មន្ត្រីជាន់ខ្ពស់ក្រសួងរៀបចំដែនដី អះអាងថា រដ្ឋាភិបាលមិនមានវិធានផ្លូវច្បាប់ទៅលើភរិយាសមាជិកព្រឹទ្ធសភាមកពីបក្សកាន់អំណាច ដែលត្រូវបានរកឃើញថា បានចាក់ដីលុបឆ្នេរសមុទ្រខេត្តព្រះសីហនុនោះឡើយ ដោយថា គ្រាន់តែឲ្យក្រុមហ៊ុននោះ កាយដីដែលបានចាក់លុបនោះ ចេញពីឆ្នេរសមុទ្រវិញតែប៉ុណ្ណោះ។
ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីប្រកាសព័ត៌មានកាលពីថ្ងៃទី១៨កញ្ញាថា លោក ហ៊ុន សែន បានចេញបញ្ជាទៅរដ្ឋមន្ត្រីក្រសួងដែនដី លោក ជា សុផារ៉ា ឲ្យចុះត្រួតពិនិត្យឆ្នេរព្រែកត្រែង ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ហើយបានរកឃើញថា ឆ្នេរសមុទ្រមួយនេះ ត្រូវបានចាក់ដីលុបពីសំណាក់ក្រុមហ៊ុនរបស់អ្នកស្រី ជឹង សុភាព ភរិយារបស់លោក ឡៅ ម៉េងឃីន សមាជិកព្រឹទ្ធសភាមកពីគណបក្សប្រជាជនកម្ពុជា។
បន្ទាប់ពីមានបញ្ជានេះ ក្រសួងធនធានទឹក ក្រសួងបរិស្ថាន ក្រសួងទេសចរណ៍ និងក្រសួងដែនដី បានប្រកាសចាត់វិធានការលើក្រុមហ៊ុនដែលបានចាក់ដីលុបព្រែកត្រែងនេះ។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត ប្រាប់វីអូឌីនៅថ្ងៃនេះថា ការចាក់ដីលុបឆ្នេរព្រែកត្រែងកន្លងមក មិនមានច្បាប់អនុញ្ញាតនោះទេ។ លោកបន្តថា ក្រសួងមិនមានចាត់វិធានការផ្លូវច្បាប់ទៅលើក្រុមហ៊ុននោះទេ ដោយគ្រាន់តែឲ្យក្រុមហ៊ុនកាយដីចេញពីឆ្នេរសមុទ្រនេះ ឲ្យមានលក្ខណៈធម្មជាតិដូចសភាពដើមវិញ។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត
អភិបាលខេត្តព្រះសីហនុ លោក យន្ត មីន មានប្រសាសន៍ថា ក្រសួង និងអាជ្ញាធរ បានឲ្យក្រុមហ៊ុនកាយដីនោះចេញពីឆ្នេរសមុទ្រវិញខ្លះហើយ ប៉ុន្តែ លោកមិនទាន់ដឹងថា អាចម៍នោះត្រូវបានកាយចេញអស់ហើយ ឬនៅនោះទេ។
អភិបាលខេត្តព្រះសីហនុ លោក យន្ត មីន
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ចាត់ទុកការអនុវត្តច្បាប់របស់រដ្ឋាភិបាលនាពេលបច្ចុប្បន្ននេះ មានស្តង់ដារពីរ ដោយថា បើករណីនេះ ប្រជាពលរដ្ឋសាមញ្ញវិញ ពួកគេនឹងទទួលទោស ប៉ុន្តែ សម្រាប់អ្នកមានអំណាចវិញ ពួកគេតែងតែរួចខ្លួន។ លោកបន្តថា ប្រសិនបើរដ្ឋាភិបាលមិនមានវិធានផ្លូវច្បាប់ ចំពោះអ្នកដែលរំលោភលើដីឆ្នេរសមុទ្រដូចពេលនេះទេ ករណីនឹងកើតឡើងនៅពេលក្រោយៗទៀត។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ
លោកមេធាវី សុក សំអឿន បានឲ្យដឹងថា ប្រសិនបុគ្គលម្នាក់រំលោភដីសាធារណៈរបស់រដ្ឋ បុគ្គលនោះអាចទទួលទោស ឬទទួលរងពិន័យតាមច្បាប់ភូមិបាល ប៉ុន្តែ បុគ្គលរំលោភដីរដ្ឋ ហើយតែមិនត្រូវបានដាក់ទោស លោកថា ការអនុវត្តច្បាប់នាពេលបច្ចុប្បន្ន មិនទាន់មានតម្លភាពនៅឡើយ។
លោកមេធាវី សុក សំអឿន
បើតាមច្បាប់ភូមិបាលឆ្នាំ២០០១ មាត្រា ២៥៩ ចែងថា ការប៉ះពាល់កម្មសិទ្ធិនៃទ្រព្យសម្បត្តិសាធារណៈ ត្រូវផ្ដន្ទាទោសពិន័យជាប្រាក់ ៥,០០០,០០០ រៀល (ប្រាំលានរៀល) ដល់ ៥០, ០០០,០០០ រៀល (ហាសិបលានរៀល) ឬ /និងផ្ដន្ទាទោសពី ១ ឆ្នាំដល់ ៥ឆ្នាំ៕
