ម៉ាឡេស៊ី បានប្រកាសថាខ្លួននឹងផ្អាកគម្រោងសាងសង់ធំៗចំនួនពីរដែលជាការវិនិយោគរបស់ក្រុមហ៊ុនរដ្ឋចិន ដោយសារតែខ្លួនមិនចង់ឲ្យជំពាក់បំណុលភាគីចិនច្រើន។
នាយករដ្ឋមន្រ្តីម៉ាឡេស៊ី លោក មហាធៀ មហាម៉េដ បានថ្លែងក្នុងសន្និសីទសារព័ត៌មានមុនចាកចេញពីទីក្រុងប៉េកាំងកាលពីម្សិលមិញថា ម៉ាឡេស៊ី បានប្រាប់ភាគីចិនរួចហើយពីការផ្អាកគម្រោង២ដែលជាការវិនិយោគរបស់ចិន ព្រោះបារម្ភថាខ្លួនមិនមានលទ្ធភាពសងបំណុលដល់ចិនវិញ។
លោក មហាធៀ បានថ្លែងប្រាប់អ្នកសារព័ត៌មានបន្ថែមថា ម៉ាឡេស៊ីបានពន្យល់ទៅចិនរួចរាល់ហើយពីមូលហេតុនៃការផ្អាកគម្រោងទាំងនេះ ពោលមូលហេតុធំបំផុតនោះគឺការខ្ចីលុយដ៏ច្រើនសន្ធឹកសន្ធាប់ដែលម៉ាឡេស៊ីមិនអាចមានលទ្ធភាពសងត្រលប់ទៅវិញឡើយ។
នាយករដ្ឋមន្រ្តីម៉ាឡេស៊ី លោក មហាធៀ មហាម៉េដ
លោក មហាធៀ ក៏បានប្រាប់ទៅសមភាគីចិនផងដែរថាមូលហេតុមួយទៀតដែលម៉ាឡេស៊ីផ្អាកគម្រោងទាំងនេះ ដោយសារតែនៅពេលបច្ចុប្បន្នម៉ាឡេស៊ីមិនសូវជាត្រូវការគម្រោងទាំងនេះប៉ុន្មានទេ។ លោកបញ្ជាក់ទៀតថាអ្វីដែលម៉ាឡេស៊ីត្រូវយកចិត្តទុកដាក់និងត្រូវការនៅពេលនេះគឺរកដំណោះស្រាយបញ្ហានៃការចំណាយហិរញ្ញវត្ថុហួសប្រមាណ។
ក្នុងសន្និសីទសារព័ត៌មានដដែលលោក មហាធៀ ក៏បានរិះគន់មិនសំចៃមាត់ផងដែរដល់មេដឹកម៉ាឡេស៊ីជំនាន់មុន ពោលគឺអតីតនាយករដ្ឋមន្រ្តី ណាជីប រ៉ាហ្សាក់ តែម្ដងដែលបានចុះហត្ថលេខាក្នុងកិច្ចព្រមព្រៀងគម្រោងទាំងនេះជាមួយចិន។ លោក មហាធៀ ថាវាជាកិច្ចព្រមព្រៀងដ៏ឆ្កួតលីលាដែលម៉ាឡេស៊ីបានចុះជាមួយចិនព្រោះថាម៉ាឡេស៊ីត្រូវសងទៅចិនវិញនូវទឹកប្រាក់ក្នុងចំនួនដ៏ច្រើន។ លោក មហាធៀ បន្ថែមថាលោកមិនបន្ទោសចិនទេ តែនេះជាកំហុសរបស់ម៉ាឡេស៊ីខ្លួនឯង។
គម្រោងដែលលោក មហាធៀ ផ្អាកជាមួយចិននោះរួមមានគម្រោងផ្លូវរថភ្លើងល្បឿនលឿនដែលមានចំណាយ៦៨៨គីឡូម៉ែត្រមានតម្លៃប្រមាណជា២០ពាន់លានដុល្លា និងគម្រោងបំពង់បង្ហូរឧស្ម័នដែលតម្លៃ២ពាន់លានដុល្លា។ គម្រោងទាំងពីរត្រូវបានគេមើលឃើញថាជាផ្នែកនៃគម្រោងយុទ្ធសាស្រ្តខ្សែក្រវ៉ាត់និងផ្លូវរបស់ចិន។ ការលុបចោលគម្រោងទាំងពីរតិចឬច្រើននេះនឹងប៉ះពាល់ផែនខ្សែក្រវ៉ាត់និងផ្លូវរបស់ចិនជាក់ជាមិនខាន។
អ្នកនាំពាក្យក្រសួងការបរទេសចិន លោក លូ ខាង បាននិយាយក្នុងសន្និសីទសារព័ត៌មានកាលពីម្សិលមិញ តបទៅនឹងការចោទសួរពីអ្នកសារព័ត៌មានពាក់ព័ន្ធនឹងបញ្ហានេះថាវាមិនអាចប្រកែកបាននោះទេ ក្នុងកិច្ចសហប្រតិបត្តិការណ៍រវាងប្រទេសពីរ បញ្ហាប្រឈមនិងការយល់ឃើញដែលមិនស្របគ្នាខ្លះអាចកើតឡើងក្នុងដំណាក់កាលណាមួយ។ លោកបន្ថែមថាដំណោះស្រាយរវាងប្រទេសទាំងពីរត្រូវធ្វើឡើងដោយឈរលើគោលការណ៍ពិភាក្សាគ្នាក្នុងនាមជាមិត្តនិងមិត្តភាពនៃការអភិវឌ្ឍយូរអង្វែងជាមួយគ្នា។
លោក លូ ខាង ក៏បានលើកឡើងដែរថាចិនបន្តកិច្ចសហប្រតិបត្តិការពាណិជ្ជកម្មនិងវិនិយោគជាមួយបណ្តាប្រទេសដទៃទៀតក្រោមគោលការណ៍គោរពផលប្រយោជន៍ទៅវិញទៅមកពោលគឺនយោបាយ ឈ្នះ-ឈ្នះ ទាំងសងខាង។ លោក ថាកិច្ចសហប្រតិបត្តិការរវាងចិននិងម៉ាឡេស៊ីជាច្រើនកំពុងរីកចម្រើន ក្នុងសន្ទុះដ៏វិជ្ជមានមួយ។
បើតាមលោក មហាធៀ ចិនបានយល់ព្រមនឹងសំណើរបស់ម៉ាឡេស៊ីដែលសុំផ្អាកគម្រោងទាំងពីរនេះហើយ។ លោក មហាធៀ បានទៅបំពេញទស្សនកិច្ចរយៈពេល៥ថ្ងៃជាលើកដំបូងទៅកាន់ប្រទេសចិន ចាប់ពីថ្ងៃទី១៧ដល់ថ្ងៃទី២១ខែសីហាក្រោយលោកជាប់ឆ្នោតជានាយករដ្ឋមន្រ្តីម៉ាឡេស៊ីកាលពីខែឧសភាកន្លងទៅ៕
