ការនាំចេញអង្ករកម្ពុជាទៅកាន់ទីផ្សារអន្តរជាតិមានការធ្លាក់ចុះបន្តិចបើធៀបទៅនឹងការនាំចេញឆ្នាំមុន។
ក្នុងរបាយការណ៍ចុះថ្ងៃទី ១ សីហា អំពីស្ថានភាពនៃការនាំចេញអង្ករប្រចាំខែកក្កដាឆ្នាំ២០១៨ ឲ្យដឹងថាក្នុងរយៈពេល៧ខែនៃឆ្នាំ២០១៨នេះការនាំចេញអង្ករកម្ពុជាទៅកាន់ទីផ្សារអន្តរជាតិមានចំនួន ២៩៧ ០៨០តោនទាបជាងការនាំចេញក្នុងរយៈពេលដូចគ្នាកាលពីឆ្នាំមុន ៦,៣០ភាគរយ ខណៈឆ្នាំ២០១៧ការនាំចេញមានចំនួន ៣១៣ ៩១៦ តោន។
អគ្គនាយកនៃអគ្គនាយកដ្ឋានកសិកម្មលោក ហ៊ាន វណ្ណហន មានប្រសាសន៍ថាមូលហេតុដែលធ្វើឲ្យការនាំចេញថយចុះនេះ បណ្តាលមកពីកម្រិតសមត្ថភាពនៃរោងម៉ាស៊ីន ដែលតាមការសង្កេតរបស់លោកគឺភាគច្រើនអ្នកនាំចេញគ្មានឃ្លាំងបម្រុងទុកសម្រាប់បម្រើឲ្យការនាំចេញនោះទេ។
អគ្គនាយកនៃអគ្គនាយកដ្ឋានកសិកម្មលោក ហ៊ាន វណ្ណហន
ខណៈដែលកម្ពុជាកំពុងរងគ្រោះពីទឹកជំនន់នៅតាមខេត្តមួយចំនួននោះលោក ហ៊ាន វណ្ណហន អះអាងថាមិនអាចធ្វើឲ្យប៉ះពាល់ដល់ការនាំចេញរបស់កម្ពុជាក្នុងឆ្នាំ២០១៨នេះនោះទេ។
កាលពីពាក់កណ្តាលខែកក្កដាកន្លងទៅរដ្ឋាភិបាលតាមរយៈធនាគារអភិវឌ្ឍន៍ជនបទបានសម្រេចទម្លាក់ទុនបំរុងជាង៥០លានដុល្លារ ទុកផ្តល់កម្ចីដល់ម្ចាស់រោងម៉ាស៊ីនកិនស្រូវ និងអ្នកនាំចេញ ដោយទទួលយកស្រូវក្នុងឃ្លាំងជាទ្រព្យបញ្ចាំដើម្បី ឲ្យក្រុមហ៊ុនទាំងនោះជួយទិញស្រូវពីកសិករ ក៏ដូចជាទប់ស្កាត់ការធ្លាក់តម្លៃស្រូវ។
អង្ករកម្ពុជាត្រូវបាននាំចេញដោយ៧០ក្រុមហ៊ុន ទៅកាន់ប្រទេស៦០នៅទូទាំងពិភពលោក ក្នុងនោះប្រទេសចិន បារាំង ប៉ូឡូញ ម៉ាឡេស៊ី និងបង់ក្លាដេសទទួលទិញពីកម្ពុជាច្រើនជាងគេ។ ក្នុងឆ្នាំ២០១៧កន្លងទៅកម្ពុជាសម្រេចនាំអង្ករចេញបាន ៦៣,៥ ម៉ឺនតោន កើនឡើង ១៧,៣ភាគរយ ធៀបនឹង ៥៤ម៉ឺនតោននៅឆ្នាំ២០១៦៕
