ក្រសួងកសិកម្ម បានច្រានចោលនូវព័ត៌មាននានា ដែលចុះផ្សាយថា រដ្ឋាភិបាលតម្រូវឲ្យម្ចាស់កសិដ្ឋានដំណាំឈើហូបផ្លែទាំងអស់ ចុះបញ្ជីនៅក្រសួង។
ក្នុងសេចក្ដីប្រកាសព័ត៌មានចេញនៅថ្ងៃនេះ ក្រសួងកសិកម្ម រុក្ខាប្រមាញ់ និងនេសាទ បានអះអាងថា ក្រសួងមិនតម្រូវឲ្យម្ចាស់កសិដ្ឋានដាំដំណាំឈើហូបផ្លែទាំងអស់ ត្រូវមកចុះបញ្ជីនៅក្រសួងទេ។
បើតាមសេចក្ដីប្រកាសព័ត៌មានដដែលនេះ ក្រសួងគ្រាន់តែតម្រូវឲ្យក្រុមហ៊ុន ឬម្ចាស់កសិដ្ឋានដំណាំចេក ឲ្យមកចុះបញ្ជីនៅក្រសួង ប្រសិនបើពួកគេចង់នាំចេញផ្លែចេកទៅកាន់បរទេស។
ក្រសួងបានបញ្ជាក់ថា ការដែលតម្រូវឲ្យម្ចាស់កសិដ្ឋានដំណាំចេក ត្រូវចុះបញ្ជីនៅក្រសួងនោះ គឺដើម្បីវាយតម្លៃលើលក្ខណៈបច្ចេកទេស ការគ្រប់គ្រងការដាំដុះ និងការវេចខ្ចប់ ឲ្យស្របតាមស្ដង់ដារសុវត្ថិភាពចំណីអាហារ សម្រាប់នាំចេញទៅក្រៅប្រទេស៕
