ចិនបានអះអាងថាខ្លួនមានឆន្ទៈខ្ពស់ដើម្បីបំពេញតួនាទីក្នុងការលើកកម្ពស់ស្ថិរភាពទីផ្សារថាមពលនៅលើពិភពលោក។
អ្នកនាំពាក្យក្រសួងការបរទេសចិន លោកស្រី ហួរ ឈុនអីុង បានថ្លែងបែបនេះក្នុងសន្និសីទសារព័ត៌មានប្រចាំកាលពីម្សិលមិញ ក្រោយពីសហរដ្ឋអាមេរិកបានដាក់ទណ្ឌកម្មប្រឆាំងប្រទេសអុីរ៉ង់កាលពីថ្ងៃចន្ទ។
អ្នកនាំពាក្យក្រសួងការបរទេសចិនរូបនេះ បានលើកឡើងថាចិនមានការសោកស្ដាយយ៉ាងខ្លាំង និងប្រឆាំងដាច់ខាតចំពោះការដាក់ទណ្ឌកម្មលើអុីរ៉ង់ ដែលធ្វើឡើងជាឯកតោភាគីដោយសហរដ្ឋអាមេរិក។ លោកស្រី មានប្រសាសន៍បន្តថា កិច្ចសហប្រតិបត្តិការរវាងចិននិងអុីរ៉ង់ គឺបើកទូលាយ មានតម្លាភាព និងស្របច្បាប់។
ក្នុងសន្និសីទសារព័ត៌មានកាលពីថ្ងៃទី០៥ ខែវិច្ឆិកា ឆ្នាំ២០១៨ លោកស្រី ហួរ ឈុនអីុង ក៏បានអំពាវនាវទៅសហរដ្ឋអាមេរិកផងដែរ ឲ្យអនុវត្តឲ្យទូលំទូលាយនិងមានប្រសិទ្ធភាពនូវផែនការសហប្រតិបត្តិការរួមគ្នាគ្រប់ជ្រុងជ្រោយ (JCPOA) ដែលជាកិច្ចព្រមព្រៀងពហុភាគី ដែលបានផ្តល់សច្ចាប័នដោយក្រុមប្រឹក្សាសន្តិសុខអង្គការសហប្រជាជាតិ។ តាមលោកស្រី ហួរ ឈុនអីុង ផែនការសហប្រតិបត្តិការរួមគ្នាគ្រប់ជ្រុងជ្រោយនេះ ផ្ដល់នូវលក្ខខណ្ឌដែលអាចជួយទប់ស្កាត់ការរីករាលដាលនៃអាវុធនុយក្លេអ៊ែរ និងផ្ដល់សន្តិភាពនិងស្ថិរភាពនៅមជ្ឈឹមបូព៌ា ក៏ដូចជាបម្រើផលប្រយោជន៍រួមនៃសហគមន៍អន្តរជាតិផងដែរ។
សហរដ្ឋអាមេរិកកាលពីថ្ងៃចន្ទកន្លងទៅ បានចាប់ផ្ដើមដាក់ទណ្ឌកម្មជាថ្មីម្ដងទៀតប្រឆាំងនឹងអុីរ៉ង់លើវិស័យប្រេង និងធនាគារ។ អាមេរិក ក៏បានអំពាវនាវប្រទេសនានាឲ្យចូលរួមជាមួយខ្លួនក្នុងការដាក់ទណ្ឌកម្មប្រឆាំងអុីរ៉ងផងដែរ។ ក្នុងយន្តការទណ្ឌកម្មរបស់ខ្លួន អាមេរិក បានហាមប្រទេសនានាមិនឲ្យនាំចូលប្រេងពីប្រទេសអុីរ៉ង់នោះទេ។ ប៉ុន្តែទោះជាយ៉ាងណាក៏ដោយ អាមេរិក មិនបានហាមឃាត់ប្រទេសចិន ឥណ្ឌា ក្រិក អុីតាលី តៃវ៉ាន់ ជប៉ុន តួកគី និងកូរ៉េខាងត្បូង ឲ្យទិញប្រេងពីអុីរ៉ង់នោះទេ។ រដ្ឋមន្រ្តីក្រសួងការបរទេសអាមេរិកបានលើកឡើងកាលពីថ្ងៃចន្ទថា មានប្រទេសជាង២០រួចមកហើយដែលកាត់បន្ថយការទិញប្រេងពីអុីរ៉ង់។
ភ្លាមៗក្រោយការដាក់ចេញនូវទណ្ឌកម្មនេះ មេដឹកនាំអុីរ៉ង់ ថាខ្លួននៅតែបន្តការនាំចេញប្រេងរបស់ខ្លួនទៅប្រទេសនានាដដែល។ លើសពីនេះទៅទៀត មេដឹកនាំប្រទេសមួយចំនួនមានដូចជា រុស្ស៊ី តួកគី និងអេស្ប៉ាញជាដើម ហៅការដាក់ទណ្ឌកម្មរបស់អាមេរិកប្រឆាំងនឹងអុីរ៉ង់ថាធ្វើឡើងដោយខុសច្បាប់ និងអាចបណ្ដាលឲ្យមានការរង្គោះរង្គើសេដ្ឋកិច្ចពិភពលោកទៀតផង។
កាលពីខែឧសភា សហរដ្ឋអាមេរិកបានដាក់ចេញនូវលក្ខខណ្ឌចំនួន១២ ឲ្យអុីរ៉ង់ធ្វើតាម បើប្រទេសនេះចង់គេចផុតពីទណ្ឌកម្មរបស់ខ្លួន។ លក្ខខណ្ឌទាំងនោះ រួមមាន ផ្ដល់ព័ត៌មានពីកម្មវិធីអាវុធនុក្លេអ៊ែរដល់ទីភ្នាក់ងារថាមពលអាតូមិកអន្តរជាតិ, បញ្ឈប់ការចំរាញ់សារធាតុអ៊ុយរ៉ាញ៉ូម និងភ្លុយតូញ៉ូម, បញ្ឈប់កម្មវិធីអាវុធនុយក្លេអ៊ែរទាំងស្រុង, ដោះលែងពលរដ្ឋអាមេរិកដែលជាប់ឃុំនៅអីុរ៉ង់, បញ្ឈប់ការគាំទ្រក្រុមហាម៉ាស ក្រុមបដិវត្តន៍នៅយេមេន ក្រុមតាលីបង់និងអាល់កៃដានៅអាហ្វាស្ថាន, និងដកទ័ពចេញពីស៊ីរីជាដើម៕
