អាជ្ញាធរខេត្តរតនគិរី បានកោះហៅតំណាងម្នាក់របស់សហគមន៍ជនជាតិដើមភាគតិចទំពូន ឲ្យចូលបំភ្លឺ ក្រោមការសង្ស័យថា បានរំលោភបំពានដីព្រៃតំបន់ការពារ ប៉ុន្តែ តំណាងសហគមន៍បដិសេធ ហើយថា អាជ្ញាធរមូលដ្ឋានទៅវិញទេជាអ្នករំលោភបំពានដីព្រៃតំបន់ការពារ។
ក្នុងលិខិតចុះថ្ងៃទី១៤ ខែកញ្ញា ប្រធានការិយាល័យដែនជម្រសត្វព្រៃលំផាត់ លោក សាន សានី បានកោះហៅតំណាងជនជាតិដើមភាគតិចទំពូន លោក ខាំ នីន ដែលរស់នៅភូមិកែងសាន់ ស្ថិតក្នុងឃុំសេដា ស្រុកលំផាត់ ឲ្យចូលទៅបំភ្លឺនៅការិយាល័យដែនជម្រកសត្វព្រៃលំផាត់ នៅព្រឹកថ្ងៃស្អែកនេះ។
បើតាមលិខិតដដែលនោះ តំណាងសហគមន៍ជនជាតិដើមភាគតិចរូបនេះ ត្រូវបានសង្ស័យថា ពាក់ព័ន្ធនឹងករណីបានកាប់គាស់ រុករាន និងឆ្ការដីព្រៃនៅតំបន់ការពារ យកធ្វើជាកម្មសិទ្ធិ កាលពីថ្ងៃទី០៧ ខែកញ្ញា។
ប្រធានការិយាល័យដែនជម្រសត្វព្រៃលំផាត់ លោក សាន សានី បានប្រាប់វីអូឌីនៅថ្ងៃនេះ លោកបានចេញលិខិតកោះហៅតំណាងសហគមន៍រូបនេះ បន្ទាប់ពីមានបណ្ដឹងពីប្រជាពលរដ្ឋ។
ប្រធានការិយាល័យដែនជម្រសត្វព្រៃលំផាត់ លោក សាន សានី
ប្រាប់វីអូឌីតាមទូរស័ព្ទនៅថ្ងៃនេះ លោក ខាំ នីន បានឲ្យដឹងថា លោកនឹងចូលខ្លួនទៅបកស្រាយអំពីករណីនេះ ប៉ុន្តែ លោកបដិសេធថា លោកពុំបានរំលោភបំពានដីព្រៃនៅតំបន់ការពារនោះឡើយ។
ជនជាតិដើមភាគតិចរូបនេះ ចាត់ទុកលិខិតកោះហៅនេះថា ជាការសងសឹកទៅនឹងរូបលោក ក្រោយពីលោកបានប្រាប់ទៅសារព័ត៌មាន និងអង្គការស៊ីវិល អំពីការរំលោភបំពានដីព្រៃតំបន់ការពារ ដែលលោកថា មានពាក់ព័ន្ធនឹងមេភូមិកែងសាន់ និងអាជ្ញាធរផ្សេងទៀតនៅឃុំសេដា។
ជនជាតិដើមភាគតិចលោក ខាំ នីន
មន្ត្រីសម្របសម្រួលនៃសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី បង្ហាញការសោកស្ដាយ ហើយចាត់ទុកការកោះហៅនេះ ជាការបំបិតបំភ័យ និងគំរាមកំហែងសកម្មជនការពារព្រៃឈើដ៏ឆ្នើមនៅក្នុងភូមិកែងសាន់នោះ។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី
លោក ខាំ នីន អះអាងថា កាលពីឆ្នាំ២០១៤ ដីព្រៃការពារស្ថិតនៅក្នុងឃុំសេដា មានទំហំ ៤០០០ហិកតា ប៉ុន្តែ បច្ចុប្បន្ន នៅសល់តែជាង ១០០០ហិកតាប៉ុណ្ណោះ។
កាលពីថ្ងៃទី១២ ខែកញ្ញា ឆ្នាំ២០១៨ ក្រសួងបរិស្ថានបានប្រកាសថា នឹងចាត់វិធានទៅលើសកម្មភាពឈូសឆាយ និងរំលោភលើដីព្រៃស្ថិតក្នុងតំបន់ការពារនៅទូទាំងប្រទេស បន្ទាប់ពីរកឃើញថា តំបន់ការពារជាច្រើន ត្រូវបានរំលោភយក និងលក់ដូរដោយខុសច្បាប់នោះ៕
