ក្រុមកម្មកររាប់រយនាក់មកពីរោងចក្រកាត់ដេរ ជីម លី នៅរាជធានីភ្នំពេញ បានសម្រេចបើកផ្លូវឲ្យធ្វើចរាចរណ៍ឡើងវិញនៅម៉ោងជាង ១រសៀលថ្ងៃនេះ បន្ទាប់ពីមន្រ្តីក្រសួងការងារសន្យាយកប្រាក់បុរេប្រទានពីរដ្ឋាភិបាល ទៅដោះស្រាយសំណងជូនកម្មករទាំងនោះនៅពេលខាងមុខនេះ។
កម្មកររាប់រយនាក់មកពីរោងចក្រកាត់ដេរ ជីម លី ស្ថិតក្នុងសង្កាត់កំបូល ខណ្ឌពោធិ៍សែនជ័យ បានប្រមូលផ្តុំគ្នា បិទកំណាត់ផ្លូវជាតិលេខ ៤ ប្រហែល ៦ម៉ោង មិនឲ្យធ្វើចរាចរណ៍ ដើម្បីដាក់សម្ពាធទៅអាជ្ញាធរពាក់ព័ន្ធ ឲ្យពន្លឿនដោះស្រាយវិវាទការងារជូនពួកគេ ខណៈវិវាទនោះបានអូសបន្លាយជាង ១ខែគ្មានដំណោះស្រាយ។
កម្មការិនីម្នាក់ អ្នកស្រី ជុំ មុំ ដែលអះអាងថា បម្រើការងារនៅរោងចក្រ ជីម លី រយៈពេល ១០ឆ្នាំមកហើយនោះ បានឲ្យដឹងថា ក្រុមកម្មករបានតវ៉ាបិទកំណាត់ផ្លូវជាតិលេខ ៤ តាំងពីម៉ោង ៨ព្រឹក ហើយសម្រេចបើកវិញនៅម៉ោង ១រសៀលនេះ បន្ទាប់ពីមន្រ្តីក្រសួងការងារសន្យាយកថវិកាបុរេប្រទានមកដោះស្រាយសំណងជូនពួកគេ។
កម្មការនីរូបនេះបន្តថា ក្រុមកម្មករមិនចង់តវ៉ាបិទផ្លូវនោះទេ ប៉ុន្តែ ពួកគេគ្មានជំរើស ដោយថា កម្មករបានស្វែងរក និងរង់ចាំដំណោះស្រាយពីអាជ្ញាធរពាក់ព័ន្ធយូរហើយ ប៉ុន្តែ គ្មានដំណោះស្រាយទេ បានត្រឹមតែការសន្យាប៉ុណ្ណោះ។
កម្មការិនីម្នាក់ អ្នកស្រី ជុំ មុំ
អំឡុងពេលក្រុមកម្មករកំពុងតវ៉ាបិទផ្លូវនោះ មន្រ្តីអាជ្ញាធរខណ្ឌពោធិ៍សែនជ័យ និងមន្រ្តីក្រសួងការងារបានចុះទៅដំណោះស្រាយដល់រោងចក្រផ្ទាល់។
ក្រោយប្រជុំរកដំណោះស្រាយជាច្រើនម៉ោងនោះ អគ្គលេខាធិការដ្ឋាន នៃគណៈកម្មការសម្រាប់ដោះស្រាយបញ្ហាកូដកម្ម បាតុកម្មកនៅគ្រប់មុខសញ្ញា នៃក្រសួងការងារ បានចេញលិខិតមួយជូនកម្មករ ដោយសន្យាធ្វើសំណើរសុំប្រាក់បុរេប្រទានពីរដ្ឋាភិបាល ដើម្បីទូទាត់សំណងជូនកម្មករទាំងនោះ ឲ្យស្របតាមច្បាប់ស្តីពីការងារ និងសន្យាពន្លឿនដោះស្រាយវិវាទនេះផងដែរ។
អ្នកនាំពាក្យក្រសួងការងារ លោក ហេង សួរ ប្រាប់វីអូឌីតាមប្រពន្ធ WhatsApp បន្ថែមលើលិខិតនោះថា ក្រសួងនឹងចុះទៅដោះស្រាយទូទាត់ប្រាក់អតីតភាពការងារដល់ក្រុមកម្មករទាំងនោះទៅតាមប្រភេទកិច្ចសន្យា។
អ្នកនាំពាក្យក្រសួងការងារ លោក ហេង សួរ
ក្រុមកម្មករអះអាថា រោងចក្រ ជីម លី មានកម្មករប្រមាណ ២៥០០នាក់ ហើយរោងចក្រនេះបានប្តូរទីតាំង និងប្តូរឈ្មោះទៅជារោងចក្រ ជី ជី វិញ ដែលធ្វើឲ្យបាត់អត្ថប្រយោជន៍របស់កម្មករ ដោយថា ខាងក្រុមហ៊ុនមិនបានទូទាត់ប្រាក់អត្ថប្រយោជន៍ផ្សេងៗនៅរោងចក្រចាស់ជូនកម្មករទេ ដែលជាហេតុបណ្តាលឲ្យពួកគេផ្ទុះតវ៉ាបែបនេះ៕
