មន្ត្រីអប់រំ០៤នាក់ត្រូវបានបណ្តេញចេញពីមណ្ឌលប្រឡងដោយពួកគេបានប្រព្រឹត្តិកំហុសឆ្គងក្នុងការទុកទូរសព្ទជាប់នឹងខ្លួន ខណៈដែលពួកគេកំពុងបំពេញការងារនៅមណ្ឌលប្រឡងក្នុងរយៈពេល០២ថ្ងៃនេះ។
យោងតាមសេចក្តីប្រកាសព័ត៌មានរបស់ក្រសួងអប់រំដែលចេញផ្សាយនៅថ្ងៃនេះបានឲ្យដឹងថា ក្នុងរយៈពេល២ថ្ងៃនៃការប្រឡងមធ្យមសិក្សាទុតិយភូមិ ដែលត្រូវនឹងថ្ងៃទី២០និងទី២១ ខែសីហា ឆ្នាំ២០១៨នេះ ក្រសួងអប់រំបានបណ្តេញមន្ត្រីអប់រំ០៤នាក់ចេញពីមណ្ឌលប្រឡងបន្ទាប់ពីរកឃើញថាពួកគេបានទុកទូរសព្ទជាប់ខ្លួន ដែលខុសទៅនឹងបទបញ្ជាផ្ទៃក្នុង។
នៅក្នុងសេចក្តីប្រកាសព័ត៌មានដដែលបានឲ្យដឹងថា ក្នុងដំណើរការប្រឡងបាក់ឌុបនៅថ្ងៃទី១និង២ មានបេក្ខជនសរុបចំនួន១១៥ ២៦៨នាក់ ស្រី៥៨ ១៥៨នាក់ និងអវត្តមានសរុបចំនួន១៨០៦។ ក្នុងនោះមានបេក្ខជនប្រព្រឹត្តកំហុសឆ្គងចំនួន ០៤ ករណី ដកហូតទូរសព្ទដៃ០៣ករណី នាំសំណៅឯកសារចូលចំនួន០១ករណី។
នៅក្នុងរយៈពេល០២ថ្ងៃនេះ មានបញ្ហាសុខភាពធ្ងន់ធ្ងរចំនួន៣២ករណី ក្នុងនោះមានអនុរក្ស ០២ករណី អ្នកសង្កេតស្ម័គ្រចិត្ត ០១ ករណី បេក្ខជន២៨ករណី។ ប៉ុន្តែបេក្ខជនទាំងអស់អាចបន្ដដំណើរការប្រឡងបាន បន្ទាប់ពីពួកគេទទួលបានជួយសង្គ្រោះបឋម។ ចំណែកឯ ០៣ករណីផ្សេងទៀត បេក្ខជនបានជួបគ្រោះថា្នក់ចរាចរណ៍ ត្រូវបានបញ្ជូនទៅព្យាបាលនៅមន្ទីរពេទ្យ ហើយអាចត្រឡប់មកបន្តការប្រឡងវិញ ០១ករណី និង ០២ករណី មិនអាចត្រឡប់មកបន្តការប្រឡងបានទៀតឡើយ ។
ការប្រឡងមធ្យមសិក្សាទុតិយភូមិ ធ្វើឡើងនៅថ្ងៃទី២០ ដល់ថ្ងៃទី២១ ខែសីហា ដោយមានបេក្ខជនចូលរួមប្រឡងជាង ១១ម៉ឺននាក់ ខណៈដែលអ្នកសង្កេតការណ៍ស្ម័គ្រចិត្តប្រហែល ៦ពាន់នាក់ មកពីអង្គភាពប្រឆាំងអំពើពុករលួយ ត្រូវបានដាក់ពង្រាយនៅទូទាំងប្រទេស។ ក្រសួងអប់រំនឹងប្រកាសលទ្ធផលប្រឡង នៅរសៀលថ្ងៃទី១១ ខែកញ្ញា ឆ្នាំ២០១៨ សំរាប់មណ្ឌលប្រឡងក្រុងភ្នំពេញ និងខេត្តកណ្តាល ហើយសំរាប់ខេត្តដទៃទៀតនឹងប្រកាសនៅព្រឹកថ្ងៃទី១២ ខែកញ្ញា ឆ្នាំ២០១៨។
