ចៅក្រមសាលាដំបូងរាជធានីភ្នំពេញកាលពីម្សិលមិញ បានបដិសេធបណ្ដឹងសុំនៅក្រៅឃុំរបស់អ្នកផលិតភាគយន្តឯកសារជនជាតិអូស្ត្រាលីលោក Jame Ricketson។
ចៅក្រមជំនំជម្រះនៃសាលាដំបូងរាជធានីភ្នំពេញ លោក សេង លាង បដិសេធបណ្ដឹងសុំនៅក្រៅឃុំរបស់អ្នកការសែតជនជាតិអូស្ត្រាលីរូបនេះ ដោយមានសំណើពីតំណាងអយ្យការលោក សៀង សុខ។
លោកសៀង សុខ បានស្នើសុំទៅចៅក្រមថា លោក Jame Ricketson មិនបានដាក់ភស្តុតាងដោះបន្ទុកទៅមន្ត្រីនគរបាលនោះទេ ហើយបើតុលាការដោះលែងលោក Ricketson នឹងធ្វើឲ្យប៉ះពាល់ដល់ដំណើរនីតិវិធី ព្រោះសំណុំរឿងជាបទល្មើសព្រហ្មទណ្ឌ។
ក្រៅពីនេះនៅក្នុងសវនាការកាលពីម្សិលមិញតុលាការក៏បានសម្រេចសាកសួរសាក្សីចំនួន ៧នាក់ តាមសំណើរសុំរបស់មេធាវីការពារក្តីលោក Jame Ricketson ក្នុងនោះ មានដូចជា កូននិងកូនចិញ្ចឹម របស់លោក Jame Ricketson និងអ្នកផលិតភាពយន្តនៅប្រទេសអូស្ត្រាលីដែលស្គាល់លោក Ricketson ផងដែរ។
ប៉ុន្តែក្នុងចំណោមសាក្សីទាំង៧នាក់នោះ តុលាការទើបតែសាកសួរបានសាក្សីម្នាក់ប៉ុណ្ណោះ គឺលោក Peter Weir ជាអ្នកផលិតភាពយន្តនៅប្រទេសអូស្ត្រាលី ដែលស្គាល់លោក Jame Ricketson ក្នុងនាមជាអ្នកផលិតនិងថតផលិតភាពយន្តដូចគ្នា។ ចំណែកសាក្សី៦នាក់ផ្សេងទៀតនឹងត្រូវបន្តសាកសួរ នៅថ្ងៃទី២០ ខែសីហាខាងមុខ។
ក្នុងសវនាការសាកសួរនោះ Peter Weir បានប្រាប់ទៅចៅក្រមថា លោក Ricketson ចូលចិត្តថតវីដេអូផលិតរឿងទាក់ទងជីវិតពិតដែលកើតឡើងនៅក្នុងសង្គមដោយខ្លួនឯង មិនដែលមានជាប់ពាក់ព័ន្ធនឹងគណបក្សនយោបាយណាឡើយ។
លោក Ricketson ត្រូវបានសមត្ថកិច្ចចាប់ឃុំខ្លួននៅក្នុងខែមិថុនា ឆ្នាំ២០១៧ បន្ទាប់ពីលោកបានបង្ហោះដ្រូនដើម្បីថតបាតុកម្មរបស់អតីតគណបក្សសង្គ្រោះជាតិ។
ក្រោយពីមានការចាប់ខ្លួនលោក Ricketson រដ្ឋមន្ត្រីការបរទេសអូស្រ្តាលី លោកស្រី Julie Bishop បានសរសេរលិខិតមួយផ្ញើទៅរដ្ឋមន្ត្រីការបរទេសកម្ពុជាលោក ប្រាក់ សុខុន ក្នុងបំណងស្វែងរក ការសម្របសម្រួលឲ្យមានការដោះលែងអ្នកផលិតភាពយន្តឯកសាររូបនេះ។
