ប្រធានាធិបតីអាមេរិក លោក ដូណាល់ ត្រាំ រំពឹងថា ទំនាក់ទំនងពាណិជ្ជកម្មកម្ពុជា-អាមេរិក នឹងមានភាពរីកចម្រើនដោយសេរីត្រឹមត្រូវ កាន់តែប្រកបទៅដោយគណនេយ្យភាព និងអភិបាលកិច្ចតាមបែបប្រជាធិបតេយ្យ។ នេះបើតាមសេចក្ដីប្រកាសព័ត៌មានមួយរបស់ស្ថានទូតកម្ពុជាប្រចាំរដ្ឋធានីវ៉ាស៊ីងតោន កាលពីថ្ងៃម្សិលមិញនេះ។
សេចក្ដីប្រកាសព័ត៌មាននោះ ត្រូវបានផ្សព្វផ្សាយនៅលើគេហទំព័រស្ថានទូតកម្ពុជាប្រចាំអាមេរិក ក្រោយពីជំនួបរវាងប្រធានាធិបតីអាមេរិក លោក ដូណាល់ ត្រាំ និងអ្នកការទូតមកពី ១១ប្រទេស ក្នុងនោះមានទាំងអគ្គរាជទូតថ្មីរបស់កម្ពុជា លោក ជុំ សុន្ទរី ផងដែរ។
សេចក្ដីប្រកាសព័ត៌មានរបស់ស្ថានទូតកម្ពុជា បានរៀបរាប់ថា មេដឹកនាំអាមេរិកបានលើកឡើងពីការអភិវឌ្ឍផ្នែកសេដ្ឋកិច្ចរបស់កម្ពុជា និងសារៈសំខាន់នៃទំនាក់ទំនងកម្ពុជា-អាមេរិក នៅក្នុងរយៈពេល ២៥ឆ្នាំចុង ចាប់តាំងពីប្រទេសទាំងពីរបានភ្ជាប់ទំនាក់ទំនងជាមួយគ្នាឡើងវិញ។
លោក ដូណាល់ ត្រាំ ត្រូវបានដកស្រង់សម្ដីដែលនិយាយថា កម្ពុជាមានសក្ដានុពលសម្រាប់ការអភិវឌ្ឍកាន់តែអស្ចារ្យថែមទៀតនាពេលអនាគត ហើយថា អាមេរិករីករាយនឹងធ្វើការរួមគ្នានៅលើបញ្ហាប្រឈម និងឱកាសនានា។
បើសេចក្ដីប្រកាសព័ត៌មាននោះ លោក ត្រាំ ត្រូវបានដកស្រង់សម្ដីបន្តថា លោករំពឹងថា នឹងមានភាពរីកចម្រើនខាងពាណិជ្ជកម្មប្រកបដោយសេរីត្រឹមត្រូវ បញ្ហាសន្តិសុខក្នុងតំបន់ និងអភិបាលកិច្ចកាន់តែប្រកបដោយគណនេយ្យភាព និងបែបប្រជាធិបតេយ្យ។
ទំនាក់ទំនងកម្ពុជា-អាមេរិកបានធ្លាក់ដល់កម្រិតមួយទាបនៅក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីការបង្ក្រាបរបស់រដ្ឋាភិបាលកម្ពុជាទៅលើបក្សប្រឆាំង អង្គការសង្គមស៊ីវិល ក្រុមសិទ្ធិមនុស្ស និងប្រព័ន្ធផ្សព្វផ្សាយឯករាជ្យកម្ពុជា ដែលអាមេរិកចាត់ទុកវិធានការបែបនេះថា កម្ពុជាបានដើរឃ្លាតចាកពីគន្លងលទ្ធិប្រជាធិបតេយ្យ ប៉ុន្តែ ត្រូវបានរដ្ឋាភិបាលកម្ពុជាបដិសេធទៅវិញ។
ទោះជាយ៉ាងណា ទំហំពាណិជ្ជកម្មកម្ពុជា-អាមេរិក នៅតែបន្តកើនឡើងពីចំនយន ៣.១ពាន់លានដុល្លារកាលពីឆ្នាំ២០១៦ ទៅដល់ចំនួន ៣.៤ពាន់លានដុល្លារកាលពីឆ្នាំ២០១៧៕
