មន្រ្តីជាន់ខ្ពស់ចិនបានបដិសេធថាប្រទេសខ្លួនមិនបានគាបសង្កត់រាជាណាចក្រអឺស្វាទិនី (ដែលកាលពីមុនឈ្មោះថាស្វាស៊ីឡង់) ឲ្យបោះបង់ចំណងការទូតជាមួយតៃវ៉ាន់នោះទេ ព្រោះថាសហគមន៍អន្តរជាតិគេទទួលស្គាល់ហើយថាមានចិនតែមួយ។
អ្នកនាំពាក្យក្រសួងការបរទេសចិនលោកលូ ខាង បានថ្លែងកាលពីម្សិលមិញថាពិភពលោកបានដឹងរួចមកហើយថា មានប្រទេសចិនតែមួយប៉ុណ្ណោះ ហើយចិនត្រៀមខ្លួនជាស្រេចក្នុងការធ្វើការជាមួយប្រទេសនានាដែលទទួលស្គាល់គោលនយោបាយចិនតែមួយ។
មន្រ្តីក្រសួងការបរទេសចិនរូបនេះបានបន្តថាខ្លួនស្វាគមន៍ជានិច្ចចំពោះវត្តមានរបស់អឺស្វាទិនីក្នុងការចូលរួមជាមួយគ្រួសារចិន-អាព្រិចក្នុងពេលឆាប់ៗខាងមុខនេះ។
ក្នុងសន្និសីទសារព័ត៌មានកាលពីម្សិលមិញ ជំនួយការក្រសួងការបរទេសចិន លោកចិន សៅតុង បានលើកឡើងថាអឺស្វាទិនីមិនមានទំនាក់ទំនងជាមួយចិនប៉េកាំងទេ។ លោកថាហេតុផលអ្វីនោះគឺគេបានដឹងគ្រប់គ្នាហើយ។
លោកបន្ថែមទៀតថាចិនសង្ឈឹមថាមិនមានប្រជាជាតិអាព្រិចណាមួយត្រូវបានទុកចោលនៅពេលដែលកំពុងមានកិច្ចសហប្រតិបត្តិជាវិជ្ជមានរវាងចិននិងអាព្រិចនោះទេ។ ការលើកឡើងរបស់មន្រ្តីជាន់ខ្ពស់ចិនបែបនេះធ្វើឡើងមុនពេលដែលចិនរៀបចំវេទិការកិច្ចសហប្រតិបត្តិការចិន-អាព្រិចជាលើកទី៣នៅខែកញ្ញាខាងមុខនេះ។
ទោះជាយ៉ាងណាក៏ដោយ តាមការចុះផ្សាយរបស់ទីភ្នាក់ងារសារព័ត៌មានរ៉យទ័រដែលចេញផ្សាយកាលពីម្សិលមិញ មេដឹកនាំរាជាណាចក្រអឺស្វាទិនីថាខ្លួនមិនបោះបង់តៃវ៉ាន់នោះទេ។
គិតរហូតមកដល់ថ្ងៃមានប្រទេសតូចៗចំនួនតែ១៧ប៉ុណ្ណោះដែលនៅរក្សាចំណងការទូតផ្លូវការជាមួយតៃវ៉ាន់ ហើយរាជាណាចក្រអឺស្វាទិនីជាប្រទេសនៅទ្វីបអាព្រិចតែមួយគត់ដែលរក្សាចំណងការទូតជាមួយតៃវ៉ាន់។ កាលពីថ្ងៃអង្គារកន្លងទៅតៃវ៉ាន់បានរបូតប្រទេសអែលសាល់វ៉ាឌ័រ ដែលជាសម្ព័ន្ធមិត្តជាយូរឆ្នាំរបស់ខ្លួនទៅចិន៕
