ប្រទេសចិនបានបញ្ជូនក្រុមការងាររបស់ខ្លួនមកសិក្សានិងវាយតម្លៃពីវិស័យកសិកម្មកម្ពុជា ដើម្បីរៀបចំផែនការអភិវឌ្ឍន៍កសិកម្មទំនើបនៅកម្ពុជា រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រសួងកសិកម្មនៃសាធារណរដ្ឋប្រជាមានិតចិន។
រដ្ឋមន្ត្រីក្រសួងកសិកម្មលោកវេង សាខុន នៅថ្ងៃទី១៤ សីហានេះបានសរសេរនៅលើទំព័រហ្វេសបុករបស់លោកថា នៅថ្ងៃនេះលោកបានជួបពិភាក្សាការងារជាមួយគណៈប្រតិភូនៃក្រសួងកសិកម្មនៃសាធារណរដ្ឋប្រជាមានិតចិន ក្នុងគោលបំណងអនុវត្តន៍ឲ្យបានទាន់ពេលវេលា លើការអនុវត្តអនុស្សរណៈនៃការយោគយល់គ្នា (MOU) ស្តីពីការរៀបចំផែនការអភិវឌ្ឍន៍កសិកម្មទំនើបនៅកម្ពុជា រវាងក្រសួងកសិកម្មប្រទេសទាំងពីរដែលបានចូលជាធរមានកាលពីខែមករា ឆ្នាំ២០១៨។
លោកក៏បានបន្ថែមផងដែរថាក្រុមការងាររបស់ប្រទេសចិននឹងធ្វើការបែងចែកជា២ក្រុមទៅកាន់ខេត្តចំនួន១២ដែលមានសក្តានុពលកសិកម្មរបស់កម្ពុជា មុននឹងបញ្ចប់ និងចុះហត្ថលេខាដោយភាគីទាំងពីរទៅលើរបាយការណ៍បឋមនៃការចុះទៅស្រាវជ្រាវនេះនៅបំណាច់ខែសីហាខាងមុខនេះ។
អគ្គនាយកនៃអគ្គនាយកដ្ឋានកសិកម្មលោក ហ៊ាន វ៉ានហន មានប្រសាសន៍ថា ការអភិវឌ្ឍន៍កសិកម្មទំនើបនៅកម្ពុជានេះនឹងធ្វើការផ្តោតទៅលើបច្ចេកទេស និងមន្ទីរពិសោធន៍កសិកម្ម។ លោកបន្ថែមថានាពេលខាងមុខនាយកដ្ឋាននានានៃក្រសួង នឹងធ្វើការពិភាក្សាដោយផ្ទាល់ជាមួយភាគីចិនដើម្បីចូលរួមរៀបចំផែនការមេសម្រាប់ធ្វើកសិកម្មពីឆ្នាំ២០១៩ ដល់ឆ្នាំ២០៣០ផងដែរ។
អគ្គនាយកនៃអគ្គនាយកដ្ឋានកសិកម្មលោក ហ៊ាន វ៉ានហន
ក្នុងដំណើរទស្សនកិច្ចរបស់នាយកមន្ត្រីចិនលោក លី ខឺឃាង មកកម្ពុជាកាលពីដើម ខែមករា ឆ្នាំ២០១៨នេះ ប្រទេសចិនបានឯកភាពជាមួយកម្ពុជាក្នុងការជំរុញទៅលើកិច្ចសហប្រតិបត្តិការលើវិស័យកសិកម្ម ដោយរួមគ្នាបង្កើតផែនការអភិវឌ្ឍន៍កសិកម្មទំនើបជាតិកម្ពុជា បង្កើតសួនតាំងបង្ហាញ និងកិច្ចសហប្រតិបត្តិការកសិកម្មទំនើប និងតំបន់កែច្នៃផលិតផលកសិកម្ម ជំរុញការអភិវឌ្ឍការកែច្នៃការស្តុកទុក សម្រាប់ផលិតផលកសិកម្ម និងពង្រឹងសង្វាក់ឧស្សាហកម្មសម្រាប់វិស័យកសិកម្មផងដែរ៕
