អភិបាលខេត្តព្រះសីហនុស្នើទៅឧកញ៉ាម្នាក់ឲ្យបញ្ឈប់សកម្មភាពចាក់ដីបំពេញតាមដងព្រែកកោះខ្យងក្នុងឧទ្យានជាតិព្រះសីហនុ «រាម» ស្ថិតនៅឃុំអូរជ្រៅ ស្រុកព្រៃនប់ ជាបន្ទាន់ ដោយថា ការចាក់ដីនោះ ធ្វើឲ្យខូចទីជម្រាល ប៉ះពាល់ជីវចម្រុះនិងប្រព័ន្ធអេកូឡូស៊ីក្នុងតំបន់ឆ្នេរ។
ក្នុងលិខិតចុះថ្ងៃទី១៧ ខែធ្នូ ឆ្នាំ២០១៨ អភិបាលខេត្តព្រះសីហនុលោក យន្ត មីន បានប្រាប់ទៅ ឧកញ៉ាម្នាក់ដែលជាប្រធានក្រុមហ៊ុន អេច.ធី.ធី.អេច អាយលែនអ៊ិនវិសមេន ឯ.ក ថា កាលពីថ្ងៃទី១៧ ខែមេសា ឆ្នាំ២០១៨ ក្រុមហ៊ុននេះ បានស្នើសុំសាងសង់កំពង់ចម្លងមួយជាលក្ខណៈបណ្ដោះអាសន្ន ហើយរដ្ឋបាលខេត្តក៏យល់ព្រម ដោយឲ្យក្រុមហ៊ុនជីកយកដីសាងសង់ផ្លូវលំក្រាលក្រួសក្រហមដែលមានទីតាំងស្ថិតនៅភូមិកោះខ្យង ឃុំអូរជ្រៅ ស្រុកព្រៃនប់។
លិខិតដដែលថា ដើម្បីចៀសវាងនូវផលប៉ះពាល់អវិជ្ជមានផ្សេងៗជាយថាហេតុ រដ្ឋបាលខេត្ដព្រះសីហនុ ក៏បានណែនាំទៅម្ចាស់ក្រុមហ៊ុនបំពេញនូវលក្ខខណ្ឌមួយចំនួនមុននឹងសាងសង់ ប៉ុន្តែក្រុមហ៊ុនពុំបានអនុវត្ដស្របតាមឡើយ។
លិខិតថា៖ «ស្របជាមួយនឹងសកម្មភាពករណីការជីកយកអាចម៍ដីទៅចាក់ធ្វើផ្លូវក្រាលក្រួសក្រហមរបស់ក្រុមហ៊ុនលោកឧកញ៉ា ក្រសួងបរិស្ថានពិនិត្យឃើញថា បានធ្វើឲ្យប៉ះពាល់ដល់បរិស្ថានយ៉ាងធ្ងន់ធ្ងរ ជាពិសេសធ្វើឲ្យខូចទីជម្រាលប៉ះពាល់ជីវចម្រុះនិងប្រព័ន្ធអេកូឡូស៊ីក្នុងតំបន់ឆ្នេរ»។
នៅពេលអ្នកសារព័ត៌មានសួរថា តើមានក្រុមហ៊ុនប៉ុន្មានដែលបានចាក់ដីលុបសមុទ្រ? តើក្រុមហ៊ុនឈ្មោះអ្វីខ្លះ? អ្នកនាំពាក្យសាលាខេត្តព្រះសីហនុលោក ឱ សារឿន ថា លោកមិនទាន់មានរបាយការណ៍ទាំងអស់នេះ ប៉ុន្តែអាជ្ញាធរបានឲ្យក្រុមហ៊ុនចំនួន៤កាយដីចេញពីសមុទ្រវិញ ដោយលោកមិនបានប្រាប់ឈ្មោះក្រុមហ៊ុនដែលអាជ្ញាធរឲ្យកាយដីចេញនោះទេ។
ប្រធានអង្គការស្រាវជ្រាវជាតិកម្ពុជាប្រចាំខេត្តព្រះសីហនុ (CNRO) លោក សុខ សុខុម សម្ដែងការសោកស្ដាយ ដោយថា អាជ្ញាធរគួរតែចាត់វិធានការចំពោះក្រុមហ៊ុនដែលបានរំលោភច្បាប់នោះ ។
លោកថា៖ «អញ្ចឹងបានជាអ្នកមានលុយមានឥទ្ធិពល គាត់ចេះតែចាក់លុបសមុទ្រអត់មានទោសអីផង គាត់ចាក់ទៅបើសិនជាមិនឃាត់គាត់បានសម្រេចបានជោគជ័យទៅ គាត់បានដីទៅ។ ហើយបើគេដឹងទៅ គេចុះទៅហាមឃាត់ធ្វើកំណត់ហេតុទៅ ហើយថ្ងៃក្រោយសម្រួលផ្លូវច្បាប់ទៀតទៅ»។
លោក សុខ សុខុម បន្តថា ការចាក់ដីលុបសមុទ្រក៏កំពុងកើតឡើងនៅក្នុងខេត្តព្រះសីហនុ គឺមាននៅពយកំពេញ ឆ្នេរសែនសុខ ឆ្នេរព្រែកត្រែង និងឆ្នេរសមុទ្រមួយកន្លែងទៀតស្ថិតឃុំទំនប់រលកស្រុកស្ទឹងហាវ ។
លោកបន្តថា ការចាក់ដីលុបចូលក្នុងសមុទ្រចេះតែកើតឡើងជាបន្តបន្ទាប់នេះ ដោយសារ អាជ្ញាធរមិនបានចាត់វិធានការផ្លូវច្បាប់ទៅលើម្ចាស់ក្រុមហ៊ុនទាំងអស់នោះ ។
កាលពីថ្ងៃទី១៨ ខែកញ្ញា លោកនាយករដ្ឋមន្ត្រី ហ៊ុន សែន បានចេញបញ្ជាបន្ទាន់មួយឲ្យក្រសួងរៀបចំដែនដីចាត់វិធានការកាយដីចេញពីឆ្នេរព្រែកត្រែងស្ថិតនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ចេញវិញ បន្ទាប់រកឃើញថា ឆ្នេរសមុទ្រមួយនេះត្រូវបានចាក់ដីលុបពីសំណាក់ក្រុមហ៊ុនរបស់អ្នកស្រី ជឹង សុភាព ភរិយារបស់លោក ឡៅ ម៉េងឃីន សមាជិកព្រឹទ្ធសភាមកពីគណបក្សប្រជាជនកម្ពុជា។
ដោយឡែកកាលពីថ្ងៃទី១៥ ខែធ្នូ លោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់ឲ្យអភិបាលខេត្តព្រះសីហនុស្តារមុខមាត់ខេត្តនេះឡើងវិញ និងទប់ស្កាត់កុំឲ្យមានសកម្មភាពចាក់ដីលុបសមុទ្របន្តទៀត។
