មន្ត្រីសមាគមការពារសិទ្ធិមនុស្សអាដហុក បានឲ្យដឹងថា តុលាការបានចេញដីកាកោះហៅមន្ត្រីរបស់ខ្លួនម្នាក់ ឲ្យចូលទៅដោះបន្ទុកនៅក្នុងបន្ទប់សវនការនាចុងខែនេះ នៅក្នុងសំណុំរឿងសមគំនិតសូកប៉ាន់សាក្សី ខណៈមន្ត្រីសិទ្ធិមនុស្ស ៣រូបទៀត មិនទាន់ទទួលបានដីកាកោះនៅឡើយ។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា បានប្រាប់VODនៅថ្ងៃនេះថា គិតត្រឹមថ្ងៃទី១៣ ខែសីហានេះ តុលការបានចេញដីកាកោះហៅមន្ត្រីសិទ្ធិមនុស្សអាដហុក លោក ណៃ វ៉ង់ដា ឲ្យចូលសវនាការនាថ្ងៃទី២៧ ខែសីហាខាងមុខនេះ។
ចំណែកឯមន្ត្រីសិទ្ធិមនុស្សអាដហុក ៣រូបផ្សេងទៀត មានលោក យី សុខសាន្ត លោក នី សុខា និងលោកស្រី លឹម មុន្នី នោះ លោក ស៊ឹង សែនករុណា ប្រាប់ថា ពួកគេនៅពុំទាន់ទទួលបានដីកាកោះហៅពីតុលាការនៅឡើយ។
ប៉ុន្តែ លោក ករុណា បានបដិសេធបកស្រាយបន្ថែមទៀតជុំវិញករណីនេះទេ ដោយប្រាប់ថា រង់ចាំមើលនីតិវិធីរបស់តុលាការបន្តទៀត។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា
អគ្គលេខាធិការរងគណៈកម្មាធិការជាតិរៀបចំការបោះឆ្នោត គ.ជ.ប. លោក នី ចរិយា ដែលជាអតីតមន្ត្រីសមាគមការពារសិទ្ធិមនុស្សអាដហុកនោះ ក៏ត្រូវបានតុលាការចោទប្រកាន់ថា ជាប់ពាក់ព័ន្ធនឹងសំណុំរឿងនេះផងដែរ។
វីអូឌីបានព្យាយាមទាក់ទងទៅលោក នី ចរិយា ដើម្បីសាកសួរថា តើលោកទទួលបានដីកាកោះហៅដែរឬយ៉ាងណានោះ ប៉ុន្តែ ទូរស័ព្ទរបស់លោកពុំអាចទាក់ទងបាននោះឡើយ។
អ្នកនាំពាក្យសាលាដំបូងភ្នំពេញ លោក អ៊ី រិន្ទ មិនធ្វើការបកស្រាយជុំវិញការកោះហៅនេះមន្ត្រីការពារសិទ្ធិមនុស្សនេះទេ ដោយថាខ្លឹមសារនៃការរកោះហៅនេះ ត្រូវបានសរសេររួចរាល់ហើយនៅក្នុងដីកាកោះហៅ។
ក្នុងដីកាកោះហៅចុះថ្ងៃទី០៩ ខែសីហានេះ ព្រះរាជអាជ្ញារងសាលាដំបូងរាជធានីភ្នំពេញ លោក គុជ គឹមឡេង បានបង្គាប់ទៅលោក ណៃ វ៉ង់ដា ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក ឲ្យចូលទៅឆ្លើយដោះបន្ទុកនៅចំពោះមុខក្រុមប្រឹក្សាជំនុំជម្រះ ៥រូប នៅសាលាដំបូងរាជធានីភ្នំពេញ។
មន្ត្រីសិទ្ធិមនុស្សអាដហុកទាំង ៤រូប និងអគ្គលេខាធិការរង គ.ជ.ប. លោក នី ចរិយា ត្រូវបានតុលាការសម្រេចឲ្យនៅក្រៅឃុំបណ្ដោះអាសន្នកាលពីល្ងាចថ្ងៃទី២៩ ខែមិថុនា ឆ្នាំ២០១៧ បន្ទាប់ពីត្រូវបានឃុំខ្លួនអស់រយៈពេលជាង ១ឆ្នាំ ក្រោមការចោទប្រកាន់ថា បានសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី ពាក់ព័ន្ធនឹងសំណុំរឿងនាង ខុម ចាន់តារាទី ហៅស្រីមុំ ដែលត្រូវបានគេទម្លាយថា មានទំនាក់ទំនងស្នេហាចម្រូងចម្រាស់ជាមួយមេដឹកនាំអតីតបក្សប្រឆាំង លោក កឹម សុខា៕
