ពលរដ្ឋចំនួនពីរឃុំក្នុងស្រុកកណ្ដាលស្ទឹង ខេត្តកណ្តាល ដែលអះអាងថា មានជម្លោះដីធ្លីជាមួយក្រុមហ៊ុន ហេង អភិវឌ្ឍន៍ បានរកកិច្ចអន្តរាគមន៍ពីលោកនាយករដ្ឋមន្រ្តី ហ៊ុន សែន ឲ្យជួយដោះស្រាយបញ្ចប់វិវាទដីធ្លីពួកគេ ខណៈគ្មានដំណោះស្រាយពីអាជ្ញាធរមូលដ្ឋាន។
តំណាងពលរដ្ឋប្រមាណ៥០នាក់មកពីឃុំអំពៅព្រៃ និងឃុំបឹងខ្យាងនៅថ្ងៃនេះ បានប្រមូលផ្តុំគ្នាមុខភូមិគ្រឹះលោកនាយករដ្ឋមន្រ្តី ហ៊ុន សែន ជិតក្រុងតាខ្មៅ ដើម្បីដាក់ញត្តិសុំឲ្យលោក ហ៊ុន សែន ជួយដោះស្រាយបញ្ចប់បញ្ហាជម្លោះដីធ្លីពួកគេ។
លោក ភោគ ផាន់នី ដែលអះអាងថា ជាតំណាងពលរដ្ឋនៅឃុំអំពៅព្រៃ ប្រាប់វីអូឌីនៅកន្លែងតវ៉ាថា ក្រុមអ្នកភូមិមានជម្លោះដីធ្លីជាមួយក្រុមហ៊ុនមួយចំនួនដែលទទួលបានសិទ្ធិវិនិយោគនៅក្នុងស្រុកកណ្តាលស្ទឹងរយៈពេលច្រើនឆ្នាំមកហើយ ដោយថា ពលរដ្ឋបានតវ៉ាឲ្យអាជ្ញាធរស្រុក និងខេត្តរកដំណោះស្រាយជាច្រើនដងដែរ ប៉ុន្តែរហូតពេលនេះនៅតែពុំមានដំណោះស្រាយ។
តំណាងពលរដ្ឋរូបនេះបន្តថា ការចរចាររកដំណោះស្រាយពេលកន្លងមក គឺអាជ្ញាធរសម្របសម្រួលឲ្យក្រុមហ៊ុនផ្តល់សំណងគោលនយោបាយមកឲ្យពលរដ្ឋក្នុងម្នាក់បានតែ៥០ដុល្លារប៉ុណ្ណោះ ខណៈអ្នកភូមិនៅឃុំអំពៅព្រៃទាមទារសំណងក្នុងម្នាក់៧០០ដុល្លារ។
លោកបន្ថែមថា៖«ពួកខ្ញុំជាតំណាងពលរដ្ឋនៅឃុំអំពៅព្រៃ បានធ្វើការតវ៉ាទាមទារយូរឆ្នាំហើយតាមរយៈអាជ្ញាធរ ស្រុក និងខេត្ត ហើយក៏សហការដោះស្រាយតាំងពីមុនបោះឆ្នោតម្ល៉េះ។ មកដល់ពេលនេះ ខេត្តសម្រេចឲ្យផ្តល់ជាគោលនយោបាយសម្រាប់ដី៤០០ហិកតាហ្នឹងក្នុងម្នាក់ៗបានតែ៥០ដុល្លារទេ តែខាងពលរដ្ឋសុំជាគោលនយោបាយរហូតដល់៧០០ដុល្លារ»។
លោក ភោគ ផាន់នី ឲ្យដឹងថា នៅឃុំអំពៅព្រៃមានពលរដ្ឋជាង២ពាន់គ្រួសារ និងមានមនុស្សជិត៩ពាន់នាក់។
ចំណែកលោក អឹម ដារ៉ា ដែលអះអាងថា ជាតំណាងពលរដ្ឋនៅឃុំបឹងខ្យាងបានឲ្យដឹងថា នៅឃុំបឹងខ្យាងមានពលរដ្ឋ១៨៤៩គ្រួសារ និងមានមនុស្ស៧៦៥៣នាក់ ហើយថា ដីរួមសហគមន៍ទំហំ២៤២ហិកតាត្រូវបានក្រុមហ៊ុន ហេង អភិវឌ្ឍន៍ រំលោភយក។
តំណាងពលរដ្ឋរូបនេះបន្តថា ដើមហេតុដែលបណ្តាលឲ្យក្រុមអ្នកភូមិមានជម្លោះដីធ្លីជាមួយក្រុមហ៊ុន ហេង អភិវឌ្ឍន៍ នោះ ដោយសារអាជ្ញាធរមូលដ្ឋានឃុបឃិតគ្នាក្លែងឯកសារលួចលក់ដីឲ្យក្រុមហ៊ុនឯកជន។
លោកបន្ថែមថា៖«ពលរដ្ឋខ្ញុំទូទាំងឃុំមានជម្លោះដីធ្លីជាមួយក្រុមហ៊ុន លោកឧញ្ញា ស៊ាន ចាន់ហេង ក្រុមហ៊ុនអភិវឌ្ឍន៍ ស៊ាន ចាន់ហេង ហើយដីនេះជាក់ស្តែងត្រូវមេឃុំរបស់ខ្ញុំឈ្មោះ គង់ នៅ។ អតីតមេឃុំ គង់ នៅ ស៊ីញ៉េលក់ គាត់លក់ស្ងាត់ៗកាលពីថ្ងៃទី២៤ ខែ៨ ឆ្នាំ២០០៨។ ដោយអត់ឲ្យប្រជាពលរដ្ឋខ្ញុំដឹងទេទៅផ្ទៃដី២៤២ហិកតា»។
លោក អឹម ដារ៉ា ឲ្យដឹងថា ការចចាររកដំណោះស្រាយជាមួយអាជ្ញាធរខេត្តពេលកន្លងមក គឺអាជ្ញាធរសម្របសម្រួលដោះស្រាយជាគោលនយោបាយដោយផ្តល់សំណងឲ្យពួកគាត់ក្នុងម្នាក់៥០ដុល្លារ ខណៈក្រុមអ្នកភូមិទាមទារសំណងក្នុងម្នាក់៥០០ដុល្លារ។
មន្រ្តីដែលបម្រើការងារនៅភូមិគ្រឹះលោកនាយករដ្ឋមន្រ្តី ហ៊ុន សែន គឺ លោក អ៊ិន សារិន សមាជិកក្រុមការងារចម្រុះទទួល និងដោះស្រាយបណ្តឹងផ្សេងៗ បានទទួលញត្តិពីក្រុមតំណាងពលរដ្ឋ ដោយលោកសន្យាចំពោះពលរដ្ឋថា នឹងយកញត្តិនោះដាក់ជូនថា្នក់លើគឺ លោក ហ៊ីង ប៊ុនហៀង ពិនិត្យ និងដោះស្រាយ ប៉ុន្តែមិនបានកំណត់ថ្ងៃចុះដោះស្រាយជាក់លាក់នោះទេ។
អភិបាលខេត្តកណ្តាលលោក ម៉ៅ ភិរុណ ប្រាប់វីអូឌីកាលពីខែកញ្ញាថា អាជ្ញាធរខេត្តបានខិតខំសម្របសម្រួលទៅ ក្រុមហ៊ុនឲ្យផ្តល់សំណងជូនពលរដ្ឋឲ្យបានច្រើនដែរ ប៉ុន្តែភាគីក្រុមហ៊ុនសម្រេចឲ្យបានតែ៥០ដុល្លារក្នុងម្នាក់ ដោយមិនអាចផ្តល់លើសពីនេះបានទេ។
លោក ម៉ៅ ភិរុណ បន្តថា សំណងជាគោលនយោបាយគឺ ពលរដ្ឋមិនទាមទារតាមតែអំពើចិត្តបាននោះទេដោយថា ដីនោះមានប័ណ្ណកម្មសិទ្ធិត្រឹមត្រូវដែលកាន់កាប់ដោយក្រុមហ៊ុនឯកជន ហើយជម្លោះដីធ្លីនោះក៏បានចូលដល់ដៃតុលាការផងដែរ។
លោកបន្ថែមថា៖ « ក្នុងនាមខ្ញុំជាអាជ្ញាធរ គ្មានអីក្រៅពីការសម្របសម្រួលទេ យើងអត់មានសិទ្ធិទៅបង្គាប់បញ្ជាគេបានទេ តាមយន្តការច្បាប់ដីធ្លី។ កាលណា ដីមានប្លង់កម្មសិទ្ធិគេមិនឲ្យអាជ្ញាធរលូកលាន់ផង អាហ្នឹងជាសមត្ថកិច្ចរបស់តុលាការ»។
ជុំវិញវិវាទនេះ លោក ម៉ៅ ភិរុណ បានស្តីបន្ទោសទៅមន្រ្តីថ្នាក់ក្រោម ដោយថា ចេះតែចុះហត្ថលេខា និងធ្វើប័ណ្ណកម្មសិទ្ធិទាំងមិនចុះវាស់វែង ដោយសារទទួលលុយកាក់ពីអ្នកពាក់ព័ន្ធទាំងនោះ។
ប្រធានគ្រប់គ្រងផ្នែកអង្កេតនៅអង្គការលីកាដូលោក អំ សំអាត មានប្រសាសន៍ថា ប្រសិនបើពលរដ្ឋលើកឡើង ថា មានអាជ្ញាធរថ្នាក់ក្រោមមួយចំនួនឃុបឃិតគ្នាលួចលក់ដីពលរដ្ឋទៅឲ្យក្រុមហ៊ុន ដូច្នេះរដ្ឋាភិបាលក៏ជាក្រសួងពាក់ព័ន្ធត្រូវតែស្រាវជ្រាវរកការពិត និងមានវិធានការផ្លូវច្បាប់ចំពោះមន្រ្តីដែលឃុបឃិតគ្នាលក់ដីពលរដ្ឋលក់នោះផងដែរ។
លោកបន្ថែមថា៖ «ទាក់ទងនឹងបញ្ហានេះ ប្រសិនជាមានការលើកឡើងថា បញ្ហាដីធ្លីកើតឡើងដោយសារតែអាជ្ញាធរមួយចំនួនឃុបឃិតដើម្បីយកដីរបស់ពួកគាត់លក់ទៅឲ្យក្រុមហ៊ុន។ អញ្ចឹងរដ្ឋាភិបាលជាពិសេសក្រសួងពាក់ព័ន្ធគាត់ត្រូវតែមានការសិក្សា ឬស្រាវជ្រាវរករឿងពិតប្រាកដដែលកើតឡើង។ ហើយបើរឿងនេះកើតឡើង អញ្ចឹងមែន ត្រូវចាត់វិធានការទៅតាមផ្លូវច្បាប់ដើម្បីដោះស្រាយជូនប្រជាពលរដ្ឋ ហើយក៏ត្រូវតែចាត់វិធានការតាមផ្លូវច្បាប់ចំពោះបុគ្គលដែលឃុបឃិតគ្នាក្នុងការយកដីប្រជាពលរដ្ឋលក់ទៅឲ្យក្រុមហ៊ុនហ្នឹងផងដែរ»។
វី.អូ.ឌី មិនអាចសុំការឆ្លើយតបពីតំណាងក្រុមហ៊ុន ហេង អភិវឌ្ឍន៍ ចំពោះការចោទប្រកាន់នេះបានទេ ប៉ុន្តែបើតាមតំណាងពលរដ្ឋ គឺអាជ្ញាធរខេត្តប្រាប់ទៅពួកគេថា ក្រុមហ៊ុន ហេង អភិឌ្ឍន៍ បានលក់ដីនោះទៅក្រុមហ៊ុនផ្សេងៗទៀតអស់ហើយ ខណៈអភិបាលខេត្តកណ្តាលសុំមិនប្រាប់ឈ្មោះក្រុមហ៊ុនថ្មីៗនោះទេ។
កន្លងមកអ្នកភូមិរាប់រយនាក់នៅឃុំអំពៅព្រៃ និងឃុំខ្យាងបានប្រមូលផ្ដុំគ្នាតវ៉ានៅមុខសាលាខេត្តកណ្ដាលដើម្បីស្វែងរកដំណោះស្រាយជុំវិញវិវាទដីធ្លីរបស់ពួកគេ ដែលក្រុមអ្នកភូមិបានចោទអាជ្ញាធរមូលដ្ឋានថា បានលួចលក់ដីរួមរបស់សហគមន៍រាប់រយហិកតាទៅឲ្យក្រុមហ៊ុនវិនិយោគឯកជន៕
