បណ្ដុំអង្គការអន្ដរជាតិទទូចឲ្យអាជ្ញាធរកម្ពុជាទម្លាក់ការចោទប្រកាន់លើមន្ដ្រីការពារសិទ្ធិមនុស្ស៥រូប ដែលតុលាការគ្រោងកោះហៅឲ្យចូលសវនាការនៅថ្ងៃស្អែកនេះ ពាក់ព័ន្ធនឹងសំណុំរឿងសូកប៉ាន់សាក្សី។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា បានប្រាប់ VOD កាលពីថ្ងៃទី២១សីហាថា សាលាដំបូងរាជធានីភ្នំពេញបានចេញដីកាកោះហៅមន្ត្រីសិទ្ធិមនុស្សអាដហុក ២រូប គឺលោក យី សុខសាន្ត និង លោក ណៃ វ៉ង់ដា ឲ្យចូលសវនាការនាថ្ងៃទី២៧សីហាស្អែកនេះ។ ចំណែក មន្ដ្រីអាដហុក២រូបទៀត លោកថា ពួកគេមិនទាន់បានទទួលដីកាកោះពីតុលាការទេ។ រីឯលោក នី ចរិយា ដែលជាអតីតមន្រ្តីអាដហុក ហើយបច្ចុប្បន្នជាអគ្គលេខាធិការរង គ.ជ.ប ក៏ទទួលបានដីកាកោះឲ្យចូលបំភ្លឺនៅថ្ងៃស្អែកនេះដូចគ្នា។
ក្នុងសេចក្ដីថ្លែងការណ៍ចេញផ្សាយនៅថ្ងៃនេះ ក្រុមអង្គការអន្ដរជាតិចំនួន៥ បានទទូចឲ្យតុលាការកម្ពុជាទម្លាក់ការចោទប្រកាន់លើក្រុមអ្នកការពារសិទ្ធិមនុស្ស ដោយថា ការចោទប្រកាន់របស់តុលាការ កាលពីពេលកន្លងទៅ គឺជាការចោទប្រកាន់ដែលមានចរិតនយោបាយ និងជាការយាយីដល់សិទ្ធិសេរីភាពរបស់ក្រុមអង្គការសង្គមស៊ីវិលតែប៉ុណ្ណោះ។
ក្រុមអង្គការអន្ដរជាតិបន្ដថា រដ្ឋាភិបាលកម្ពុជាបានរំលោភគោលការណ៍ក្នុងកតិកាសញ្ញាស្ដីពីសិទ្ធិសង្គម និងនយោបាយ ដោយបានបំពានសិទ្ធិសេរីភាពក្នុងការបញ្ចេញមតិ ការបង្កើតសមាគម និងជួបជុំគ្នាដោយសន្ដិវិធី ដែលសិទ្ធិទាំងអស់នេះក៏ត្រូវបានធានាដោយរដ្ឋធម្មនុញ្ញកម្ពុជាផងនោះ។
អង្គការអន្ដរជាតិដែលទទូចឲ្យទម្លាក់បទចោទប្រកាន់នេះ រួមមាន អង្គការឃ្លាំមើលសិទ្ធិមនុស្សអន្ដរជាតិ Human Rights Watch អង្គការ CIVICUS អង្គការបណ្ដាញអាស៊ានដើម្បីការបោះឆ្នោតដោយសេរី ក្រុមសមាជិកសភាអាស៊ានដើម្បីសិទ្ធិមនុស្ស និងអង្គការសម្ព័ន្ធអ្នកសារព័ត៌មានអាស៊ីអគ្នេយ៍។
មន្ត្រីសិទ្ធិមនុស្សអង្គការអាដហុក៤រូប និងអតីតអគ្គលេខាធិការរង គ.ជ.ប. លោក នី ចរិយា ត្រូវបានតុលាការសម្រេចឲ្យនៅក្រៅឃុំជាបណ្ដោះអាសន្ន កាលពីខែមិថុនាឆ្នាំមុន បន្ទាប់ពីពួកគេត្រូវបានឃុំខ្លួនក្នុងពន្ធនាគារអស់រយៈជាង១ឆ្នាំ ក្រោមការចោទថា បានសមគំនិត និងសូកប៉ាន់សាក្សី ពាក់ព័ន្ធនឹងសំណុំរឿងនាង ខុម ចាន់តារាទី ហៅ ស្រីមុំ ដែលត្រូវបានគេទម្លាយថា មានទំនាក់ទំនងស្នេហាចម្រូងចម្រាស់ជាមួយមេដឹកនាំអតីតបក្សប្រឆាំង លោក កឹម សុខា៕
