ភ្នំពេញ៖ អតីតអ្នករាយការព័ត៌មានវិទ្យុអាស៊ីសេរី ត្រូវដោះលែងឲ្យនៅក្រៅឃុំបណ្តោះអាសន្ននៅល្ងាចថ្ងៃអង្គារ ទី២១ ខែសីហា ឆ្នាំ២០១៨ នេះបើតាមអ្នកនាំពាក្យសាលាដំបូងរាជធានីភ្នំពេញ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ប្រាប់វីអូឌី នៅមុននេះបន្តិចថា តុលាការបានសម្រចដោះលែងអ្នកទាំងពីរឲ្យនៅក្រៅឃុំ នៅល្ងាចថ្ងៃអង្គារនេះ។
ការដោះលែងអតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ នៅថ្ងៃនេះ គឺធ្វើឡើងតែមួយថ្ងៃក្រោយព្រះមហាក្សត្រសម្រេចលើកលែងទោស អ្នកស្រី ទេព វន្នី និងសកម្មជនដីធ្លី៣រូបផ្សេងទៀត និងធ្វើឡើងមិនដល់មួយសប្តាហ៍នៃការដោះលែង លោក គឹម សុខ អ្នកវិភាគបញ្ហានយោបាយ និងសង្គម។
លោក អួន ឈិន និងលោក យាង សុជាមេត្តា ត្រូវបានសមត្ថកិច្ចចាប់ខ្លួនកាលពីល្ងាចថ្ងៃទី១៤ ខែវិច្ឆិកា ឆ្នាំ២០១៧ ហើយត្រូវបានតុលាការចោទប្រកាន់ថា បានលួចផលិតព័ត៌មានពីប្រទេសកម្ពុជាទៅឲ្យបរទេស ដែលធ្វើឲ្យប៉ះពាល់ដល់សន្តិសុខជាតិ៕