គ្រូបង្រៀន២រូបនៅខេត្តកំពង់ធំចោទមន្ទីរអប់រំថា រើសអើងហើយផ្លាស់ប្តូរពួកគាត់ចេញពីកន្លែងបង្រៀនចាស់ទៅកន្លែងការងារថ្មីថា ជារឿងអយុត្តិធម៌និងជាការព្យាយាមធ្វើទុក្ខបុកម្នេញផ្នែកនយោបាយមកលើអតីតមន្ត្រីគណបក្សសង្រ្គោះជាតិ។
គ្រូនៅវិទ្យាល័យកំពង់ធំ បង្រៀនផ្នែកបារាំង-ខ្មែរ និងជាអតីតសមាជិកគណៈកម្មាធិការប្រតិបត្តិខេត្តគណបក្សសង្រ្គោះជាតិ លោក ថៃ ធីម មានប្រសាសន៍ថា ការផ្លាស់ប្តូរកន្លែងការងាររបស់លោកពេលនេះ ដោយថាធ្វើឡើងទាំងបង្ខំនិងជារឿងនយោបាយតែម្តង។
លោកបន្ថែមថា ក្នុងការបង្រៀនជាង២០ឆ្នាំ លោកមិនដែលធ្លាប់រងការស្តីបន្ទោសឬព្រមានដោយផ្ទាល់មាត់ ឬ លាយលក្ខណ៍អក្សរទេ ប៉ុន្តែបែរជាមន្ទីរអប់រំខេត្តសម្រេចដកលោកចេញពីការបង្រៀននៅវិទ្យាល័យកំពង់ធំ ឱ្យទៅធ្វើជាមន្ត្រីនៅការិយាល័យអប់រំក្រុងស្ទឹងសែនទៅវិញ។
លោកមានប្រសាសន៍ថា៖ «បាទ! ដូច្នេះការដកនេះ គឺជាការធ្វើតាមបញ្ជារបស់អ្នកនយោបាយដែលអ្នកនយោបាយគេចង់បានឱ្យខាងមន្ទីរអប់រំហ្នឹង គេយកខ្ញុំចេញពីវិទ្យាល័យកំពង់ធំព្រោះវិទ្យាល័យកំពង់ធំជាវិទ្យាល័យដែលសំបូរទៅដោយគ្រូច្រើននិងសិស្សច្រើន។សិស្ស២ពាន់៧រយជាងនាក់។ ដូច្នេះ គេខ្លាចខ្ញុំ ញុះញង់ឬក៏ធ្វើនយោបាយបង្រៀននយោបាយដល់លោកគ្រូអ្នកគ្រូនៅទីហ្នឹង»។
កាលពីថ្ងៃទី៥ និងទី៩ ខែធ្នូ មន្ទីរអប់រំ យុវជន និងកីឡា បានចេញលិខិតបង្គាប់ពីរដាច់ដោយឡែកពីគ្នា ដោយលិខិតមួយចាត់ឱ្យលោក ថៃ ធីម ជាគ្រូកម្រិតមូលដ្ឋានឯកទេស បារាំង-ខ្មែរនៅវិទ្យាល័យកំពង់ធំ ត្រូវទៅបំពេញការងារនៅការិយាល័យអប់រំក្រុងស្ទឹងសែនជំនួសវិញ។
ចំណែកលិខិតមួយទៀត មន្ទីរអប់រំសម្រេចផ្លាស់ប្តូរគ្រូបង្រៀនផ្នែកអក្សរសាស្ត្រខ្មែរ និងសីលធម៌ពលរដ្ឋវិជ្ជា នៅសាលាអនុវិទ្យាល័យឧទុម្ពរ ក្នុងស្រុកបារាយណ៍ ខេត្តកំពង់ធំ ម្នាក់ គឺ លោក ស៊ុន ធន់ ទៅកាន់សាលាអនុវិទ្យាល័យ ហ៊ុន សែន ទួលដំណាក់ ដោយ លោក ស៊ុន ធន់ ថាស្ថិតនៅឆ្ងាយពីផ្ទះជាង១០គីឡូម៉ែត្រ។
លិខិតបង្គាប់ការទាំងពីរនេះ បញ្ជាក់ថា ការផ្លាស់ប្តូរនេះ ធ្វើឡើងគឺយោងតាមស្មារតីអង្គប្រជុំរបស់គណៈកម្មការវាយតម្លៃការងារបុគ្គលិកនៃមន្ទីរអប់រំខេត្តនេះកាលពីថ្ងៃទី៣១ ខែតុលា ឆ្នាំ២០១៨។
គ្រូបង្រៀននៅអនុវិទ្យាល័យឧទុម្ពរ និងអតីតសមាជិកក្រុមប្រឹក្សាខេត្តកំពង់ធំគណបក្សសង្រ្គោះជាតិ លោក ស៊ុន ធន់ យល់ថាការសម្រេចផ្លាស់ប្តូរនេះ គឺជាការព្យាយាមធ្វើទុក្ខបុកម្នេញផ្នែកនយោបាយមកមើលពួកគាត់ដែលជាអតីតមន្ត្រីគណបក្សប្រឆាំង ហើយមិនបានចុះចូលជាមួយបក្សកាន់អំណាចតែម្តង។
លោកមានប្រសាសន៍ថា៖ «នៅជិតផ្ទះជិតសាលា ជាឱកាសយើងប្រកបមុខរបរចិញ្ចឹមជីវិតផ្សំ នឹងប្រាក់ខែក៏កម្សត់ហ្នឹង។ អីចឹងហើយ គេឱ្យយើងទៅឆ្ងាយ គេឱ្យយើងលំបាក ធ្វើម៉េចគេ។ និយាយឱ្យអស់ទៅ ដោយសារតែយើងមិនចុះចូលគណបក្សប្រជាជន ហ្នឹងយុទ្ធសាស្ត្ររបស់គេ»។
ប្រធានមន្ទីរអប់រំ យុវជន និងកីឡា ខេត្តកំពង់ធំ លោក ជូ វុនធី មានប្រសាសន៍យ៉ាងខ្លីថា ករណីប្តូរគ្រូបង្រៀននេះ ជាការចាំបាច់ក្នុងការផ្លាស់ប្តូរមន្ត្រីរាជការស៊ីវិល។
លោកបន្តថា៖«វាជាការចាំបាច់របស់មន្ត្រីរាជការស៊ីវិល គេត្រូវការផ្លាស់ប្តូរ តាមចិត្ត»។
យ៉ាងនេះក្តី គ្រូបង្រៀនទាំងពីររូប បានដាក់លិខិតទៅមន្ទីរអប់រំខេត្តឱ្យបំភ្លឺជុំវិញបញ្ហានេះ ហើយគ្រោងនឹងដាក់លិខិតសុំកិច្ចអន្តរាគមន៍ទៅក្រសួងអប់រំ ព្រមទាំងទៅសមាគមគ្រូបង្រៀនកម្ពុជាឯករាជ្យជាដើម។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី មានប្រសាសន៍ថា ករណីផ្លាស់ប្តូរកន្លែងបង្រៀនរបស់លោកគ្រូទាំងពីរនាក់នោះ ដោយថា ខាងមន្ទីរអប់រំមិនបានអនុវត្តតាមនីតិវិធីឡើយ ប៉ុន្តែមានចេតនានយោបាយច្រើនជាងទៅវិញ។ អ្នកស្រីយល់ថា ការបំពេញការងារបែបនេះ គឺបណ្តាលប៉ះពាល់ដល់វិស័យអប់រំ។
អ្នកស្រីបន្ថែមថា៖ «ចំពោះលោកគ្រូអ្នកគ្រូយើងកន្លងមក កន្លងមកដែលត្រូវបានគេលុបឈ្មោះ ដោយគេត្រូវពង្រាយ។ ទោះបីជាគ្រូហ្នឹងល្អប៉ុណ្ណា ក៏ពួកគាត់ត្រូវយកធ្វើយ៉ាងណាឱ្យពួកគាត់ខ្ចាត់ខ្ចាយ ដើម្បីបំបាក់ស្មារតីលោកគ្រូអ្នកគ្រូដទៃទៀត លែងឱ្យហ៊ានចេញមុខតវ៉ា ទាមទារអ្វីមួយ ដែលពួកគាត់ចង់បាន»។
ខេត្តកំពង់ធំ មានគ្រូបង្រៀនសរុបជាង៥ពាន់នាក់ និងមានសាលារៀនតាំងពីបឋមសិក្សា រហូតដល់វិទ្យាល័យមានចំនួនសរុបជាង៧រយ (៧៧០)៕
