ក្រសួងបរិស្ថានបានប្រកាសថា នឹងចាត់វិធានទៅលើសកម្មភាពឈូសឆាយ និងរំលោភលើដីព្រៃស្ថិតក្នុងតំបន់ការពារនៅទូទាំងប្រទេស បន្ទាប់ពីរកឃើញថា តំបន់ការពារជាច្រើន ត្រូវបានរំលោភយក និងលក់ដូរដោយខុសច្បាប់។
ក្នុងសេចក្ដីជូនដំណឹងកាលពីថ្ងៃម្សិលមិញនេះ ក្រសួងបរិស្ថានបានអះអាងថា ដីព្រៃនៅឧទ្យានជាតិរាម ឧទ្យានជាតិបូកគោ និងឧទ្យានជាតិគិរីរម្យ បានរងការសកម្មភាពរំលោភបំពាន ដូចជាឈូសឆាយ កាប់ឆ្ការ កាន់កាប់ជាកម្មសិទ្ធិ និងលក់ដូរជាដើម។
ក្រៅពីឧទ្យានជាតិទាំង ៣នេះ ក្រសួងបរិស្ថានក៏បានរកឃើញសកម្មភាពរំលោភបំពានបែបនេះកើតមានឡើងនៅតំបន់ដែនជម្រកសត្វព្រៃលំផាត់ និងដែនជម្រកសត្វព្រៃស្រែពកផងដែរ។
ក្នុងសេចក្ដីជូនដំណឹងដដែលនេះ ក្រសួងបរិស្ថានបានប្រកាសឲ្យបញ្ឈប់សកម្មភាពរំលោភបំពានទៅលើដីព្រៃស្ថិតនៅក្នុងតំបន់ការពារទាំងនោះ។
ក្រសួងបានព្រមានថា នឹងចាត់វិធានការ«ម៉ឹងម៉ាត់បំផុត» ដើម្បីទប់ស្កាត់ និងបង្ក្រាបរាល់សកម្មភាពរំលោភបំពានលើដីព្រៃតំបន់ការពារ។
កាលពីដើមខែកញ្ញានេះ ក្រុមជនជាតិដើមភាគតិចនៅសហគមន៍សមុទ្រក្រោម ស្ថិតក្នុងស្រុកលំផាត់ បានដាក់ពាក្យបណ្ដឹងទៅតុលាការខេត្តរតនគិរី ដោយចោទប្រកាន់អាជ្ញាធរមូលដ្ឋានថា បានឃុបឃិតគ្នាលក់ដីព្រៃស្ថិតនៅតំបន់ការពារដែនជម្រកសត្វព្រៃលំផាត់ ទៅឲ្យឈ្នួលឯកជន។
អ្នកនាំពាក្យក្រសួងបរិស្ថានលោក សៅ សុភាព បានប្រាប់វីអូឌីតាមប្រព័ន្ធតេឡេក្រាមកាលពីថ្ងៃទី៣កញ្ញាថា មន្ទីរបរិស្ថាន និងអាជ្ញាធរខេត្តរតនគិរី បានទទួលព័ត៌មានស្ដីពីបញ្ហានេះហើយ ហើយលោកថា ស្ថាប័នទាំងពីរនេះ កំពុងតែសហការជាមួយព្រះរាជអាជ្ញាខេត្ត ដើម្បីចាត់វិធានការលើករណីនេះ៕
