ក្រសួងបរិស្ថានបានសម្រេចផ្តល់ថវិការចំនួន ២ម៉ឺនដុល្លារសហរដ្ឋអាមេរិកដល់លោក បេន ដេវីស ដែលកំពុងបំពេញការងារការពារព្រៃឈើ និងសត្វព្រៃ នៅតំបន់ដែនជម្រកសត្វព្រៃភ្នំត្នោត-ភ្នំពក ក្នុងស្រុកសង្គមថ្មី ខេត្តព្រះវិហារ។
ហ្វេសប៊ុករបស់ក្រសួងបរិស្ថាននៅថ្ងៃនេះ បានឱ្យដឹងថា ក្នុងព្រឹត្តិការណ៍ប្រគំតន្រ្តីបៃតងក្រោមប្រធានបទ «គ្មានព្រៃ គ្មានជីវិត» នៅស្រុកសង្គមថ្មី ក្រសួងបរិស្ថានបានផ្តល់ថវិកាចំនួន ២ម៉ឺនដុល្លារដល់លោក បេន ដេវីស (BEN DEVIS) ដែលកំពុងរស់នៅជាមួយគ្រួសារ និងបានលះបង់កម្លាំងកាយ កម្លាំងចិត្ត ដើម្បីបុព្វហេតុការពារ និងអភិរក្សធនធានព្រៃឈើ និងសត្វព្រៃនៅតំបន់ដែនជម្រកសត្វព្រៃភ្នំត្នោត-ភ្នំពក ក្នុងខេត្តព្រះវិហារ។
ប្រភពដដែល បញ្ជាក់ថា ក្រសួងបរិស្ថាន តាមរយៈមូលនិធិបរិស្ថាន និងសង្គម ជួយគាំទ្រដល់ការងាររបស់លោក បេន ដេវីស នូវថវិកា ២ម៉ឺនដុល្លារនៅឆ្នាំ២០១៩នេះ ហើយក្រសួងបរិស្ថានមានគម្រោងជួយគាំទ្រសកម្មភាពលោក បេន បន្តរយៈពេល ៥ឆ្នាំទៅមុខទៀត។
ក្រសួងមួយនេះ អះអាងថា ការផ្តល់ថវិកាដល់លោក បេន ដេវីស ដើម្បីជាការលើកទឹកចិត្តដល់សហគមន៍មូលដ្ឋាន ជាពិសេសលោក បេន ដែលបានលះបង់ដើម្បីបុព្វហេតុការពារ និងអភិរក្សធនធានធម្មជាតិព្រៃឈើ ព្រមទាំងសត្វព្រៃនៅខេត្តព្រះវិហារ។
ដែនជម្រកសត្វព្រៃភ្នំត្នោត-ភ្នំពក ត្រូវបានរដ្ឋាភិបាលចេញអនុក្រឹត្យបង្កើតឡើងកាលពីថ្ងៃទី៣១ សីហា ឆ្នាំ២០១៧ មានទំហំជាង ៤ម៉ឺនហិកតា(៤២ ០៩៧) ស្ថិតនៅភូមិសាស្ត្រ ស្រុកសង្គមថ្មី និងស្រុកគូលែន និងជាប់ស្រុកជីក្រែង ខេត្តសៀមរាបផងដែរ។
វេទិកាស្តីពីការការពារ និងអភិរក្សធនធានធម្មជាតិ ដែលបានរៀបចំឡើងក្នុងឆ្នាំ២០១៦ និងឆ្នាំ២០១៧ លោកនាយករដ្ឋមន្ត្រី ហ៊ុន សែន មានប្រសាសន៍ណែនាំឱ្យក្រសួងបរិស្ថាន មានកាតព្វកិច្ចជួយអ្នកអភិរក្សធនធានធម្មជាតិ ឬសហការជាមួយអង្គការពាក់ព័ន្ធនានា ដើម្បីការពារ និងអភិរក្សធនធានធម្មជាតិឱ្យបានគង់វង្ស៕
