សមាគមមួយដែលធ្វើការគាំពារអ្នកប្រកបរបរសេដ្ឋកិច្ចក្រៅប្រព័ន្ធ បានស្នើទៅរដ្ឋាភិបាល ឲ្យបន្តផ្តល់បណ្ណធានារ៉ាប់រងសុខភាពដល់អ្នករើសអេតចាយ ដោយថា អ្នកទាំងនោះកំពុងប្រឈមនឹងបញ្ហាសុខភាពធ្ងន់ធ្ងរ។
ក្នុងលិខិតមួយចុះថ្ងៃទី៣ ខែតុលា សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានស្នើទៅបេឡាជាតិនៃរបបសន្តិសុខសង្គមបន្តផ្តល់បណ្ណសមធម៌ដល់អ្នកប្រកបរបរើសអេតចាយ។
ក្នុងលិខិតនោះ សមាគមបានលើកឡើងថា អ្នកប្រកបរបររើសអេតចាយដែលជាសមាជិករបស់ខ្លួនកំពុងប្រឈមនឹងបញ្ហាជាច្រើនដូចជា ជួបគ្រោះថ្នាក់ចរាចរណ៍ កើតជំងឺផ្សេងៗជាដើម។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ បន្ថែមលើខ្លឹមសារលិខិតថា អ្នកប្រកបរបរើសអេតចាយគឺជាអ្នកក្រីក្រដែលពុំមានលទ្ធិភាពសម្រាប់ចំណាយពេលពួកគេឈឺនោះទេ។
លោក វន់ ពៅ ឲ្យដឹងថា កាលមុខបោះឆ្នោតរដ្ឋាភិបាលបានសម្រេចផ្តល់បណ្ណធានារាប់រងសុខភាពដល់អ្នកប្រកបរបររើសអេតចាយទាំងនោះ ប៉ុន្តែក្រោយបោះឆ្នោតរួចរដ្ឋាភិបាលបែរជាផ្អាកផ្តល់បណ្ណនោះវិញ ដែលធ្វើឲ្យអ្នកប្រកបរបរសេដ្ឋកិច្ចក្រៅប្រព័ន្ធទាំងនោះជួបការលំបាកជាច្រើន។
លោកបន្ថែមថា៖«យើងមើលឃើញថា អ្នករើសអេតចាយហ្នឹងគាត់ទទួលរងគ្រោះនូវហានិភ័យជាច្រើនទាក់ទងនឹងអនាម័យគាត់ បានខូចសុខភាព ព្រោះកន្លែងរើសអេតចាយជាកន្លែងគគ្រិច មានអ្នកមួយចំនួនឈឺច្រើនមែនទែន ដោយសារគាត់រើសអេតចាយកន្លែងគំនរសំរាមទឹកស្អុយហូរលើខ្លួនគាត់បណ្តាលឲ្យគាត់ខូចសុខភាព។ ហើយគាត់រើសអេតចាយមួយថ្ងៃសម្រាប់តែមួយថ្ងៃប៉ុណ្ណោះ អញ្ចឹងអត់មានលទ្ធភាពពេលគាត់ឈឺទៅព្យាបាលឡើយ។ ដូច្នេះបានជាយើងតម្រូវឲ្យក្រសួងហ្នឹងធ្វើយ៉ាងណា បញ្ចូលពួកគាត់ឲ្យទទួលបានមូលនិធិសមធម៌ហ្នឹង»។
អ្នកនាំពាក្យបេឡាជាតិ នៃរបបសន្តិសុខសង្គមលោក ជាវ ប៊ុនរិទ្ធ ប្រាប់វីអូឌីថា លោក មិនទាន់ទទួលបានលិខិតនេះនៅឡើយទេ ដូច្នេះលោកមិនទាន់អាចឆ្លើយបានទេ។
លោកបន្ថែមថា៖«ខ្ញុំនៅខាង ប.ស.ស មិនបានដឹង មិនទាន់ទទួលបានលិខិតនោះផង»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ឲ្យដឹងថា បច្ចុប្បន្នសមាគមរបស់លោកចង់អ្នករើសអេតចាយជាសមាជិកបានជាង២០០នាក់ ក្នុងនោះអ្នកទទួលបានបណ្ណធានារាប់រងសុខភាពមានជាង១០០នាក់ ដែលរដ្ឋាភិបាលផ្តល់ឲ្យកាលមុនបោះឆ្នោត៕
