ប្រទេសចិន បានសម្តែងការមិនពេញចិត្តជាខ្លាំងចំពោះករណីដែលជប៉ុនបង្កើនថវិកាការពារជាតិ ដោយថា ទង្វើរបស់ជប៉ុនបែបនេះនឹងមិនធ្វើឲ្យទំនាក់ទំនងរបស់ប្រទេសទាំងពីរល្អប្រសើរនោះទេ។
ការជំទាស់របស់ចិនបែបនេះ ធ្វើឡើងបន្ទាប់ពីរដ្ឋាភិបាលជប៉ុនបានប្រកាសពីផែនការបង្កើនថវិកាការពារជាតិ១០ភាគរយថែមទៀតក្នុងរយៈពេល៥ឆ្នាំខាងមុខ។
អ្នកនាំពាក្យក្រសួងការបរទេសចិន លោកស្រី Hua Chunying បានថ្លែងក្នុងសន្និសីទសារព័ត៌មានប្រចាំថ្ងៃកាលពីថ្ងៃទី១៨ ខែធ្នូ ឆ្នាំ២០១៨ ថា សកម្មភាពរបស់ជប៉ុនពេលនេះមិនបានបង្កើតបរិយាកាសដែលជួយធ្វើឲ្យទំនាក់ទំនងរវាងចិននិងជប៉ុន ក៏ដូចជាសន្តិភាពនិងស្ថិរភាពនៅក្នុងតំបន់ប្រសើរឡើយ។ លោកស្រីបន្តថា ចិនមិនពេញចិត្ត និងជំទាស់ជាខ្លាំងចំពោះសេចក្តីសម្រេចរបស់ជប៉ុនបែបនេះ។
អ្នកនាំពាក្យក្រសួងការបរទេសចិនរូបនេះ បន្ថែមថា តាមអ្វីដែលធ្លាប់កើតឡើងក្នុងប្រវត្តិសាស្រ្ត រាល់ការវិវត្តក្នុងវិស័យយោធារបស់ជប៉ុន ប្រទេសជិតខាងក្នុងតំបន់អាស៊ីនិងសហគមន៍អន្តរជាតិតែងតែតាមដានដោយយកចិត្តទុកដាក់។ លោកស្រី Hua Chunyin ក៏បានជម្រុញទៅភាគីជប៉ុនផងដែរថា ត្រូវតែរក្សានៅការប្តេជ្ញាចិត្តរបស់ខ្លួនដែលថាការបង្កើនថវិកាការពារជាតិនេះជាយុទ្ធសាស្ត្រការពារខ្លួនសុទ្ធសាធ។
លោកស្រី Hua Chunyin ក៏បានច្រានចោលផងដែរចំពោះការលើកឡើងរបស់ភាគីជប៉ុនដែលថា ចិនកំពុងគំរាមកំហែងខ្លួន ដោយថា ការចោទប្រកាន់នោះគ្មានមូលដ្ឋានច្បាស់លាស់ព្រោះថា សកម្មភាពនិងការកសាងមូលដ្ឋានយោធាកន្លងមករបស់ចិន គឺធ្វើឡើងជាធម្មតាតែប៉ុណ្ណោះ។
គណៈរដ្ឋមន្រ្តីរបស់ លោក ស៊ិនហ្សូ អាបេ កាលពីថ្ងៃអង្គារ ទី១៨ ខែធ្នូ ឆ្នាំ២០១៨ បានសម្រេចបង្កើនថវិកាចំណាយលើវិស័យការពារជាតិ រហូតដល់២៤០ពាន់លានដុល្លារក្នុងរយៈពេល៥ឆ្នាំ គិតចាប់ពីឆ្នាំ២០១៩ ដល់ឆ្នាំ២០២៤។ ការសើរើផែនការការពារជាតិរបស់ជប៉ុននេះ ធ្វើឡើងតាមសំណើររបស់លោក ស៊ិនហ្សូ អាបេ ក្រោយពីមានការបាញ់បង្ហោះមីស៊ីលរបស់កូរ៉េខាងជើងកាលពីឆ្នាំមុន។ មូលហេតុមួយផ្សេងទៀតដែលត្រូវបានរដ្ឋាភិបាលជប៉ុនលើកយកមកការពារផែនការថ្មីរបស់ខ្លួននោះ គឺការបារម្ភពីឥទ្ធិពលយោធារបស់ចិននៅក្នុងតំបន់។
ផែនការការពារជាតិថ្មីនេះនឹងជួយបង្កើនសមត្ថភាពការពារជាតិរបស់ជប៉ុនមូយកម្រិតទៀត។ តាមរយៈផែនការការពារជាតិថ្មីនេះ ជប៉ុននឹងមាននាវាផ្ទុកយន្តហោះជាលើកដំបូងតាំងពីប្រទេសនេះចាញ់សង្រ្គាមលោកលើកទី២ កាលពីឆ្នាំ១៩៤៥។ ក្រៅពីនេះជប៉ុន ក៏នឹងដាក់ពង្រាយមីស៊ីលរយៈចម្ងាយឆ្ងាយផងដែរ។ ទោះបីមានការរិះគន់យ៉ាងណាក្តី រដ្ឋាភិបាលលោក អាបេ ថាគោលនយោបាយការពារជាតិថ្មីនេះមិនផ្ទុយពីរដ្ឋធម្មនុញ្ញជប៉ុននោះទេ ព្រោះវាធ្វើឡើងក្នុងបំណងដើម្បីការពារជប៉ុនពីការគំរាមកំហែងពីសត្រូវខាងក្រៅតែប៉ុណ្ណោះ៕
