លោក គឹម សុខ និងកូនស្រីរបស់លោក ទទួលបានសិទ្ធិជ្រកកោនផ្នែកនយោបាយទៅរស់នៅប្រទេសហ្វាំងឡង់។
អតីតមន្ដ្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរនៅលើទំព័រហ្វេសប៊ុករបស់លោកកាលពីម្សិលមិញថា អ្នកវិភាគនយោបាយនិងបញ្ហាសង្គម លោក គឹម សុខ និងកូនស្រី បានទទួលសិទ្ធិជ្រកកោននយោបាយទៅរស់នៅក្នុងប្រទេសហ្វាំងឡង់។ ប្រភពដដែលបានឲ្យដឹងថា លោកលោក គឹម សុខ និងកូនស្រីរបស់លោកបានចាកចេញពីប្រទេសថៃឆ្ពោះទៅកាន់ប្រទេសហ្វាំងឡង់កាលពីយប់ម្សិលមិញនេះ។
កាលពីថ្ងៃទី១៧ខៃសីហាឆ្នាំ២០១៨ លោក គឹម សុខ ត្រូវបានដោះលែងឲ្យមានសេរីភាព បន្ទាប់អនុវត្តទោស១៨ខែរួចរាល់ ក្រោមការចោទរបស់រដ្ឋាភិបាលពីបទ «បរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ប៉ុន្តែក្រោយពីចេញពីពន្ធនាគារមិនដល់ពីរសប្ដាហ៍ផង លោក គឹម សុខ ត្រូវបានលោកនាយករដ្ឋមន្ដ្រី ហ៊ុន សែន ព្រមានថានឹងចាប់ដាក់ពន្ធនាគារម្ដងទៀត ប្រសិនបើអ្នកវិភាគនយោបាយរូបនេះមិនសងប្រាក់ចំនួន ៨០០លានរៀលឲ្យទៅគណបក្សកាន់អំណាចក្នុងសំណុំរឿងដែលបក្សនេះប្តឹងលោក គឹម សុខ ដែលបានអត្ថាធិប្បាយចោទប្រកាន់គណបក្សកាន់អំណាច ថាជាអ្នកបង្កើតប្រព័ន្ធសម្លាប់មនុស្ស តែរកឃាតករមិនឃើញ។ មួយថ្ងៃក្រោយការគំរាមរបស់លោកនាយរដ្ឋមន្រ្តី ហ៊ុន សែន ពោលគឺនៅថ្ងៃទី៣០ ខែសីហា លោក គឹម សុខ បាននាំកូនស្រី ភៀសខ្លួនទៅកាន់ប្រទេសថៃ៕
