លោកនាយករដ្ឋមន្ត្ រីហ៊ុន សែន ប្រកាសថាកម្ពុជាបានទទួលជោគជ័យច្រើនលើការដាំដុះស្រូវអង្ករ តែការនាំអង្ករចេញទៅកាន់ទីផ្សារអន្តរជាតិបានតិចតួច ។
ក្នុងពិធីជួបជាមួយកម្មករនៅក្នុងខេត្តកំពង់ស្ពឺ កាលពីម្សិលមិញ លោកហ៊ុន សែន បានប្រកាសថាក្នុងមួយឆ្នាំៗផលិតផលស្រូវរបស់កម្ពុជាសម្រេចបានលើសពីតម្រូវការក្នុងស្រុកជាង៥លានតោន តែការនាំចេញបានតិចតួចប៉ុណ្ណោះដោយសារពុំសូវមានអ្នកនាំចេញ ខណៈលោកថានឹងជំរុញដោះស្រាយបញ្ហានេះ។
លោកនាយករដ្ឋមន្ត្រី ហ៊ុន សែន
លោកបញ្ជាក់ថានាពេលខាងមុខធនាគារដែលផ្តល់ការគាំទ្រដល់សហគ្រាសធុនតូចនឹងមធ្យមដែលមានទឹកប្រាក់បំរុងជាង១០០លានដុល្លារនឹងបើកផ្តល់កម្ចីដល់ពលរដ្ឋដើម្បីជំរុញវិស័យកសិកម្ម និងឧស្សាហកម្មឲ្យកាន់តែខ្លាំងក្លា។
ក្នុងរបាយការណ៍ចុះថ្ងៃទី ១ សីហា អំពីស្ថានភាពនៃការនាំចេញអង្ករប្រចាំខែកក្កដាឆ្នាំ២០១៨ ឲ្យដឹងថាក្នុងរយៈពេល៧ខែនៃឆ្នាំ២០១៨នេះការនាំចេញអង្ករកម្ពុជាទៅកាន់ទីផ្សារអន្តរជាតិមានចំនួន ២៩៧ ០៨០តោនទាបជាងការនាំចេញក្នុងរយៈពេលដូចគ្នាកាលពីឆ្នាំមុន ៦,៣០ភាគរយ ខណៈឆ្នាំ២០១៧ការនាំចេញមានចំនួន ៣១៣ ៩១៦ តោន។
អគ្គនាយកនៃអគ្គនាយកដ្ឋានកសិកម្មលោកហ៊ាន វណ្ណហន មានប្រសាសន៍ថា មូលហេតុដែលធ្វើឲ្យការនាំចេញថយចុះនេះ បណ្តាលមកពីកម្រិតសមត្ថភាពនៃរោងម៉ាស៊ីន ដែលតាមការសង្កេតរបស់លោកគឺភាគច្រើនអ្នកនាំចេញគ្មានឃ្លាំងបម្រុងទុកសម្រាប់បម្រើឲ្យការនាំចេញនោះទេ ដែលធ្វើឲ្យអង្ករជាច្រើនលានតោនត្រូវបានប្រទេសជិតខាងចូលមកទិញនឹងនាំទៅលក់។
បច្ចប្បន្នកម្ពុជាមានក្រុមហ៊ុននាំចេញអង្ករចំនួន៧០ក្រុមហ៊ុន ដែលនាំចេញទៅកាន់ប្រទេស៦០នៅលើពិភពលោក។ ក្នុងឆ្នាំ២០១៧កន្លងទៅកម្ពុជាសម្រេចនាំអង្ករចេញបាន ៦៣,៥ ម៉ឺនតោន កើនឡើង ១៧,៣ភាគរយ ធៀបនឹង ៥៤ម៉ឺនតោននៅឆ្នាំ២០១៦៕
