រដ្ឋាភិបាលកម្ពុជា គ្រោងបញ្ជូនពលករខ្មែរចំនួន៥ពាន់នាក់ ឲ្យទៅបម្រើការងារនៅប្រទេសគុយវ៉ែត ស្ថិតនៅឆ្នាំ២០១៩ខាងមុខ ខណៈដែលចំនួនពលករទៅបម្រើការងារនៅប្រទេស នឹងត្រូវបានជំរុញឲ្យបញ្ជូនបន្ថែមទៀត។
ក្នុងសេចក្ដីប្រកាសព័ត៌មានរបស់ក្រសួងការងារកាលពីម្សិលមិញ បន្ទាប់ពីមានជំនួបជាមួយរដ្ឋមន្ត្រីក្រសួងការងារនៃប្រទេសគុយវ៉ែត លោកស្រី Hend Subaih B ALSUBAIH រួចមក រដ្ឋមន្ត្រីក្រសួងការងារកម្ពុជា លោក អ៊ិត សំហេង បានបញ្ជាក់ប្រាប់ក្រុមអ្នកសារព័ត៌មានថា នៅឆ្នាំ២០១៩ខាងមុខ កម្ពុជានឹងបញ្ជូនពលកររបស់ខ្លួនចំនួន៥ពាន់នាក់ ឲ្យទៅបម្រើការងារលើកដំបូងនៅប្រទេសស្ថិតក្នុងតំបន់អារ៉ាប់មួយនេះ ខណៈនឹងជំរុញឲ្យមានការនាំពលករទៅប្រទេសនេះបន្ថែមទៀត។
ក្រសួងការងារបានដកស្រង់ប្រសាសន៍របស់លោក អ៊ិត សំហេង ដែលថ្លែងថា៖
«កម្ពុជានឹងរៀបចំកម្លាំងពលកម្មរបស់ខ្លួន ដែលបានជ្រើសរើសគ្រប់លក្ខខណ្ឌចំនួន ៥ពាន់នាក់ ជាលើកដំបូង ទៅបម្រើការងារនៅប្រទេសគុយវ៉ែត ហើយកម្លាំងពលកម្មនេះ ជាកម្លាំងពលកម្មគ្រប់ផ្នែក ទាំងផ្នែកសេវាកម្ម ឧស្សាហកម្ម និងកសិកម្ម។ ប្រសិនបើស្ថានភាពនៅប្រទេសគុយវ៉ែតល្អប្រសើរ ស្របទៅនឹងអ្វីដែលពលករកម្ពុជាទទួលយកបាន មានលក្ខខណ្ឌការងារល្អ ប្រាក់ឈ្នួលសមរម្យនោះ រាជរដ្ឋាភិបាលកម្ពុជានឹងជំរុញឱ្យមានការបញ្ជូននេះឱ្យបានកាន់តែច្រើន»។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានបង្ហាញក្ដីបារម្ភអំពីការរំលោភបំពានសិទ្ធិពលករកម្ពុជា ខណៈដែលលោកថា របាយការណ៍បង្ហាញថា ប្រទេសគុយវ៉ែតមានការរំលោភសិទ្ធិមនុស្សជាច្រើន ហើយប្រទេសនេះទៀតសោត ពុំមានប្រព័ន្ធច្បាប់ដើម្បីលើកកម្ពស់សិទ្ធិកម្មករនោះទេ។
លោកថា៖ «កន្លងមក យើងអត់ដែលបានដឹងថា តើកម្ពុជាបានចរចាជាមួយគុយវ៉ែតហ្នឹងបានធានានូវសិទ្ធិប៉ុណ្ណា ហើយបានដាក់នៅក្នុងយន្តការ ឬក៏កិច្ចព្រមព្រៀងដែលមានលក្ខណៈចាប់បង្ខំផ្លូវច្បាប់ដើម្បីតម្រូវឲ្យប្រទេសគុយវ៉ែតហ្នឹង ធានាឲ្យមានប្រព័ន្ធច្បាប់ការពារ ប្រព័ន្ធច្បាប់លើកស្ទូយសិទ្ធិពលករ កម្មករអីហ្នឹង យើងអត់ទាន់ឃើញ»។
លោក មឿន តលា ស្នើទៅរដ្ឋាភិបាលឲ្យពិចារណាបង្កើតកម្មករជំនាញឲ្យធ្វើការក្នុងស្រុកវិញ ជាជាងបញ្ជូនពលរដ្ឋឲ្យទៅធ្វើការនៅក្រៅប្រទេស ហើយក្នុងប្រទេសបែរជាយកពលរដ្ឋដទៃមកធ្វើការនោះ ដែលលោកចាត់ទុកថា ជានយោបាយដើរបញ្ច្រាសទិស។
លោកថា៖ «ជួយគាត់ឲ្យជាកម្មករមួយក្នុងស្រុកទៅ បើអត់ជួយគិតគូរដល់ពួកគាត់ ពួកគាត់មកពីថៃទៅកូរ៉េ មកពីកូរ៉េទៅថៃ ទៅម៉ាឡេ ឬទៅគុយវ៉ែតអីអញ្ចឹងទៅ។ អញ្ចឹងរាប់ឆ្នាំទៅមុខទៀត ទីបំផុត គឺប្រទេសយើងវាអត់មានជនជាតិខ្លួនឯង វាទៅជាជនជាតិបរទេសមកធ្វើការក្នុងស្រុកវិញ»។
របាយការណ៍លទ្ធផលនៃសន្និបាតបូកសរុបការងាររបស់ក្រសួងការងារ និងបណ្តុះបណ្តាលវិជ្ជាជីវៈ ចេញកាលពីថ្ងៃទី១៣ ខែមីនា ឆ្នាំ២០១៨ បង្ហាញថា រដ្ឋាភិបាលកម្ពុបានផ្តល់សេវាស្វែងរកការងារធ្វើនៅក្រៅប្រទេសដល់ពលរដ្ឋចំនួនជាង ១,២ លាននាក់។ ក្នុងចំណោមពលករទាំង ១,២លាននាក់នោះ កម្ពុជាបានបញ្ជូនពលករទៅប្រទេសថៃចំនួនជាង ១លាននាក់ កូរ៉េខាងត្បូងចំនួន ៤ម៉ឺននាក់ ប្រទេសជប៉ុនចំនួន ៦ពាន់នាក់ ម៉ាឡេស៊ីចំនួន ៣ម៉ឺននាក់ ប្រទេសសិង្ហបុរីចំនួនជិត ៥០០នាក់ និងបានចាប់ផ្ដើមបញ្ជូនពលការិនីចំនួន ១៥នាក់ ទៅតំបន់រដ្ឋបាលពិសេសហុងកុង៕
