នៅពេលដែលយើងធ្វើដំណើរពីគល់ស្ពានជ្រោយចង្វាដល់ទីក្រុងកោះពេជ្រតាមបណ្ដោយទន្លេ នោះយើងឃើញប្រជាពលរដ្ឋជាច្រើនពាន់នាក់ធ្វើដំណើរ និងអង្គុយត្រៀបត្រាដើម្បីមើលការប្រណាាំងទូក។ ចំណែកឯ ក្រុមកីឡាករអុំទូកដែលនៅលើផ្ទៃទន្លឯណោះវិញ បាននាំគ្នាស្រែកហ៊ោកញ្រ្ជៀវយ៉ាងក្លៀវក្លា។
តាមរបាយការណ៍របស់គណកម្មការធិការរៀបចំបុណ្យជាតិនិងអន្តរជាតិ ទូក«ង»ជិត៣០០ទូក ចូលរួមប្រកួតក្នុងព្រះរាជពិធីបុណ្យអុំទូកក្នុងឆ្នាំនេះ។ ទូកទាំងនោះភាគច្រើនជាទូកតំណាងខេត្តនានារបស់កម្ពុជា តែអ្វីដែលគួរឲ្យចាប់អារម្មណ៍គឺមានទូករបស់ខ្មែរកម្ពុជាក្រោម ក៏ចូលរួមប្រកូតដែរ។ ទូកនោះមានឈ្មោះថា «ខ្មែរក្រោមមានជ័យ» ដែលជាទូកតែមួយគត់របស់ខ្មែរកម្ពុជាក្រោមចូលរួមប្រកួតក្នុងឱកាសពិធីបុណ្យអុំទូកនាឆ្នាំនេះដែរ។
ខុសពីទូកគេដទៃដែលទទួលបានការឧបត្ថម្ភពីមន្ត្រីជាន់ខ្ពស់រដ្ឋាភិបាល និងអ្នករកស៊ីគ្រាក់ៗនោះ ទូក«ង» «ខ្មែរកម្ពុជាក្រោមមានជ័យ» ទទួលបានការឧបត្ថម្ភពីកម្លាំងញើសឈាម និងលុយពីខ្មែរកម្ពុជាក្រោមសុទ្ធសាធដើម្បីបានចូលរួមក្នុងពិធីដ៏អធិកអធមនេះ។
ក្នុងរោងដែលរៀបចំដោយសាលារាជធានីនៅក្នុងធ្លារបស់ក្រុមហ៊ុន OCIC ក្បែរស្ពានជ្រោយចង្វាត្រើយខាងកើត ប្រធានគណៈកម្មការទូកខ្មែរក្រោមមួយនេះ លោក ប៊ុន មុនី បានលើកឡើងប្រាប់VOD ថាទូកខ្មែរក្រោមមានជ័យជាទូករបស់វត្តសាមគ្គីរង្សី ស្ថិតនៅរាជធានីភ្នំពេញ ដែលមានចំណុះ២៤នាក់ ហើយចំណុះទូក និងអ្នករៀបចំគឺសុទ្ធតែជាខ្មែរកម្ពុជាក្រោមសុទ្ធសាធ។
លោកថា៖ « នៅកម្ពុជាក្រោមយើងសព្វថ្ងៃគឺមានជាង៦០ទូកដែលកំពុងតែចូលរួមប្រកួតដូចនៅកម្ពុជាដែរ ក្នុងខេត្តឃ្លាំងគឺកំពុងតែរៀបចំពិធីដូចគ្នានៅកម្ពុជាដែរ តែសម្រាប់អុំក្នុងខេត្តឃ្លាំងតែប៉ុណ្ណោះ។ តែដែលទូកខ្មែរក្រោមដែលចូលរួមប្រកួតនៅព្រះរាជាណាចក្រកម្ពុជាគឺមានតែមួយគឺខ្មែរកម្ពុជាក្រោមមានជ័យហ្នឹងឯង » ។
លោក ប៊ុន មុនី បន្ថែមថារាល់ការចំណាយរ៉ាប់រងទាំងអស់គឺជាបន្ទុករបស់មិត្តសមាគមខ្មែរកម្ពុជាក្រោមដែលទទួលជំនួយមកពីខ្មែរក្រោមទាំងអស់ទូទាំងពិភពលោកដើម្បីជំរុញឲ្យទូកនេះបានចូលរួមប្រកួត។
លោក មុនី បញ្ជាក់ថាការចូលរួមពិធីនេះរបស់ខ្មែរក្រោមគឺពួកគេទាំងអស់ចង់បញ្ជាក់ថាខ្លួនក៏ជាខ្មែរ មានឈាមជាខ្មែរ និងនៅតែថែរក្សាប្រពៃណីវប្បធម៌របស់ខ្មែររហូត។
លោកថា៖ « ទោះបីជាបច្ចុប្បន្នវាស្ថិតក្នុងភាពត្រដាបត្រដួសផ្នែកជីវភាពក៏ដោយ ត្រដាបត្រដួសខាងការប្រមូលផ្ដុំគ្នាក៏ដោយ ទោះជាស្អីក៏ដោយក៏ពួកខ្ញុំបបួលគ្នាថែរក្សា ប្រពៃណី វប្បធម៌ ឲ្យស្ថិតស្ថេរជាអមត » ។
ពុំមានការហ្វឹកហាត់អ្វីសមរម្យដូចគេនោះទេ គឺមានតែកម្លាំងចិត្តនឹងភាពសាមគ្គីគ្នាក្នុងក្រុមកីឡាករខ្មែរក្រោមនេះ កីឡាករភាគច្រើនមកពីទល់ដែនកម្ពុជា វៀតណាមក្នុងខេត្តតាកែវដែលជាកសិករ ឆ្លៀតមកភ្នំពេញដើម្បីចូលរួមប្រកួតនេះ។
កីឡាករខ្មែរក្រោមម្នាក់ដែលរស់នៅក្នុងស្រុកបុរីជលសារ ខេត្តតាកែវឈ្មោះ គន់ អឿន បានប្រាប់VOD ថាមូលហេតុដែលលោកសុខចិត្តចោលការងារស្រែចម្ការរបស់ខ្លួនមកចូលរួមអុំទូកនេះព្រោះលោកមានមោទនភាពជាខ្មែរ នឹងចង់ឲ្យខ្មែរក្រោមត្រូវបានគេទទួលស្គាល់។
លោកថា៖ « ចង់បានកិត្តិយសឲ្យខ្មែរកម្ពុជាក្រោម ទើបខ្ញុំស្ម័គ្រចិត្តមកហ្នឹង » ។
បុណ្យអុំទូក បណ្ដែតប្រទីប សំពះព្រះខែ និងអកអំបុកប្រព្រឹត្តិរយៈពេល៣ថ្ងៃគឺចាប់ពីថ្ងៃទី២១ ដល់ថ្ងៃទី២៣ វិច្ឆិកានេះ។
ខណៈពេលដែលកីឡាករ និងគណៈកម្មការរវល់កិច្ចការពួកគេរៀងខ្លួន នៅរោងខាងក្រោយឯណេះវិញមានស្ត្រី និងបុរសប្រមាណជិត១០នាក់កំពុងរវល់ហាន់សាច់ ចិតបន្លែ ឆាចៀនស្ងោរយ៉ាងញាប់ដៃផងដែរ។ ស្ត្រីម្នាក់ដែលជាប្រធានក្រុមចុងភៅនេះអ្នកស្រី ស៊ិន យាង មានប្រសាសន៍ថាក្រុមគាត់គឺជាអ្នកលក់បាយកាហ្វេ នៅតាមផ្ទះនឹងតូបរៀងខ្លួន ដែលសុខចិត្តបិទហាង៤ទៅ៥ថ្ងៃនេះ ដើម្បីមកជួយធ្វើម្ហូបដល់កីឡាករ ដោយចេញពីទឹកចិត្តទាំងស្រុង ហើយអ្វីដែលពួកគេចង់បានវិញនោះគឺសង្ឃឹមថាទូករបស់ក្រុមខ្លួនឈ្នះបានលេខមួយក្នុងការប្រកួតឆ្នាំនេះ។
អ្នកស្រី ស៊ិន យាង៖ « ដើម្បីកិត្តិយសខ្មែរក្រោមកុំឲ្យបាត់បង់កិត្តិយស ព្រោះពួកយើងតំណាងឲ្យខ្មែរក្រោមទូទាំងពិភពលោក» ។
នៅចំកណ្ដាលរោងមានដាក់ទឹកសុទ្ធ ទឹកក្រូច មី គ្រឿងឧបភោគបរិភោគជាច្រើន ដែលអ្នកស្រី ស៊ិន យាង បញ្ជាក់ថាជាទឹកចិត្តខ្មែរកម្ពុជាក្រោមដែលរស់នៅរកស៊ី និងធ្វើការក្នុងរាជធានីភ្នំពេញគាត់ឆ្លៀតយកមកជួយនឹងលើកទឹកចិត្តដល់កីឡាករ។
អ្នកស្រីថា៖ « បន្លែក៏ជួយ សាច់ក៏ជួយគ្រប់សាច់ដែរ សុទ្ធតែខ្មែរកម្ពុជាក្រោមដូចគ្នា ខ្លះអ្នកលក់ដូរនៅផ្សារដើមគ ខ្លះនៅភូមិសាមគ្គី គ្រប់ទិសទីទូទៅគ្រប់ទិសតែម្ដង ផ្ដល់កិត្តិយសដល់ទូកខ្មែរកម្ពុជាក្រោមមានជ័យ » ។
កំពុងអង្គុយជំនុំគ្នា៥នាក់ជជែកពីជ័យជំនះរបស់ទូកខ្មែរកម្ពុជាក្រោមមានជ័យ បានយកឈ្នះគូរប្រកួត អ្នកស្រី មិន លីវ មានប្រសាសន៍ថាអ្នកស្រីសប្បាយចិត្តជាខ្លាំងព្រោះនេះជាអ្វីដែលអ្នកស្រីនឹងខ្មែរកម្ពុជាក្រោមគ្រប់រូបចង់ឃើញ។
អ្នកស្រីថា៖ « សង្ឃឹមបានមួយជើង ហើយសង្ឃឹមថាជើងទីពីរហ្នឹងឈ្នះទៀត តែទោះជាចាញ់ឈ្នះយ៉ាងណាយើងត្រូវតែសប្បាយ ព្រោះអីការប្រលងមិនថាវិញ្ញាសាអីទេយើងបើមិនចាញ់មានតែឈ្នះតែប៉ុនហ្នឹង! មានតែពីរហ្នឹង (សើច) » ។
ដូចការសង្ឃឹមមែនទូកខ្មែរកម្ពុជាក្រោមមានជ័យគឺបានជោគជ័យទាំងពីរលើកនាថ្ងៃអុំទូកដំបូង។
ទោះបីជាកម្ពុជាក្រោម ត្រូវបានបារាំងកាត់ឲ្យទៅក្រោមការគ្រប់គ្រងរបស់វៀតណាមតាំងពីថ្ងៃទី ៦ មិថុនា ឆ្នាំ១៩៤៩ ក៏ដោយមិនអាចកាត់ទឹកចិត្តខ្មែរកម្ពុជាក្រោមបានឡើយដោយពួកគេថាពួកគេនៅតែជាខ្មែរ នៅតែស្រលាញ់វប្បធម៌ប្រពៃណី និងភាសាខ្មែរតមករហូត។
ពួកគេសំណូមពរដល់ខ្មែរកណ្តាលនៅទឹកដីកម្ពុជាសព្វថ្ងៃកុំមានការរើសអើងលើពួកគេ និងចាត់ទុកពួកគេសាច់ជាឈាមមួយរបស់ខ្លួនផងដែរ។
លោក ប៊ុន មុនី៖ « ពួកខ្ញុំដែលមករស់នៅកម្ពុជានេះខិតខំសព្វបែបយ៉ាងដើម្បីថែរក្សានូវអត្តសញ្ញាណនេះពិសេសដើម្បីបង្ហាញថាពួកយើងខ្ញុំជាខ្មែរមួយមិនមែនជាជនបរទេសទេហើយសុំឲ្យបងប្អូនយើងគ្រប់ទិសទីក៏ដូចជាថ្នាក់ដឹកនាំក៏ដូចជាប្រជាជនទូទៅសុំកុំប្រកែប្រកាន់កុំរើសអើងពិសេសទៅទៀតចំពោះបងប្អូនខ្មែរកម្ពុជាក្រោមដែលគាត់ឡើងមករស់កម្ពុជាហ្នឹងសុំឲ្យពួកគាត់ជួយសម្រួលឲ្យពួកគាត់អាចរស់នៅបានដោយស្រួលដូចជាប្រជាជននៅព្រះរាជាណាចក្រកម្ពុជាផងយោងទៅតាមអត្តសញ្ញាណដែលពួកយើងបានបង្ហាញនាពេលនេះ » ។
