ខ្មែរកម្ពុជាក្រោមអំពាវនាវទៅគណៈកម្មការរៀបចំបុណ្យអុំទូកជួយផ្សព្វផ្សាយឲ្យបានទូលំទូលាយនូវទូកខ្មែរក្រោមដែលបានចូលរួមប្រកួតក្នុងឆ្នាំនេះ ដោយពួកគាត់ចង់ឲ្យមានការយល់ដឹងច្រើនពីប្រពៃណី និងទំនៀមទម្លាប់ ការរស់នៅរបស់ខ្មែរកម្ពុជាក្រោម។
ប្រធានគណៈកម្មការទូកខ្មែរក្រោម លោក ប៊ុន មុនី ប្រាប់វីអូឌីថា ឆ្នាំនេះក៏ដូចឆ្នាំមុនៗដែរ បើទោះជាទូកខ្មែរក្រោមឈ្នះ ឬចាញ់គឺមិនត្រូវបានពិធីករ ឬអ្នកធ្វើអត្ថាធិប្បាយមិនបានផ្សព្វផ្សាយច្រើនដូចទូកផ្សេងៗនោះទេ។
លោកបន្ថែមថា៖ «ឲ្យតែឃើញទូក ង ខ្មែរកម្ពុជាក្រោមមានជ័យបានចូលរួមប្រកួតទោះចាញ់ក្តីឈ្នះក្តី ពិធីករហ្នឹងគាត់មិនសូវជាអត្ថាធិប្បាយរ៉ាយរ៉ាប់ទេអំពីទូក ង ខ្មែរកម្ពុជាក្រោមទេ។ ឧទាហរហ៍ ដូចកាលពីម្សិលខ្ញុំមិនចោទប្រកាន់ថា ជាចេតនារបស់ពិធីករឬអ្នកអត្ថាធិប្បាយទេ ប៉ុន្តែជាញយៗ គឺពួកគាត់តែងតែអនុវត្តបែបផែនហ្នឹង។ អញ្ចឹង ជាការសោកស្តាយដែរ ដែលយើងខ្ញុំជាខ្មែរកម្ពុជាក្រោម ខណៈទូកផ្សេងៗហាក់ដូចជាមានការផ្សព្វផ្សាយល្អ»។
ការប្រកួតទូកនៅថ្ងៃទី១ម្សិលមិញនេះគឺទូក ង ខ្មែរក្រោមមានជ័យ បានឈ្នះការប្រកួតចំនួនពីរលើក ប៉ុន្តែត្រូវបានខ្មែរក្រោមមើលឃើញថា ពិធីករ ឬ អ្នកអត្ថាធិប្បាយការប្រណាំងទូកនោះ ហាក់មិនបានផ្សព្វផ្សាយឬធ្វើអត្ថាធិប្បាយច្រើនឡើយ ដោយថា អ្នកអត្ថាធិប្បាយយកពេលវេលានោះទៅផ្សព្វផ្សាយរឿងផ្សេងទៅវិញ។
លោក ប៊ុន មុនី បញ្ជាក់ថា គោលបំណងដែលខ្មែរកម្ពុជាក្រោយ យកទូកមកចូលរួមប្រកួតក្នុងពិធីបុណ្យជាតិមួយនេះ គឺដើម្បីផ្សាព្វផ្សាយ ឬបង្ហាញពីវប្បធម៌ប្រពៃណី ទំនៀមទំលាប់ និងចង់ផ្សារភ្ជាប់ទំនាក់ទំនងរវាងប្រជាជនកម្ពុជា និងប្រជាជនខ្មែរកម្ពុជាក្រោម។
លោកបន្ថែមថា៖ «អញ្ចឹង ប្រសិនបើមានពេល មានវេលា មានឱកាសខ្ញុំក៏សូមស្នើទៅដល់អ្នកអត្ថាធិប្បាយឬក៏ពិធីករក្នុងទូរទស្សន៍ សូមមេត្តាជួយធ្វើការផ្សព្វផ្សាយ ឬធ្វើអត្ថាធិប្បាយម៉េច! មិនឲ្យលើសគេទេ ធ្វើម៉េចឲ្យដូចគេដូចឯងអញ្ចឹងទៅ»។
ប្រធានគណៈកម្មការបុណ្យអុំទូក លោក ប៊ូ ជុំសេរី មិនបានឆ្លើយតបករណីនេះទេ ដោយប្រាប់ថា ជាប់រវល់។
បើតាមគណៈកម្មការទូកខ្មែរក្រោមគឺ ទូកឈ្មោះខ្មែរក្រោមមានជ័យចំណុះកីឡាករអុំចំនួន២៤នាក់។ ទូកនេះ បានចូលរួមប្រកួតប្រជែងរយៈពេល១៦ឆ្នាំមកហើយ។
