លោកនាយករដ្ឋមន្ត្រី ហ៊ុន សែន បានបង្ហើបឲ្យដឹងថាប្រាក់ខែឈ្នួលរបស់កម្មករសម្រាប់ឆ្នាំ២០១៩ នឹងមិនក្រោម១៨០ដុល្លារឡើយ។
ការថ្លែងបែបនេះរបស់លោកនាយករដ្ឋមន្ត្រី ហ៊ុន សែន ធ្វើឡើងនៅវិទ្យាស្ថានជាតិអប់រំក្នុង «ទិវាគ្រូបង្រៀនពិភពលោក» ព្រឹកនេះ ស្របពេលដែលក្រុមសហជីព ក្រុមនិយោជក និង តំណាងក្រសួងការងារ និងបណ្តុះបណ្តាលវិជ្ជាជីវៈ នឹងចរចាសម្រេចគ្នាចុងក្រោយពីប្រាក់ខែគោលអប្បរមារបស់កម្មករនៅរសៀលថ្ងៃទី៥ ខែតុលា ឆ្នាំ២០១៨នេះ។
កិច្ចប្រជុំចរចាក្រុមការងារបច្ចេកទេសត្រីភាគីកាលពីថ្ងៃទី៤ ខែតុលា ភាគីនិយោជកបានផ្តល់ឲ្យខែគោលចំនួន១៧៧ដុល្លារ ។ ដោយឡែកភាគីកម្មករនិយោជិត មានតួលេខ២ ក្នុងនោះតួលេខទី១ស្នើ ១៨២ដុល្លារ និងទី២ ស្នើចំនួន១៨៩ដុល្លារ និងអមដោយសំណើរមួយចំនួនទៀត។ រីឯភាគីរាជរដ្ឋាភិបាលគឺរក្សាផ្តល់ជូន១៧៧ដុល្លារ។ តួលេខនេះ គឺមិនទាន់ឯកភាពគ្នានៅឡើយ។
យ៉ាងនេះក្តី រាជរដ្ឋាភិបាល នឹងពិចារណាចំពោះសំណើររបស់ភាគីទាំងពីរ នៅថ្ងៃទី៥ ខែតុលា ឆ្នាំ២០១៨ វេលាម៉ោង២រសៀល ក្រុមប្រឹក្សាការងារនឹងប្រជុំសម្រេចយកតួលេខចុងក្រោយ ហើយនឹងចេញប្រកាសដើម្បីអនុវត្តប្រាក់ឈ្នួលអប្បរមាថ្មីនេះចាប់នៅថ្ងៃទី០១ ខែមករា ឆ្នាំ២០១៩៕
