រដ្ឋាភិបាលរំឮកទៅស្ថាប័នរដ្ឋ និងឯកជនទាំងអស់ឲ្យត្រៀមអនុវត្តបើកប្រាក់ខែជូនមន្រ្តីរាជការរួមទាំងកម្មករនិយោជិត១ខែពីរដង ដោយថា នឹងអនុវត្តចាប់ពីឆ្នាំ២០១៩ខាងមុខនេះ។
ក្នុងពិធីជួបជាមួយក្រុមកម្មករនៅរាជធានីភ្នំពេញនៅថ្ងៃនេះ លោកនាយករដ្ឋមន្រ្តី ហ៊ុន សែន បានថ្លែងថា នៅឆ្នាំ២០១៩ខាងមុខនេះ រដ្ឋាភិបាលតម្រូវឲ្យស្ថាប័នរដ្ឋ និងបណ្តាក្រុមហ៊ុនឯកជនទាំងអស់ក្នុងប្រទេសកម្ពុជា ត្រូវបើកប្រាក់បៀវត្សរ៍ជូនមន្រ្តីរាជការរួមទាំងកម្មករនយោជិត២សប្តាហ៍ម្តងដើម្បីជួយសម្រួលដល់តម្រូវការចំណាយរបស់កម្មករនយោជិតទាំងនោះ។
លោកនាយករដ្ឋមន្រ្តី ហ៊ុន សែន
ប្រធានសហភាពការងារកម្ពុជាលោក អាត់ ធន់ បានសាទរចំពោះយន្តការរបស់រដ្ឋាភិបាលដែលតម្រូវឲ្យមានការបើកប្រាក់បៀវត្សរ៍ជូនមន្រ្តីរាជការ និងកម្មករនយោជិត១ខែដងនេះ ដោយថា ការធ្វើបែបនេះកម្មករនយោជិតទាំងនោះនឹងទទួលបានផលប្រយោជន៍ច្រើន។ ប៉ុន្តែលោកថា តាមការស្ទង់មតិមានកម្មករមួយចំនួនគឺមិនចង់បើកប្រាក់ឈ្នួល១ខែពីរដងនោះទេដោយខ្លាច គ្រប់លុយមិនបានល្អហើយចាយអស់។
ប្រធានសហភាពការងារកម្ពុជាលោក អាត់ ធន់
ច្បាប់ស្តីពីការងារក្នុងមាត្រា១១៦ បានតម្រូវឲ្យម្ចាស់រោងចក្រ សហគ្រាសបើកប្រាក់ឈ្នួល២ដងក្នុង១ខែ ដោយក្រសួងការងារ បានកំណត់ឲ្យអនុវត្តតាំងពី២០១៧ ប៉ុន្តែលោក អាត់ ធន់ ថា តាមសង្កេតកន្លងមក គឺមិនទាន់មានស្ថាប័នណាមួយអនុវត្តតាម ច្បាប់នេះនៅឡើយទេ។
កាលខែមុនរដ្ឋសភាបានធ្វើវិសោធនកម្ម នៃច្បាប់ស្តីពីការងារលើ៨មាត្រាដោយបានសម្រេចទាំងស្រុង ហើយថាការធ្វើវិសោធនកម្មច្បាប់ការងារនោះក្នុងគោលដៅការពារផលប្រយោជន៍កម្មករ-កម្មការិនីខ្មែរពីការរត់ចោលរបស់ថៅកែរោងចក្រ ប៉ុន្តែជុំវិញការ កែប្រែច្បាប់នេះត្រូវបានអង្គការ និងសហជីពមួយចំនួនរិះគន់ថា ធ្វើឲ្យបាត់ផលប្រយោជន៍កម្មករមួយចំនួនទៅវិញ៕
