រដ្ឋបាលខេត្តកំពង់ស្ពឺប្រកាសដកហូតលិខិតសម្គាល់សិទ្ធិ កាន់កាប់ប្រើប្រាស់ដីធ្លីនិងបញ្ឈប់ការចូលទន្ទ្រានកាន់កាប់ដីព្រៃក្នុងដែនឧទ្យានជាតិចំនួនបីកន្លែង និងដីដែនជម្រកសត្វព្រៃមួយកន្លែងទៀត។
សេចក្តីជូនដំណឹងបួនដាច់ដោយឡែកពីគ្នាកាលពីថ្ងៃទី២៦ ខែតុលា ឆ្នាំ២០១៨ អភិបាលខេត្តកំពង់ស្ពឺ លោក វ៉ី សំណាង បានឲ្យដឹងពីការដកហូតលិខិតសម្គាល់សិទ្ធិកាន់កាប់ប្រើប្រាស់ដីធ្លីនិងបញ្ឈប់ការចូលទន្ទ្រានកាន់កាប់ដីព្រៃក្នុងខេត្តកំពង់ស្ពឺរួមមាន ដែនឧទ្យានជាតិព្រះសុរាម្រិត«គីរីរម្យ» ដែនឧទ្យានជាតិព្រះមុនីវង្ស«បូកគោ» ដែនឧទ្យានជាតិជួរភ្នំក្រវាញ និងដែនជម្រកសត្វព្រៃភ្នំឱរ៉ាល់។
សេចក្តីជូនដំណឹងដដែល រដ្ឋបាលខេត្តកំពង់ស្ពឺមោឃភាពចោលតាមនីតិវិធីរាល់លិខិតសម្គាល់សិទ្ធិកាន់កាប់ប្រើប្រាស់ដីធ្លី និងឲ្យអាជ្ញាធរមូលដ្ឋានបញ្ឈប់ការបញ្ជាក់លើលិខិតទិញលក់ដីរដ្ឋ ផ្ទេរកម្មសិទ្ធិ ឬបញ្ជាក់លើប្លង់បង្ហាញទីតាំងនៅក្នុងដែនឧទ្យានជាតិនិងដីដែនជម្រកសត្វព្រៃទាំងបួនកន្លែងនេះ។
សេចក្តីជូនដំណឹងបញ្ជាក់ទៀតថា ការកាប់គាស់ រុករាន ឆ្ការ ដុត និងឈូសឆាយដីព្រៃ ព្រមទាំងការសង់ផ្ទះ សង់តូប សង់រោងដើម្បីយកដីធ្វើជាកម្មសិទ្ធិនៅក្នុងដីខាងលើជាអំពើខុសច្បាប់។
ដែនឧទ្យានជាតិព្រះសុរាម្រិត«គីរីរម្យ» ដែនឧទ្យានជាតិព្រះមុនីវង្ស«បូកគោ» ដែនឧទ្យានជាតិជួរភ្នំក្រវាញ និងដែនជម្រកសត្វព្រៃភ្នំឱរ៉ាល់ គឺជាតំបន់ការពារធម្មជាតិដែលត្រូវបានបង្កើតឡើងដោយព្រះរាជក្រឹតនៅចុងឆ្នាំ១៩៩៣។
