រដ្ឋមន្ត្រីក្រសួងបរិសា្ថន ស្នើទៅលោកនាយករដ្ឋមន្ត្រី ហ៊ុន សែន ឲ្យអនុញ្ញាតឲ្យក្រុមហ៊ុនគម្រោងវិនិយោគ អាចបន្តឈូសឆាយ និងកាប់ឈើនៅក្នុងដីសម្បទានសេដ្ឋកិច្ចដែលរដ្ឋាភិបាលផ្ដល់ឲ្យបាន ដោយថា ដើម្បីពន្លឿនការអនុវត្តគម្រោងរបស់ពួកគេឲ្យស្របទៅតាមផែការមេ។
ការស្នើសុំរបស់រដ្ឋមន្ត្រីក្រសួងបរិស្ថាននេះ ធ្វើឡើងបន្ទាប់ពីរាជរដ្ឋាភិបាលបានសម្រេចផ្អាកជាបណ្ដោះអាសន្ននូវការចេញលិខិតអនុញ្ញាតឲ្យដឹកជញ្ជូនផលអនុផលព្រៃឈើ ដែលបានមកពីការឈូសឆាយសម្អាតទីតាំងគម្រោងវិនិយោគសម្បទានដីសេដ្ឋកិច្ចកាលពីពេលកន្លងមក។
យោងតាមសំណើចុះថ្ងៃទី២៣ ខែសីហា ឆ្នាំ២០១៨ លោក សាយ សំអាល់ ឲ្យដឹងថា ក្រុមហ៊ុនមានភាពចាំបាច់ក្នុងការឈូសឆាយសម្អាតទីតាំងវិនិយោគ ព្រមទាំងប្រមូល និងដឹកជញ្ជូនផល និងអនុផលព្រៃឈើដែលបានមកពីការឈូសឆាយសម្បទានដីសេដ្ឋកិច្ច ដោយថា ដើម្បីពន្លឿនការអនុវត្តគម្រោងរបស់ខ្លួនឲ្យស្របទៅតាមផែនការមេ។
ក្រសួងថា ករណីនេះ ក្រសួងស្នើទៅលោកនាយករដ្ឋមន្ត្រី ហ៊ុន សែន សម្រេចអនុញ្ញាតឲ្យក្រុមហ៊ុនគម្រោងវិនិយោគសម្បទានដីសេដ្ឋកិច្ចបន្តឈូសឆាយទីតាំងវិនិយោគ ព្រមទាំងប្រមូល និងដឹកជញ្ជូនផលអនុផលព្រៃឈើដែលបានមកពីការឈូសឆាយក្រុមហ៊ុននោះផងដែរ។
មន្រ្តីពង្រឹងសិទ្ធិអំណាចសមាគមន៍នៅសមាគមន៍ការពារសិទ្ធិមនុស្សអាដហុក លោក ប៉ែន ប៊ុណ្ណារ៍ សម្ដែងករសោកស្ដាយចំពោះសំណើរបស់ក្រសួងបរិស្ថាននេះថា នឹងធ្វើឲ្យព្រៃឈើនៅប្រទេសកម្ពុជាប្រឈមនឹងបាត់បង់កាន់តែខ្លាំង ខណៈដែលការកាប់បំផ្លាញព្រៃឈើនៅតាមតំបន់ដែនជម្រសត្វសំខាន់កំពុងកើតឡើង ហើយអ្នកដែលកាប់បំផ្លាញព្រៃឈើទាំងអស់នោះ ភាគច្រើនជាមន្ត្រីមានអំណាចនៅក្នុងជួររាជរដ្ឋាភិបាលតែម្ដង។
មន្រ្តីពង្រឹងសិទ្ធិអំណាចសមាគមន៍នៅសមាគមន៍ការពារសិទ្ធិមនុស្សអាដហុក លោក ប៉ែន ប៊ុណ្ណារ៍
លោកបន្តថា កន្លងមកពួកគាត់បានដាក់ពាក្យបណ្ដឹងទៅតុលាការ និងរដ្ឋាភិបាលឲ្យចាត់វិធានការទៅលើមន្ត្រីរួចហើយក៏ដោយ ប៉ុន្តែ រហូតមកដល់ពេលនេះ រដ្ឋាភិបាលរួមទាំងតុលាការនៅតែមិនមានវិធានផ្លូវច្បាប់អ្វីទៅចំពោះមន្ត្រីទាំងអស់នោះ។
ប្រធានអង្គការកិច្ចការពិសេសសិទ្ធិមនុស្សកម្ពុជាដែលសកម្មក្នុងការការពារព្រៃឈើលោក អ៊ួច ឡេង យល់ថា ការសម្រេចផ្អាកមិនឲ្យក្រុមហ៊ុនប្រមូល និងដឹកជញ្ជូនផលអនុផលព្រៃឈើ កាលពីពេលកន្លងមក គឺធ្វើឡើងឲ្យតែល្អមើលតែប៉ុណ្ណោះ។
លោកចាត់ទុកការសំណើរបស់ក្រសួងបរិស្ថាននេះថា ជាការបើកផ្លូវឲ្យក្រុមហ៊ុនរកស៊ីកាប់បំផ្លាញព្រៃឈើកាន់តែច្រើនឡើងជាពិសេសតំបន់ដែនជម្រសត្វព្រៃ ខណៈមន្ត្រីជាន់រដ្ឋាភិបាលចំនួនជាអ្នករកស៊ីកាប់ឈើ។
ប្រធានអង្គការកិច្ចការពិសេសសិទ្ធិមនុស្សកម្ពុជាដែលសកម្មក្នុងការការពារព្រៃឈើលោក អ៊ួច ឡេង
លោកបន្តថា ព្រៃឈើនៅលើដីសម្បទានសេដ្ឋកិច្ចរបស់ក្រុមហ៊ុននោះ គឺមិនមានទៀតនោះទេ ដោយសារព្រៃឈើមាននាពេលបច្ចុប្បន្ននេះ គឺនៅតំបន់ដែនជម្រសត្វព្រៃតែប៉ុណ្ណោះ ហើយប្រសិនបើរដ្ឋាភិបាលអនុញ្ញាតឲ្យក្រុមហ៊ុនទាំងអស់នោះកាប់ឈើទៀតនោះ ព្រៃឈើនឹងវិនាសអស់នាពេលខាងមុខនេះ។
កាលពីដើមឆ្នាំ២០១៦ លោក ហ៊ុន សែន បានសម្រេចបង្កើតគណៈកម្មាធិការចម្រុះមួយ ដែលដឹកនាំដោយមេបញ្ជាការកងរាជអាវុធហត្ថជាតិ លោក សៅ សុខា ដើម្បីទប់ស្កាត់បទល្មើសព្រៃឈើ និងការរត់ពន្ធឈើខុសច្បាប់ទាំងអស់ទៅវៀតណាម។ កាលពីពេលនោះ លោកនាយករដ្ឋមន្ត្រី ក៏បានបញ្ជាទៅលោក សៅ សុខា ឲ្យបាញ់គ្រាប់រ៉ុកកែតពីលើឧទ្ធម្ភាគចក្រ នៅលើអ្នកលួចកាប់ឈើផងដែរ។
របាយការណ៍អង្គការណាសាចេញផ្សាយកាលពីឆ្នាំ២០១៧ បានឲ្យដឹងថា ព្រៃឈើនៅក្នុងប្រទេសកម្ពុជាកំពុងប្រឈមនឹងការកាប់បំផ្លាញយ៉ាងធ្ងន់ធ្ងរនៅប៉ុន្មានឆ្នាំចុងក្រោយនេះ។ របាយការណ៍បញ្ជាក់ថា ការកាប់បំផ្លាញព្រៃឈើក្នុងដីសម្បទានសេដ្ឋកិច្ចស្ថិតនៅចន្លោះពី ២៩ ទៅ ១០៥ភាគរយ ដោយសាររដ្ឋាភិបាលកម្ពុជាបានជួលដីទាំងនោះឲ្យទៅក្រុមហ៊ុនក្នុងស្រុក និងក្រុមហ៊ុនវិនិយោគបរទេស សម្រាប់វិស័យកសិកម្ម ការកាប់យកឈើលក់ និងមូលហេតុផ្សេងទៀត៕
