មន្ត្រីជាន់ខ្ពស់អះអាងថា រដ្ឋាភិបាលគ្រោងចំណាយថវិកា១លាន៣សែនដុល្លារ សម្រាប់ធ្វើអង្កេតចន្លោះជំរឿនកសិកម្មនៅទូទាំងប្រទេស ដោយថាដើម្បីជួយកាត់បន្ថយភាពក្រីក្រជូនប្រជាពលរដ្ឋរស់នៅតំបន់ជនបទ។
មន្ត្រីរូបនោះបញ្ជាក់ថា ការអង្កេតនេះ នឹងធ្វើការប្រមូលទិន្នន័យដែលគ្របដណ្តប់ទៅលើវិស័យកសិម្មដូចជា ការធ្វើស្រែចំការ ដាំដំណាំ ចិញ្ចឹមសត្វ កៅស៊ូ កសិកម្មបែបពាណិជ្ជកម្ម កម្ចីហិរញ្ញវត្ថុខ្នាតតូច សម្រាប់វិនិយោគលើសកម្មភាពកសិកម្មទាំងលក្ខណៈគ្រួសារ និងក្រុមហ៊ុនជាដើម។
ក្នុងសិក្ខាសាលាស្តីពីអ្នកផលិត អ្នកប្រើប្រាស់ទិន្នន័យ និងពិធីចុះហត្ថលេខាលើកិច្ចព្រមព្រៀងអនុវត្តន៍គម្រោងអង្កេតចន្លោះជំរឿនកសិកម្មឆ្នាំ២០១៩ ជាមួយតំណាងអង្គការស្បៀង និងកសិកម្មនៃសហប្រជាជាតិ ហៅកាត់ថា (FAO) ទេសរដ្ឋមន្ត្រី រដ្ឋមន្ត្រីក្រសួងផែនការ លោក ឆាយ ថន ថ្លែងថា ជំរឿនកសិកម្ម អង្កេត និងទិន្នន័យកសិកម្ម ជាប្រភពសំខាន់សម្រាប់ផ្តល់ទិន្នន័យពាក់ព័ន្ធវិស័យកសិកម្មទៅដល់អ្នកប្រើប្រាស់ទិន្នន័យស្ថិតិ ដើម្បីងាយស្រួលដល់អ្នកកសាងគោលនយោបាយអភិវឌ្ឍវិស័យកសិកម្ម និងអ្នករៀបចំផែនការយុទ្ធសាស្ត្រ ចាប់ពីថ្នាក់ជាតិរហូតដល់ថ្នាក់ក្រោមជាតិ។
ករណីនេះ លោក ឆាយ ថន អះអាងថា រដ្ឋាភិបាលត្រូវចំណាយថវិកា១លាន ៣សែនដុល្លារ ជួយដល់ វិស័យនេះ ដើម្បីកាត់បន្ថយភាពក្រីក្រជូនប្រជាពលរដ្ឋដែលរស់នៅតាមជនបទ។
លោកថ្លែងបែបនេះថា«ជំរឿនកសិកម្ម អង្កេតកសិកម្ម និងទិន្នន័យកសិកម្ម រដ្ឋបាលដទៃទៀត គឺជាប្រភពដ៏សំខាន់សម្រាប់ផ្តល់ទិន្នន័យដែលពាក់ព័ន្ធលើវិស័យកសិកម្មទៅដល់អ្នកប្រើប្រាស់ទិន្ន័យស្ថិតិដូចជា អ្នកកសាងគោលនយោបាយអភិវឌ្ឍវិស័យកសិកម្ម សម្រាប់គាំទ្រទៅដល់គោលនយោបាយរបស់រាជរដ្ឋាភិបាលកម្ពុជាក្នុងការកាត់បន្ថយភាពក្រីក្ររបស់ប្រជាជនដែលរស់នៅតាមតំបន់ជនបទ»។
មន្ត្រីរដ្ឋាភិបាលរូបនោះអះអាងថា ថវិកាដែលត្រូវចំណាយ១លាន ៣សែនដុល្លារនោះ បានមកពីម្ចាស់ជំនួយ តំណាងអង្គការស្បៀង និងកសិកម្មនៃសហប្រជាជាតិ ហៅកាត់ថា (FAO) និងដៃគូអភិវឌ្ឍន៍ផ្សេងទៀត រួមទាំងបដិភាគរបស់រដ្ឋាភិបាលជាដើម។
តំណាង(FAO) ប្រចាំកម្ពុជា លោក Alexander Huynh ថ្លែងតាមរយៈអ្នកបកប្រែភាសាខ្មែរក្នុងសិក្ខាសាលានោះថា ពិធីចុះហត្ថលេខាក្នុងកិច្ចព្រមព្រៀងនាថ្ងៃនេះ ជាជំហានមួយសម្រាប់ធ្វើឲ្យប្រសើរឡើងនៃស្ថិតិកសិកម្មនៅកម្ពុជា និងរួមចំណែកកាត់បន្ថយភាពក្រីក្រ។
លោកថ្លែងថា«បើយើងមើលតួលេខវាជាការវិនយោគតូចទេ ប៉ុន្តែប្រសិនបើយើងមិនមានទិន្នន័យល្អ វាពិបាកណាស់ក្នុងការសម្រេចឲ្យបាននូវចំណូលដែលរដ្ឋាភិបាលកំពុងទទួលបានខ្ពស់នេះ ដូច្នេះខ្ញុំគិតថា គម្រោង ឬកម្មវិធីនេះ មានសារៈសំខាន់ ជាឧបករណ៍សំខាន់សម្រាប់ ប្រទេសកម្ពុជា ក្នុងការសម្រេចគោលដៅរបស់ខ្លួន»។
ក្រសួងផែនការបានឲ្យដឹងថា គម្រោងចុះអង្កេតចន្លោះជំរឿនកសិកម្មនេះមានរយៈពេល១០ឆ្នាំ ហើយក្រសួងនឹងចាប់ផ្តើមអនុវត្តការងារនៅដើមឆ្នាំ២០១៩ និងប្រមូលទិន្នន័យនៅខែ៦ ឆ្នាំដដែល ដោយចុះអង្កេត និងធ្វើជំរឿនស្ថិតិប្រជាពលរដ្ឋចំនួន៨០០ភូមិ ក្នុងមួយភូមិ២០គ្រួសារ សរុប១៦០០០គ្រួសារនៅទូទាំងប្រទេស ដោយប្រើប្រាស់មន្ត្រីក្រសួងផែនការ និងមន្ត្រីក្រសួងកសិកម្ម។
ករណីនេះ នាយិកាប្រតិបត្តិ នៃអង្គការសេដាក លោកស្រី តុង ចាន់ធាង មានប្រសាសន៍ថា ដើម្បីអនុវត្តគម្រោងអង្កេតចន្លោះជំរឿនកសិកម្មនេះឲ្យមានតម្លាភាព រដ្ឋាភិបាលត្រូវបើកទូលាយឲ្យមានដៃគូអភិវឌ្ឍជាតិ អន្តរជាតិ នឹងអ្នកស្រាវជ្រាវឯករាជ្យចូលរួមធ្វើការងារនេះ។
លោកស្រីមានប្រសាសន៍ថា«បើតាមខ្ញុំគិតអាច ជួលអ្នកឯករាជ្យពីខាងក្រៅ ក្នុងការចុះធ្វើការងារនេះ ដោយសហការជាមួយមន្ត្រីរដ្ឋាភិបាល វាជាការល្អដើម្បីយើងបានតួលេខពិតប្រាកដ ជាក់លាក់ គឺយើងងាយស្រួលរៀបចំផែនការ យុទ្ធសាស្ត្រសម្រាប់ធ្វើការអភិវឌ្ឍ នៅក្នុងវិស័យកសិកម្មនេះ»។
បើតាមទិន្នន័យដែលបានមកពីការធ្វើជំរឿនកសិកម្មរបស់ក្រសួងផែនការលើកដំបូងរបស់ប្រទេសកម្ពុជាកាលពីឆ្នាំ២០១៣ ចំនួនគ្រួសារសរុបនៅកម្ពុជាប្រមាណជា៨៥% ប្រកបមុខរបរកសិកម្ម ដូចជា ធ្វើស្រែចំការ ដាំដំណាំ ចិញ្ចឹមសត្វ និងធ្វើនេសាទជាដើម៕
