អាជ្ញាធរចិន បានឲ្យនិស្សិតសារព័ត៌មានបរទេសម្នាក់ដែលកំពុងសិក្សាក្នុងសាកលវិទ្យាល័យមួយចាកចេញពីប្រទេសខ្លួនដោយសារតែគាត់បានផលិតវីដេអូឯកសារពីមេធាវីដែលការពារសិទ្ធិមនុស្សនៅចិន។
និស្សិតរូបនោះមានឈ្មោះថា David Missal ជាជនជាតិអាឡឺម៉ង់សិក្សាថ្នាក់អនុបណ្ឌិតផ្នែកសារព័ត៌មាននិងសារគមនាគមន៍នៅសាកលវិទ្យាល័យ Tsinghua ក្នុងទីក្រុងប៉េកាំង។
លោក David Missal បានសរសេរនៅលើបណ្ដាញសង្គម Twitter របស់លោក កាលពីសប្ដាហ៍មុនថាទិដ្ឋាការរបស់ខ្លួនមិនត្រូវបានរដ្ឋាភិបាលចិនបន្តឲ្យដោយសារប្រហែលមកពីគាត់បានធ្វើកិច្ចការសាលាមួយដែលនិយាយពីស្ថានភាពនិងជីវិតរស់នៅរបស់មេធាវីការពារសិទ្ធិមនុស្សនៅប្រទេសចិន។
ចិន បានបដិសេធការបន្តទិដ្ឋាការរបស់ លោក David Missal កាលពីថ្ងៃទី៣ខែសីហាកន្លងទៅហើយទុកពេលឲ្យនិស្សិតរូបនេះតែមួយសប្ដាហ៍ប៉ុណ្ណោះដើម្បីចាកចេញពីប្រទេសខ្លួន។
វីដេអូឯកសារដែលនិស្សិតសារព័ត៌មានរូបនេះ បានផលិតជាកិច្ចការសាលាដែលគាត់ត្រូវធ្វើសម្រាប់មុខវិជ្ជាប្រព័ន្ធផ្សព្វផ្សាយចម្រុះ។ វីដេអូនេះមានរយៈពេលជាង៩នាទី ហើយត្រូវបានគាត់ចែកចាយក្នុងបណ្ដាញសង្គម Youtube របស់គាត់ ។ ខ្លឹមសាររួមក្នុងវីដេអូនេះនិយាយពីការប្រឈមរបស់មេធាវីដែលការពារសកម្មជនគាំទ្រលទ្ធិប្រជាធិតេយ្យ និងសិទ្ធិមនុស្ស។
ក្នុងពេលផលិតវីដេអូនេះកាលពីខែឧសភាកន្លងទៅ លោក David Missal រួមទាំងប្រភពដែលគាត់សម្ភាសន៍ជាមួយផង ត្រូវបានអាជ្ញាធរចិនហៅសាកសួរអស់រយៈពេលជាង៣ម៉ោងផងដែរ។
យោងតាមការចុះផ្សាយរបស់សារព័ត៌មាន South China Morning Post ក្រៅពីការប្រឈមជាមួយនឹងសមត្ថកិច្ចចិន និស្សិតរូបនេះក៏ធ្លាប់ទទួលការព្រមានពីសាកលវិទ្យាល័យរបស់ខ្លួនផងដែរ ពីការបណ្ដេញចេញពីប្រទេសចិន ប្រសិនណាបើគាត់នៅតែបន្តធ្វើរឿងរសើបបែបនេះទៀត។
ទោះបីជាមានការឃាត់ខ្លួននិងព្រមានពីអាជ្ញាធរចិននិងសាលារបស់ខ្លួនយ៉ាងណាក៏ដោយ ក៏លោក David Missal នៅតែផលិតវីដេអូនេះឡើង។
ប៉ុន្តែសម្រាប់ចិន ការបណ្ដេញនិស្សិតសារព័ត៌មានរូបនេះចេញពីប្រទេសជាការអនុវត្តច្បាប់របស់ខ្លួន ហើយអ្វីៗគឺធ្វើឡើងស្របតាមច្បាប់របស់ប្រទេសចិន។ យោងតាមអត្ថបទទស្សនៈរបស់សារព័ត៌មាន Global Times របស់ចិនដែលចេញផ្សាយកាលពីថ្ងៃទី១៣ខែសីហា ភាគីចិនថាប្រព័ន្ធផ្សព្វផ្សាយលោកខាងលិចកំពុងតែបំប៉ោងព័ត៌មានទាក់ទងនឹងករណីនេះ។
សារព័ត៌មានដដែលបានចុះផ្សាយបន្តថាអ្វីដែល David Missal ធ្វើគឺប្រឆាំងនឹងច្បាប់របស់ប្រទេសចិន ព្រោះថានិស្សិតរូបនេះបានធ្វើសេចក្តីរាយការណ៍ពីក្រុមមេធាវីនិងក្រុមគ្រួសាររបស់ពួកគេដែលកំពុងស្ថិតក្រោមការតាមដាននិងស៊ើបអង្កេតពីរដ្ឋាភិបាលចិនរយៈពេល៣ឆ្នាំមកហើយ ក្រោមបទសង្ស័យថាពួកគេជំរុញឲ្យមានការផ្លាស់ប្តូរប្រព័ន្ធនយោបាយនៅចិន។
អត្ថបទដដែលក៏បានលើកឡើងថា លោកខាងលិចជាពិសេសអាឡឺម៉ង់គួរតែយល់ពីប្រព័ន្ធច្បាប់និងនយោបាយចិន ដោយថា David Missal កំពុងសិក្សានៅប្រទេសចិន ដូច្នេះត្រូវតែគោរពតាមច្បាប់ចិន បើនិស្សិតចិនទៅរៀននៅអាឡឺម៉ង់ក៏ត្រូវគោរពច្បាប់អាឡឺម៉ង់ដូចគ្នា។
ការរិះគន់បញ្ហាសិទ្ធិមនុស្សនៅប្រទេសចិនជារឿងមួយដ៏រសើបដែលអ្នករិះគន់អាចប្រឈមនឹងការចាប់ខ្លួនពីសំណាក់រដ្ឋាភិបាលក្រុងប៉េកាំង។ អ្នកសារព័ត៌មានដែលសរសេររាយការណ៍ពីរឿងទាំងនេះក៏ត្រូវប្រឈមនឹងការធ្វើទុក្ខបុកម្នេញពីសំណាក់អាជ្ញាធរចិនផងដែរ។
ជាក់ស្ដែងកាលពីថ្ងៃច័ន្ទកន្លងទៅ អាជ្ញាធរប្រទេសនេះ បានឃុំខ្លួនអ្នកឆ្លើយឆ្លងព័ត៌មានវិទ្យុសម្លេងសហរដ្ឋអាមេរិកជាភាសាចិនចំនួនពីរនាក់អស់រយៈពេល៦ម៉ោង ដោយសារតែអ្នកសារព័ត៌មានទាំងពីរនាក់នោះបានសម្ភាសសាស្រ្តាចារ្យចូលនិវត្តន៍ម្នាក់ដែលតែងតែរិះគន់ពីបញ្ហាសិទ្ធិមនុស្សនៅចិន៕
