អង្គការលើកលែងទោសអន្តរជាតិ Amnesty international រំឭកឲ្យរដ្ឋាភិបាលថ្មីរបស់កម្ពុជាត្រូវអនុវត្តឲ្យបាននូវកាតព្វកិច្ចក្នុងការគោរពសិទ្ធិមនុស្ស តាមការប្តេជ្ញាចិត្តរបស់ខ្លួននៅអង្គការសហប្រជាជាតិ។
សេចក្តីថ្លែងការណ៍ចុះថ្ងៃទី៦ខែសីហា Amnesty international បានលើកឡើងថា រដ្ឋមន្ត្រីការបរទេសកម្ពុជា លោក ប្រាក់ សុខុន អំឡុងខែកញ្ញាឆ្នាំ២០១៧ បានប្រាប់មហាសន្និបាតអង្គការសហប្រជាជាតិនៅទីក្រុងញូវយ៉កថា កម្ពុជាប្រកាន់ខ្ជាប់នូវគោលការណ៍ជាសកលស្តីពីសិទ្ធិមនុស្សជាមូលដ្ឋាន ហើយបានចោទប្រកាន់សហគមន៍អន្តរជាតិថាបានវាយប្រហារយ៉ាងអយុត្តិធម៌លើកម្ពុជា។
សេចក្តីថ្លែងការណ៍ដដែលលើកឡើងទៀតថា ដើម្បីបង្ហាញពីការប្តេជ្ញាចិត្តរបស់ខ្លួន ក្នុងការគោរពសិទ្ធិមនុស្ស រដ្ឋាភិបាលកម្ពុជាគួរដោះលែងអ្នកជាប់ឃុំមួយចំនូនមានដូចជា មេដឹកនាំគណបក្សប្រឆាំង លោកកឹម សុខា សកម្មជនដីធ្លី អ្នកស្រី ទេព វន្នី និង អតីតបុគ្គលិកវិទ្យុអាស៊ីសេរីពីរនាក់ ។
VOD មិនអាចទាក់ទងសុំការឆ្លើយតបពីអ្នកនាំពាក្យគណបក្សប្រជាជនកម្ពុជា លោក សុខ ឥសាន និង សួស យ៉ារ៉ា បានទេ។ ប៉ុន្តែមេដឹកនាំបក្សកាន់អំណាច និងជាអនាគតនាយករដ្ឋមន្ត្រីនៅអាណត្តិថ្មីនេះ លោក ហ៊ុន សែន សរសេរលើគេហទំព័រហ្វេសប៊ុក របស់លោកនាថ្ងៃអង្គារនេះថា រាជរដ្ឋាភិបាលថ្មីអាណត្តិទី៦នេះនឹងខិតខំប្រឹងប្រែងទ្វេរដងដើម្បីការរីកចម្រើនរបស់កម្ពុជា។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា អះអាងថា រដ្ឋាភិបាលកម្ពុជាជាប់កាតព្វកិច្ចអនុវត្តគោលការណ៍ប្រជាធិបតេយ្យនិងសិទ្ធិមនុស្សតាមកិច្ចព្រមព្រៀង អនុសញ្ញា និងកតិការសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ ជាមួយអង្គការសហប្រជាជាតិ។
មន្ត្រីសិទ្ធិមនុស្សរូបនេះ និយាយទៀតថា ការក្រើនរំឭករបស់អង្គការលើកលែងទោសអន្តរជាតិមួយនេះ ជាការលើកមុខមាត់រដ្ឋាភិបាលលើឆាកអន្តរជាតិទៅវិញទេ បើការធ្វើកំណែទម្រង់ដ៏ជឿទុកចិត្តមួយ ត្រូវបានធ្វើឡើងមែននោះ។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា
ទោះជាយ៉ាងណា អង្គការលើកលែងទោសអន្តរជាតិមួយនេះអះអាងថា ខ្លួនកំពុងជម្រុញរដ្ឋាភិបាលកម្ពុជាឲ្យអនុវត្តកាតព្វកិច្ចសិទ្ធិមនុស្ស របស់ខ្លួនទាំងស្រុងក្រោមសន្ធិសញ្ញាទាំងឡាយ ដែលកម្ពុជាបានចុះហត្ថលេខា និងជំរុញឲ្យរដ្ឋាភិបាលថ្មី ឈប់ប្រើប្រព័ន្ធច្បាប់មិនត្រឹមត្រូវ វាយប្រហារទៅលើអ្នកកាសែត អ្នកការពារសិទិ្ធមនុស្ស និងសកម្មជននយោបាយដែលតស៊ូមតិដោយសន្តិវិធី ៕
