមបានអនុញ្ញាតឲ្យក្រុមហ៊ុនតៃវ៉ាន់មួយចំនួនបង្ហូតទង់ជាតិ តៃវ៉ាន់នៅរោងចក្ររបស់ខ្លួន។ តាមការចុះផ្សាយរបស់សារព័ត៌មាន South China Morning Post របស់ហុងកុង វៀតណាមបានអនុញ្ញាតឲ្យក្រុមហ៊ុនតៃវ៉ាន់ទាំងនោះ ប្រើទង់ជាតិតៃវ៉ាន់គឺដើម្បីបែងចែកឲ្យច្បាស់ថាវាជាក្រុមហ៊ុនរបស់តៃវ៉ាន់ មិនមែនជារបស់ចិនប៉េកាំងទេ។
ប្រធានក្រុមហ៊ុនផលិតគ្រឿងសង្ហារឹមដ៏ធំនៅវៀតណាម លោក ឡូស៊ឺ វិន បានប្រាប់ទីភ្នាក់ងារសារព័ត៌មានតៃវ៉ាន់ Central News Agency ថាក្រុមហ៊ុនតៃវ៉ាន់ដែលមានទីតាំងនៅវៀតណាមបានស្នើសុំទៅអាជ្ញាធរវៀតណាមដាក់ទង់ជាតិតៃវ៉ាន់ជំនួសទង់ជាតិចិនដោយសារតែខ្លាចថាកម្មករនិងប្រជាជនវៀតណាម យល់ច្រលំថាក្រុមហ៊ុនទាំងនោះជារបស់ចិនប៉េកាំង។
តាមលោក ឡូស៊ឺ វិន ពេលប្រជាជនវៀតណាមធ្វើកុបកម្មប្រឆាំងនឹងចិនកាលពីឆ្នាំ២០១៤ កន្លងទៅក្រុមហ៊ុនលោកខាតអស់ប្រហែល១លានដុល្លារ។
កាលពីឆ្នាំ២០១៤ ប្រជាជនវៀតណាមរាប់រយនាក់បានធ្វើកុបកម្មប្រឆាំងនឹងចិនដោយសារតែចិន បានបើកអណ្ដូងប្រេងនៅសមុទ្រចិនខាងត្បូងដែលភាគីវៀតណាមចាត់ទុកថាជារបស់ខ្លួន។
ការស្នើរសុំទៅភាគីវៀតណាមដោយក្រុមហ៊ុនតៃវ៉ាន់ដោយសារតែខ្លាចមានរឿងបែបនេះកើតឡើងម្តងទៀត ព្រោះកាលពីចុងខែមិថុនាកន្លងទៅប្រជាជនវៀតណាមបានធ្វើបាតុកម្មប្រឆាំងនឹងចិនម្ដងទៀតជុំវិញរឿង វៀតណាមសម្បទានដីក្នុងតំបន់សេដ្ឋកិច្ចពិសេសរបស់ខ្លួនឲ្យទៅចិនក្នុងរយៈពេល៩៩ឆ្នាំ។
ការអនុញ្ញាតឲ្យក្រុមហ៊ុនតៃវ៉ាន់បង្ហូតទង់ជាតិរបស់ខ្លួនដោយភាគីវៀតណាមនេះហាក់ដូចជាផ្ទុយនឹងការប្ដេជ្ញារបស់វៀតណាមដែលទទួលស្គាល់គោលនយោបាយចិនតែមួយ។ សម្រាប់តៃវ៉ាន់ រឿងនេះជាជោគជ័យមួយរបស់ខ្លួន។ តៃវ៉ាន់ ហៅការអនុញ្ញាតរបស់វៀមណាមថាជារឿងមួយដែលនឹកស្មានមិនដល់ក្នុងប្រវត្តិសាស្ត្រ។
ទោះជាយ៉ាងណាក៏ដោយ ចិនក៏មិនព្រងើយកន្តើយឲ្យវៀតណាមធ្វើអ្វីស្រេចតែចិត្តដែរ។ អ្នកនាំពាក្យក្រសួងការបរទេសចិនលោក កឹង សុ័ង បានលើកឡើងកាលពីថ្ងៃទី៣០ខែកក្កដាថា ចិនប្រឆាំងដាច់ខាតនូវចលនាណាមួយដែលចង់បំបែកតៃវ៉ាន់ចេញពីចិន។
លោកបន្តថានៅលើពិភពលោកនេះមានចិនតែមួយប៉ុណ្ណោះ។ លោក ក៏បានបញ្ជាក់ផងដែរថា ចិនបានប្រាប់រួចរាល់ហើយដល់ភាគីវៀតណាម ហើយខាងវៀតណាមក៏បានបញ្ជាឲ្យក្រុមហ៊ុនតៃវ៉ាន់ទាំងនោះដកទង់ជាតិតៃវ៉ាន់វិញអស់ហើយដែរ។
ក្នុងរយៈពេលចុងក្រោយនេះចិនបានប្រើយុទ្ធសាស្រ្តនានាដើម្បីឲ្យតៃវ៉ាន់កាន់នៅឆ្ងាយពីប្រទេសដទៃ ហើយឲ្យប្រទេសនានាទទួលស្គាល់គោលនយោបាយចិនតែមួយដែលក្នុងនោះ រួមមានការបញ្ចុះបញ្ចូលប្រទេសនានាដែលធ្លាប់តែមានទំនាក់ទំនងការទូតជាមួយតៃវ៉ាន់ឲ្យងាកមករកចិនជាដើម។ កាលពីចុងខែមេសាកន្លងទៅ ចិន ក៏បានផ្ញើលិខិតមួយទៅកាន់ក្រុមហ៊ុនអាកាសចរណ៏បរទេសចំនួន៣៦ ដែលតម្រូវឲ្យក្រុមហ៊ុនអាកាសចរទាំងនោះដកចេញពីគេហទំព័ររបស់ខ្លួនដែលដាក់ថាតៃវ៉ាន់ជាប្រទេសមួយដាច់ដោយឡែកពីចិន៕
